(NI HARVEY PEREZ)

BUO pa rin ang tiwala ni Pangulong  Rodrigo Duterte  sa panunungkulan ni  Tourism Secretary Bernadette Romulo-Puyat .

Ito ay matapos ang naging  banat ng kanyang anak na si House Deputy Speaker at Presidential son Paolo Duterte hinggil sa ilang isyung bumabalot sa ahensya partikular sa istilo ng kanyang pamumuno.

“All praises, very warm. He (Duterte) is happy with the work of Sec. Berna so far. Alam naman natin na maganda naman ‘yung mga ginagawa ni Sec. Berna as far as tourism is concerned,” ani ni  Cabinet Secretary Karlo Nograles.

Nanatili naman tahimik si Puyat sa mga naging pahayag sa kanya ng nakababatang Duterte.

Sinabi ni  Nograles na wala siyang alam sa kahit na anumang reklamo laban kay Puyat dahil mabilis itong umaksiyon at masipag.

Bukod pa sa magaganda naman ang proyekto nito sa DOT.

Magugunita sa privilege speech ni Congressman Duterte na inihayag sa  plenaryo, sinita nito ang pag-apruba ni Puyat sa mga kontrata at proyekto sa ilalim ng DOT na dapat sana’y kukuwestyunin niya sa budget deliberations noong Martes.

Nabatid na sa halip na mag-interpellate ay minabuti umano niyang kausapin na lang ang kalihim sa harap ni Speaker Alan Peter Cayetano gaya ng napagkasunduan sa pre-plenary conference.

Sinabi ng nakababatang Duterte, inakala niya na matatapos na ang isyu at magbubunga ng maganda ang usapan nila ni Puyat pero nauwi  ito sa sumbungan at maling paratang laban sa kanya at sa isang taong hindi na pinangalanan. Gusto lamang umano ni Pulong  na  malaman ng  publiko ang tunay na ugali ni Puyat.