TINUMBOK ng Social Weather Stations (SWS) na ang pangunahing dahilan ng pagkalat ng coronavirus disease 2019 (COVID-19) sa bansa ay maraming Filipino ang pasaway.
Sa SWS survey noong Abril 28 hanggang Mayo 2, mayroong 79 porsiyentong adult Filipino ang nagsabing paglabag sa health protocols ang pangunahing dahilan sa pagkalat ng COVID-19 sa bansa.
Labing-isang porsiyento naman ang nangatwirang kakulangan sa kahandaan ng gobyerno ang dahilan ng malalang COVID-19 at 10% lang ang naniniwalang bagong COVID-19 variants ang dahilan.
Anu-ano ba ang hindi sinusunod ng mga pasaway? Ito ay ang ‘di pagsusuot ng face masks, face shields at physical distancing.
Nakapagpalala rin ng tinatawag na “super spreader” mula sa swimming, picnic, inuman at iba pang pagtitipon ng maraming tao.
Narito ang tanong noong May 2021 survey: “In your opinion, which of the following is most responsible for stopping the spread of COVID-19?”
Ang sagot ng respondents: 33% sarili, 31% national government, 15% miyembro ng komunidad, 9% local government, 8% sariling pamilya at 4% health workers.
Bago isagawa ang nasabing survey, ang kaso ng COVID-19 ay umabot sa 15,280 noong Abril 3, samantala ang cumulative number ng mga kaso ay umabot sa 1 milyon noong Abril 27.
Kaya kung patuloy na magiging pasaway ang taumbayan at hindi nila gagawin ang pagsusuot ng face masks, face shields at physical distancing ay magpapatuloy ang mabilis na hawaan ng virus.
Ayusin din dapat ng gobyerno ang trabaho nito dahil nakasaad sa survey na 11% ang naniniwalang kulang ito sa kahandaan.
Kung magtutulungan naman ang taumbayan at gobyerno, siguradong mababawasan ang 10% na dahilan na mula sa bagong COVID-19 variants ang isa sa pinagmulan ng patuloy na paglala ng nasabing sakit.
Siyempre, makatutulong din ang bakuna. Bagama’t maraming dumarating na bakuna sa bansa, may problema pa rin tayo dahil ilang mga residente sa Metro Manila ay ayaw pa ring magpabakuna tulad na lamang sa Caloocan City dahil takot sila sa negatibo umanong epekto ng bakuna, partikular iyong galing sa China.
Dapat paigtingin pa ng pamahalaang lokal ng Caloocan ang information dissemination nito, o mas mabuti kung tutulungan ng Department of Health (DOH) ang lungsod, upang mahikayat ang mga residente na magpabakuna.
oOo
Para sa suhestiyon at reaksyon, mag-email sa joel2amongo@yahoo.com at operarioj45@gmail.com, o kaya magtext sa 0956-951-00-57.
347 
