PATULOY ang gobyerno sa pagsasagawa ng mga research study at clinical trial hinggil sa mga COVID-19 vaccine na inaangkat ng Pilipinas mula sa ibang bansa.
Sa Laging Handa briefing, sinabi ni DOST vaccine expert panel head Dra. Nani Gloriani, kailangang magpatuloy ang kanilang mga pag-aaral ukol dito lalo na ngayon na marami pang bagong Covid vaccines ang nalilikha na mas ligtas at mas epektibo.
Kung mapapansin aniya, puro injectable pa lamang ang mga available na bakuna sa bansa pero posibleng mayroon nang dumating na intranasal administered vaccine o iyung ipadadaan na lamang sa ilong o pagsinghot.
Sa katunayan, nagsisimula na aniya ang clinical trial ukol dito.
Binigyang-diin ni Gloriani, marami pang mga bagong darating at hindi aniya dapat mabahala dahil ganoon talaga ang medicinal research kung saan may mga pagbabago at mga advanced na teknolohiya para mas ma-improve pa ang safety at efficacy ng isang COVID-19 vaccine. (CHRISTIAN DALE)
