NAKATAKDANG ilipat ng Department of Justice (DOJ) sa Office of the Ombudsman ang reklamong plunder o pandarambong na isinampa ng Bureau of Corrections (BuCor) laban sa suspendidong hepe nito na si Gerald Bantag.
Ayon sa pahayag ni Justice Secretary Jesus Crispin Remulla, inatasan na nito ang mga prosecutor ng DOJ para ilipat sa Ombudsman ang naturang reklamo na inihain ni BuCor officer-in-charge Gregorio Catapang Jr. noong isang linggo.
“Last week General Catapang filed a case for plunder here against former Director General Bantag and other people and I have asked the prosecutors to transfer the case or to send the case to the Ombudsman because I believed that is not within our jurisdiction to rule over plunder cases,” sabi ni Remulla.
Naniniwala ang kalihim na hindi saklaw ng DOJ ang naturang reklamong pandarambong laban kay Bantag.
“I advised them to bring the cases to the Ombudsman because we shouldn’t be handling things that maybe beyond our jurisdiction,” dagdag pa ni Remulla.
Ayon pa sa kalihim, maaaring magsagawa ng sariling imbestigasyon ang Ombudsman at sila rin ang magpapatawag ng mga posibleng testigo sa kaso.
Bukod sa kasong plunder, nagsampa rin ang BuCor kay Bantag at sa iba pa ng reklamong malversation of public funds, graft and corruption, at paglabag sa Code of Conduct and Ethical Standards for Public Officials and Employees.
Nagpahayag naman si Atty. Al Perreras, legal counsel ng BuCor, nag-ugat ang mga reklamong ito sa P1-bilyon proyekto para sa konstruksyon ng tatlong prison facilities ng BuCor, sa Davao Prison and Penal Farm, Iwahig Prison and Penal Farm sa Puerto Princesa Palawan, at Leyte Regional Prison, na tinatayang nagkakahalaga ng P300-milyon bawat project. (RENE CRISOSTOMO)
43 
