Category: NASYUNAL

MAKARAANG maglabasan ang isang viral video ng pagmamaneobra sa isinasagawang online survey, kinastigo ng iba’t ibang grupo ng mga vlogger at netizens ang Rappler dahil umano sa garapalang manipulasyon sa hangaring ikondisyon ang isipan ng publiko pabor sa kanilang isinusulong na kandidato para pangulo.

Partikular na tinukoy ng mga vlogger at netizens ang pinakahuling online survey ng Rappler kung saan nagtalaga ang digital news organization ng kanya-kanyang emoticons na kakatawan sa bawat kandidato para sa 2022 presidential derby – wow emoticon para kay dating senador Ferdinand “Bongbong” Marcos, puso naman para kay Vice President Leni Robredo, laugh emoticon para kay Senador Ping Lacson, like emoticon kay Manila Mayor Isko Moreno at care emoticon kay Senador Manny Pacquiao.

Sa viral video na ini-upload ng isang netizen sa Tiktok social media platform, kitang-kita ang pagbaha ng wow emoticon sa aktuwal na kuha ng pagrerebisa ng mga pumasok na datos.

Gayunpaman, laking gulat ni Vlogger Kasangga Jay nang makitang lumamang si Robredo sa bilangan gayung kaunti lamang anila ang nag click ng pusong emoticon. Sa nasabing viral video, nagtala si Robredo ng 161,000 – o halos doble ng wow emoticons ni Marcos.

Sa puntong ito, minano-mano ng nasabing grupo ng netizens ang pagbibilang para matiyak ang kanilang suspetsa ng manipulasyon. Ang resulta – milya-milya ang lamang ng wow emoticons na kumakatawan kay Marcos.

Kinastigo ni Vlogger Kasangga Jay ang aniya’y panloloko ng Rappler sa publiko, sabay giit na halatang may pinapanigan ang nasabing news organization.

“Nakakalungkot isipin na niloloko na naman tayo nitong biased press, biased media na ito sapagkat sa kanilang survey ay tila kwestiyonable o tila kataka-taka ang nilalaman nito, mga kasangga….Tila may mali kasi binabalandra na si Leni ang nangunguna, with heart reactions pero nung inusisa nung Tiktok uploader ay ang nangunguna ang mga Wow reactions na para kay Bongbong Marcos. If the truth will prevail, this nation will rise again,” galit na pahayag ng nasabing lider ng grupo ng mga netizens.

Hinala naman ng isa pang social media influencer — Maui Becker na higit na kilala bilang Princess Maui, mayroong salamangka ang administrador ng nasabing Rappler political survey, gamit ang mga gawa-gawang social media accounts sa nasabing pa-survey.

“Epic fail ng Rappler, napahiya sila. Purveyor ng fake news or biased magbalita. Lahat na lang ba ng balita nyo fake, Rappler? Hindi kinaya ng inyong technical maneuver, pagmamani-obra ng survey. Hindi nila kinaya ang dami o buhos ng followers ni BBM. Hindi nila kakayanin dahil hindi lang naman ang mga ito ‘yung mga netizens na namumulat na at naa-appreciate nila si BBM,” ani Princess Maui.

“Hindi kinaya ng sistema Ninyo, hindi kinaya ng program niyo Facebook and Rappler kung tinambakan man nila agad si Leni ng 100k o 150k para mahirapan si BBM… Baka may access sila sa mga FB accounts na dormant na at ginamit sa survey… most of the Leni supporters were accounts of Pakistanis, Arab, poser, fake accounts,” dagdag pa niya.

Gayunpaman, lubos na nababahala si Princess Maui para sa nalalapit na halalan.

“Pwedeng this is a practice of the balak nilang pandaraya next year sa elections, precursor of some kind, test pilot ng kanilang pandaraya,” pahabol pa nito.

Read More

PINANGANGAMBAHANG lolobo pa ang bilang ng mga nasawi sa ilang araw na pananalasa ng bagyong Maring sa MIMAROPA at Northern Luzon na nagdulot ng pagbaha at pagguho ng lupa.

Sa inilabas na Situational Report No. 5 ng National Disaster Risk Reduction Management Council, kahapon ng umaga ay 30 na ang bilang ng mga nasawi habang 14 ang patuloy na pinaghahanap.

Sa nasabing bilang, 19 na ang kinumpirma ng NDRRMC habang bina-validate pa ang ibang iniulat na nasawi.

Sa 14 na nawawala, labing tatlo ang kumpirmado na ng ahensiya.

Nabatid na 1,775 families o 7,370 ang displaced individuals na tumuloy sa 124 evacuation centers mula sa Regions 1, 2, 3, 6, MIMAROPA, Caraga at Cordillera Autonomous Region.

Tinataya namang pumalo na sa P692,035,694 ang produktong agrikultura na napinsala ng Bagyong Maring sa Regions 1, 2, CAR at iba pa. (JESSE KABEL)

Read More

KUNG sadyang nais ng Philippine National Police (PNP) na matuldukan ang mga insidente ng pang-aabuso ng kapulisan sa kanilang mga itinakdang checkpoints, panukala ng isang kongresista – babaeng pulis ang italaga.

Gayunpaman, may alternatibo si House strategic intelligence committee chair Rep. Johnny Pimentel, lalo pa aniya’t batid niyang limitado lamang ang bilang ng mga babaeng pulis sa hanay ng PNP.

Giit niya, kung sadyang hindi kayang magdeploy ng all-women police sa mga checkpoint ng PNP, magtalaga ng isa sa bawat lugar kung saan mahigpit ang pagbabantay kaugnay ng patuloy na banta ng pandemya.

“Camp Crame has to put a stop to these horrible police abuses against helpless girls and young women,” ani Pimentel matapos makapagtala ng panibagong kaso ng pang-aabuso ng isang pulis sa checkpoint.

Partikular na tinukoy ng mambabatas insidenteng kinasangkutan ng isang Staff Sgt. Robin Manganga na gumahasa umano sa isang babaeng rider na kanyang hinuli sa checkpoint dahil sa pagmamaneho ng walang lisensya, sa Mabalacat, Pampanga noong Oktubre 8.

Aniya, marami pang insiteng tulad nito ang naganap bago pa ang kinasangkutan ni Sarhento Manganga.

“In October last year, then Lt. Jimmy Fegcan, the deputy police chief of San Miguel, Bulacan, was accused of raping a 24-year-old woman who was apprehended for a curfew violation and for going out without a quarantine pass,” ani Pimentel.

Hunyo 2020 naman aniya ng gahasain ng mga suspek na sina Staff Sergeants Randy Ramos at Marawi Torda ang dalawang dalagitang edad 15 at 18 matapos silang mahuli sa curfew violation sa Cabugao, Ilocos Sur.

“The 15-year-old victim was later gunned down and killed by motorcycle-riding assailants while on her way home after following their complaint at the police station,” ayon sa mambabatas.

Bunsod nito, nanawagan si Pimentel sa PNP na huwag ipagkatiwala lamang sa mga lalaking pulis ang pagmamando sa mga checkpoint upang maproteksyunan ang mga kababaihan.

“The PNP has enough female officers to lead checkpoint teams, considering that they now comprise 17 percent of the entire force,” pahabol ni Pimentel. (BERNARD TAGUINOD)

Read More

DAHIL sa malaking pinsala sa agrikultura na aabot sa mahigit P600 milyon dulot ng bagyong Maring na rumagasa sa ilang lugar sa bansa, iginiit ni Sen. Cynthia A. Villar ang agarang pinansiyal na tulong sa mga Pilipinong magsasaka.

Base sa pinakahuling data ng Department of Agriculture (DA), naapektuhan ng Bagyong Maring ang 29,063 magsasaka at mangingisda na ang volume ng production loss ay 36,354 metric tons (MT). Napinsala rin ang 32,882 ektaryang agricultural areas sa Cordillera Administrative Region, Ilocos Region, Cagayan Valley, Central Luzon, Bicol Region at Western Visayas.

Bukod sa pinakahuling bagyo, ang mababang presyo ng palay at ang COVID-19 pandemic ang ilan din sa mga dahilan upang bigyan ng pinansiyal na tulong ang mga magsasaka na apektado ang buhay at kita sa mga ganitong hamon.

Kasalukuyang hinihintay pa ang lagda ni President Rodrigo Duterte para maisabatas ang Cash Assistance to Filipino Rice Farmers Act of 2020 na pakikinabangan ng may 1.673 milyong maliliit na magsasaka.

Isinulong ni Villar, chairman ng Senate Agriculture and Food Committee, para ma-institutionalize ang pagbibigay sa rice farmers ng sobrang koleksyon ng Bureau of Customs (BOC) mula sa P10-billion Rice Competitiveness Enhancement Fund (RCEF).

“The Cash Assistance for Filipino Rice Farmers Act of 2020 recommends that any amount in excess of the P10-B RCEF collection by the BOC shall automatically be given as cash assistance to rice farmers who are tilling 2 hectares or less of rice land, which is estimated at 1.673 million as listed in the Registry System of Basic Sectors (RSBS),” ayon kay Villar.

Iginiit ni Villar na ang financial subsidy sa mga magsasaka ay alinsunod sa mandato ng Republic Act 11203 o An Act Liberalizing the importation, Exportation or Trading of Rice or the Rice Tarification Law.

Patuloy rin aniyang nahaharap ang Filipino rice farmers sa mga hamon dulot ng liberalization ng rice importation noong 2019, at ang mga nakapipinsalang bagyo na sumisira sa sakahan at ang COVID-19 pandemic. (ESTONG REYES)

Read More

KINASTIGO ni Senador Panfilo Lacson ang Department of Health (DOH) kung paano nasisikmura ng mga pampublikong ospital na singilin pa ang kanilang pasyente ngayong may pandemya samantalang bilyon-bilyon naman ang “off-budget” na kita nito sa ilang nakaraang taon.

Pinuna ito ni Lacson nitong Miyerkoles sa kanyang interpelasyon sa panukalang badyet ng Department of Health (DOH) para sa 2022.

Giit ni Lacson, kung malaki naman pala ang kinikita nila ay pwede itong pambayad sa mga gastusin sa ospital ng mahihirap na pasyente lalo na ang mga nawalan ng hanapbuhay dahil sa pandemya.

“Why would we still charge patients hospitalization fees at a time of pandemic? Should it not be that the amount be used to cushion the suffering of our people who are confined in government hospitals?” dagdag ni Lacson, na sinang-ayunan naman ni DOH Secretary Francisco Duque III.

“Hindi ba parang may kaunting konsensya issue rito? We’re not using the budget yet we’re charging patients,” diin ni Lacson.

“I think a review of these off-budget accounts is in order para maipuno natin sa pangangailangan,” aniya.

Para kay Lacson, senyales na ito na may mali sa pamamahala ng mga pampublikong ospital.

Ayon sa Budget Expenditure and Sources of Financing (BESF), lumalabas na may P448.439 bilyon na “retained income for 2021 hospital fees” ang DOH para sa 2021.

Aminado naman si Duque na nagulat din siya sa halagang ito at nangakong titignan ang pinagmulan ng nasabing kita.

Ikinagulat din ni Philippine Heart Center executive director Joel Abanilla ang pagkalaki-laking halaga ng kita na ito ng mga pampublikong ospital.

Ang off-budget accounts sa ilalim ng BESF ay ang mga retained income o resibo na ibinibigay ng DOH galing sa lahat ng ‘retained hospitals’ na kumikita sa pamamagitan ng: hospital fees, mga gamot, rent/lease income, seminar/training fees, certification fees, kita galing sa mga hostels/dormitories at iba pang pasilidad, printing at publication, at iba pang business income. Anomang uri ng paggastos ay naka-kategorya lamang bilang “Augmentation of MOOE and CO.”

Nilinaw rin kalaunan ni Duque na ang off-budget account para sa 2021 ay nagkakahalaga lamang ng P21.3 bilyon sa halip na P448 bilyon dahil mali ang naunang sinumite ng Eastern Visayas Medical Center kung saan nailagay nito na P448 bilyon ang dapat sana ay P448 milyon lamang.

Aniya, makikipag-ugnayan ang DOH sa Department of Budget and Management para maitama ang mga numero.

Sa kabila nito, sinabi naman ng DOH na susuriin pa rin nila ang mga kinikita ng ospital dahil malaking halaga ng pera ang nakita rito.

Ayon kay Lacson, ang off-budget accounts ay nagkakahalaga ng P4.789 billion noong 2016, P9.092 billion noong 2017, P6.156 billion noong 2018, P7.667 billion noong 2019, at P8.035 billion noong 2020.

“We are among the few countries without zero billing in government hospitals. In countries like Cuba, citizens need not pay for hospitalization if they are confined,” banggit ni Lacson.

Sa kabila nito, sinabi naman ni National Kidney Transplant Institute director Rose Marie Rosete-Liquete na ang kanilang service cases ay walang balance billing kahit sa mga may kaso ng COVID-19. (ESTONG REYES)

Read More

(ESTONG REYES)

TUMATAGINTING na P200 milyon ang kinita ng kinuhang financial service provider (FSP) ng Department of Social Welfare and Development (DSWD) sa pamamahagi ng ayuda noong nakaraang taon sa ilalim ng Special Amelioration Program (SAP), ayon kay Senador Manny Pacquiao.

Sa kanyang interpelasyon sa ginanap na pagdinig ng Senado sa hinihinging P191.4 bilyon ng DSWD, sinabi ni Pacquiao na kailangan munang isantabi ang badyet ng ahensiya para sa 2022 hangga’t hindi naipaliliwanag ang pagkuha sa StarPay bilang tagapamahagi ng ayuda.

“Nakakadismaya ang mga natanggap kong sagot mula sa DSWD tungkol sa status ng Social Amelioration Program. Paano natin aaprubahan ang kanilang hinihinging 191.4 bilyon pesos para sa kanilang 2022 budget kung hindi nila masagot nang maayos kung magkano ang allocation sa mga financial service provider (FSP) at Electronic Money Issuers (EMI) sa SAP-1 at SAP-2,” ayon kay Pacquiao.

Sinabi ni Pacquiao na nabigo ang DSWD na ipaliwanag kung bakit kinuha ang StarPay, isang kumpanyang may maliit na puhunan upang ipamahagi ang multi-bilyong ayuda sa 6.5 milyong pamilyang apektado ng lockdown noong nakaraang taon.

“Hanggang ngayon, hindi pa rin malinaw kung bakit Starpay ang pinaboran. Out of the 14 million beneficiaries for SAP-2,” aniya.

Ayon sa mambabatas, umabot sa P50 bilyon mula sa P85.1 bilyong pondo ang naibigay sa StarPay upang ipamahagi sa 6.5 milyong beneficiaries o mahigit 50% ng kabuuang pondong inilaan sa SAP.

“Ang ipinagkatiwala pong ayuda sa Starpay ay para sa 6.9 Million beneficiaries. Sa 85.1 Billion pesos na pondo, ipinagkatiwala ng DSWD sa StarPay ang halos 60 porsiyentong pondo o mahigit 50 Billion pesos,” ayon kay Pacquiao.

“Ang natirang 40 porsyento ay pinaghatian ng limang FSP’s at EMI na di hamak na mas malaki pa kaysa Starpay,” dagdag niya.

Ayon kay Pacquiao, base sa financial records ng StarPay mula sa Securities and Exchange Commission (SEC), umabot lamang sa P70,000 benta ng kumpanya noong 2019 at tumuntong sa P113 milyon nitong 2022.

“From losing P26 million in 2019, kumita daw sila ng P20 million pesos sa 2020,” aniya.

“At pinakamasaklap diyan, base sa financial records ng StarPay sa SEC, nagkaroon sila bigla ng P11 billion in cash noong December 2020 kumpara sa P5 million lang noong 2019,” dagdag ng senador.

“Sa P11 billion na cash, P10 billion pala nito ang pera para sa ayuda, na hindi agad ipinamigay sa mga kababayan natin at pinatulog muna sa kanilang account upang kumita ng interest,” giit pa ni Pacquiao.

Aniya, idineposito ng StarPay ang naturang pondo sa isang pribadong bangko at hindi sa government banks alinsunod sa itinakda ng batas tulad ng DBP at Land Bank mula July 2020 hanggang April 2021.

“According to my reliable source, kumita ng P200 million pesos na interest ang StarPay mula sa account nila sa private bank,” ayon kay Pacquiao.

“Ang isyu dito, ginutom ang maraming pamilyang naghihintay ng ayuda sa loob ng sampung buwan pero ang pondo ng bayan, pinatulog sa pribadong bangko at pina-interesan,” giit pa niya.

Kinuwestiyon din ng senador ang sinisingil na P50 hanggang P100 transaction fees na kinolekta sa bawat benepisyaryo ng SAP na idinaan sa StarPay, Western Union at MLhuillier.

Read More

HINDI man direktang pinangalanan, mistulang si Sen. Ronald “Bato” dela Rosa ang pinadedeklara ni House deputy minority leader Carlos Zarate na nuisance candidate sa Commission on Elections (Comelec).

“Kung tatakbo ka sa halalan dapat ito ay masinsin mong pinag-aralan at pinag-isipan hindi yung parang hinatak ka lang dyan para may pumalit sa yo. Nakakainsulto ito sa mga botante at pinagmumukhang katatawanan ang halalan,” ani Zarate.

Magugunita na inamin ni Dela Rosa na dalawang oras bago matapos ang filing ng certificate of candidacy (COC) ay pinapunta umano siya ni PDP-Laban president Alfonso Cusi sa Sofitel upang maghain ng COC para maging standard bearer ng kanilang partido.

Gayunpaman, handa umano si Dela Rosa na i-substitute siya ng anak ni Pangulong Rodrigo Duterte na si Davao City Mayor Sara Duterte-Carpio kaya matunog na ‘place holder candidate” lamang ang senador.

“This kind of practice is a mockery of the election system and is a way of fooling the electorate,” ayon pa sa militanteng mambabatas.

Maging ang Lakas-CMD ay pinaghain ng COC para sa pagkapangulo ang kanilang executive director na si Anna Capella Velasco para umano kay Duterte-Carpio kung saan may alyansa ang partido ni dating Pangulong Gloria Macapagal Arroyo sa Hugpong Ng Pagbabago (HNP).

“We are challenging the Comelec to immediately declare these place holder candidates as nuisance for making a mockery of the election process and insulting the intelligence of voters. These candidates should even be punished for this election atrocity,” ni Zarate.

Seryoso aniya ang halalan ay hindi ito dapat pinaglalaruan ng mga politiko dahil nakasalalay rito ang kinabukasan ng mga Filipino at bansa sa kabuuan.

Unang naging substitute candidate si Pangulong Rodrigo Duterte noong 2016 election matapos nitong palitan si Martin Dino bilang standard bearer ng PDP-Laban. (BERNARD TAGUINOD)

Read More

NAGBABALA ang National Telecommunication Commission (NTC) na mahigpit na ipinagbabawal ngayon ang pagbebenta o pag-angkat ng SMS Blasting Device na umano’y ginamit sa pananabotahe sa pambato ng Partido Federal ng Pilipinas (PFP) na si dating senador Ferdinand “Bongbong” Marcos Jr.

Inatasan din ng NTC ang Facebook, Lazada at Shopee na itigil ang pagbebenta online ng nasabing text blast device, lalo pa’t wala anila silang binibigyan ng pahintulot sa paggawa, pagbenta at pamamahagi ng nasabing makabagong gadget.

“The NTC has not authorized the importation, manufacture, sale/distribution, or type approval of the above-mentioned equipment,” saad ng abiso ng NTC.

Kasabay ng paglalabas ng cease-and-desist order sa tatlong nabanggit na e-commerce platforms, inatasan na rin ng NTC ang mga kinatawan ng mga nasabing online platforms na humarap sa komisyon sa Oktubre 27.

Ayon sa ahensya, ang pagbebenta ng SMS blaster machines at mga katulad na gamit ay maaaring paglabag sa Radio Control Law, gayundin sa NTC MO 01-02-2013 na nagbabawal sa portable cellular mobile repeater at portable cell site equipment.

Una nang sinabi ng NTC na iniimbestigahan na ang pagpapadala ng emergency text alert na naglalaman ng mensaheng mistulang nagsusulong sa kandidatura ni Marcos sa mismong araw ng kanyang paghahain ng kandidatura para pangulo sa nalalapit ng 2022 general elections.

Giit ng kampo ng pambato ng PFP sa pagkapangulo, malinaw na pananabotahe ang pakay ng text alerts at wala silang kinalaman dito.

Nanawagan na rin si Marcos para sa isang malalimang imbestigasyon kaugnay ng pananabotahe sa kanya.

Bukod sa NTC, hindi rin dapat umano palagpasin ng Commission on Elections (Comelec) at Department of Information and Communications (DICT) ang hayagang pagbalewala sa layunin ng text blast messaging services na dapat sana’y ginagamit lamang para magpalabas ng babala kaugnay ng isang kalamidad o delubyo. (JESSE KABEL)

Read More

HINDI dapat palagpasin ng Philippine National Police (PNP) ang pinakabagong insidenteng kinasasangkutan ng isa nilang tauhan na nanghalay diumano sa babaeng rider na nahuli sa checkpoint makaraang walang maipakitang lisensya sa pagmamaneho.

Giit ni Gabriela party-list Rep. Arlene Brosas sa PNP, agad tuldukan ang kalakarang sex-for-quarantine pass ng mga tiwaling pulis sa mga checkpoint sa mga hangganan ng mga bayan, lungsod lalawigan at rehiyon.

“Hindi pwedeng pag pumutok lang ang isyu sa publiko, tsaka lang gagawa ng aksyon,” ayon sa mambabatas lalo pa aniya’t hindi ito ang una at huling kaso ng pagsasamantala ng mga pulis sa kababaihan sa panahon ng pandemya.

Base sa mga report, hinuli umano ng suspek na si Police Staff Sgt. Robin Manganga ang biktima dahil nagmamaneho ng motorsiklo na walang dalang lisensya sa Mabalacat, Pampanga noong Oktubre 8.

Imbes na tiketan o i-impound ang motorsiklong sasakyan ng biktima, ginahasa umano ni Manganga ang hindi pinangalanang babaeng rider.

“This incident only adds up to the numerous cases of sexual violence perpetrated by men in uniform. Fabel Pineda, victim of sex-for-quarantine pass scheme, and more women have also fallen prey to these policemen who use their authority to take advantage of the raging pandemic,” galit na pahayag ni Brosas.

Tila hindi umano natuto si Manganga sa mga kabaro nitong una nang kinasuhan dahil sa panggagahasa sa mga hinuli nila sa mga checkpoint na labis na ikinabahala ng militanteng kongresista.

Umapela rin ang mambabatas sa bicameral conference committee na agad aprubahan ang panukalang batas na mag-aamyenda sa Anti-Rape Law kung saan nakaumang ang mas mabigat na kaso sa mga otoridad.

Kailangang bigatan umano ang parusa sa mga persons in authority na masasangkot sa rape case dahil kung hindi ay marami pa ang susunod kay Manganga na inaabuso ang kanyang kapangyarihan.

Kabilang sa probisyon ng nasabing panukala ay hindi pwedeng makinabang ang mga pulis at mga opisyal ng gobyerno sa Good Conduct and Time Allowance (GCTA) kapag nasentensyahan ang mga ito sa kasong rape. (BERNARD TAGUINOD)

Read More