INATASAN kahapon ni House Speaker Ferdinand Martin G. Romualdez ang Appropriations Committee ng House of Representatives na gumawa ng paraan para makahanap ng P2 bilyong pondo para ilaan sa pagbibigay ng tulong sa mga rice retailer na maaapektuhan ng price ceiling sa bigas na itinakda ng Malakanyang nitong Biyernes.

Sa pahayag, sinabi ni Romualdez na partikular niyang inatasan si Ako Bicol Party-list Rep. Elizaldy “Zaldy” Co, chairman ng Appropriations Committee na agad makipag-ugnayan sa Department of Budget and Management (DBM) para maglaan ng P2 bilyon sa mga rice retailer.

“We want to ensure that we can provide assistance to rice retailers who may be affected by this price ceiling, which they need to comply with because it is an order from our President to protect consumers,” ani Romualdez.

Bilang tugon, sinabi ni Cong. Co, agad siyang nakipag-ugnayan sa tanggapan ni DBM sa Sec. Amenah Pangandaman para mahanapan ng alokasyon ang naturang pondo.

“We will immediately work with the DBM for the immediate release of the P2 billion funds for our rice retailers,” ani Rep. Co.

Ipinaliwanag ni Romualdez na ang naturang inisyatiba ay bilang patunay na ang Kongreso ay seryoso na masiguro na maayos at masigla ang food supply sa bansa.

Kamakailan ay inanunsyo ni Romualdez na makikipagpulong siya sa mga lider ng rice retailers sa bansa para pakinggan ang kanilang mga hinaing ukol sa itinakdang price ceiling ni Pangulong Ferdinand “Bongbong” Marcos Jr.

Ani Romualdez, “The government is not insensitive, so we want to listen to their concerns, and we will try to find a solution to address their fears of incurring losses”.

“We are aware that they have high costs from traders, but our priority is the public’s difficulty in buying rice,” dagdag pa niya.

Ipinag-utos ni Pres. Marcos ang price ceiling na P41.00 per kilo para sa regular milled rice at P45.00 para naman sa well-milled rice sa ilalim ng Executive Order 39.

“It’s not far-fetched to see something like what the onion cartels did, raising onion prices to P800.00 per kilo,” dagdag ni Romualdez.

“Of course, the President has to act swiftly to thwart this ill-intentioned plan by a few,” giit pa ni Romualdez.

Inirereklamo naman ng ilang retailers na nabili na nila ang kanilang mga bigas sa halagang P50, 00 per kilo kaya imposible silang makasunod sa naturang price ceiling.

“But definitely, the government will help our retailers affected by this EO,” anang Speaker.