MAKARAAN ang direktiba ni Pangulong Ferdinand ‘Bongbong’ Marcos, Jr. na habulin ang mga indibidwal at grupo na lumalabag sa road safety, sinalakay ng Land Transportation Office (LTO), sa patnubay ni Department of Transportation (DoTr) secretary Vince Dizon, ang isang establisimyento sa Quezon City na umano’y nasa likod ng bentahan ng mga second-hand right hand drive motor vehicle.

Nabatid na sa operasyon naging katuwang ng mga tauhan ng LTO ang mga operatiba ng Quezon City Police District (QCPD), bunsod ng naiulat sa social media monitoring hinggil sa naturang mga ilegal na transaksyon.

Sinabi ni assistant secretary Donald Mendoza na isiniwalat sa inisyal na intelligence-gathering na ang nasabing tindahan ay nakikibahagi sa pagbebenta ng mga second-hand right drive na sasakyan.

“Sa ilalim ng batas, ang pagkakaroon ng mga right hand vehicle sa bansa ay ilegal dahil hindi pa dapat sila inangkat,” ani Mendoza, na binanggit ang Republic Act 8506 bilang batayan.

Batay sa RA 8506, o ang Act Banning the Registration and Operation of Vehicles With Right-Hand Steering Wheel sa alinmang Pribado o Pampublikong Kalye, Kalsada o Highway, nakasaad na “labag sa batas para sa sinumang tao na mag-import, magdulot ng pag-aangkat ng, magparehistro, maging sanhi ng pagpaparehistro, paggamit, o pagpapatakbo ng anumang sasakyan na may manibela nito sa kanang bahagi nito o pampublikong kalsada, alinman sa pribadong kalsada o pampublikong kalsada, alinman o lokal na kalye.”

Nabatid na humingi ng tulong sa pulisya si LTO-Intelligence and Investigation Division chief Renante Melitante at noong Mayo 15, binisita nila ang Faequip Corporation Yard na matatagpuan sa San Pedro Compound 5 sa Tandang Sora, Lungsod Quezon.

Sa pagsasagawa ng aktuwal na inspeksyon, nakita ng team ang ilang second-hand right-drive na mga sasakyang de-motor. Ang mga dokumento ng LTO, kabilang ang mga certificate of registration, ay kinumpiska para sa karagdagang imbestigasyon, kasama ang dalawang right-hand drive trucks.

Sinabi ni Asec. Mendoza na isasailalim sa inspeksyon ang dalawang traluck upang matukoy kung tampered ang engine at chassis number ng mga ito.

“Nag-utos din ako ng masusing pagsisiyasat sa bagay na ito, partikular sa kung paano nakarehistro ang mga imported na second-hand na kanang-hand na sasakyang de-motor,” ayon sa kalihim.

(PAOLO SANTOS)