TARGET ni KA REX CAYANONG

SA kasalukuyang pulitikal na klima ng bansa, ang paglalantad ng popularidad ng mga potensyal na kandidato sa Senado ay hindi lamang isang batayan ng kasalukuyang sentimiyento ng mamamayan kundi isa ring paningin sa hinaharap ng pulitika ng bansa.

Sa isang survey ng Pulse Asia noong Marso, lumitaw na sina ACT-CIS Party-list Rep. Erwin Tulfo at dating Senate President Vicente “Tito” Sotto III ay nangunguna bilang mga potensyal na kandidato sa Senado kung ang eleksyon ng 2025 ay gaganapin noong panahon ng pagsusuri.

Sa kabuuan ng 1,200 respondents mula sa iba’t ibang bahagi ng bansa, ang survey na isinagawa mula Marso 6 hanggang 10 ay nagpakita ng interesanteng pananaw sa mga nais ng mamamayan sa kanilang mga pinuno.

Nangunguna naman si Sen. Raffy Tulfo na sinundan ng Vice President na si Sara Duterte sa 2028 presidential elections sa survey pa rin ng Pulse Asia.

Pumangatlo naman si dating Vice President Leni Robredo at sumunod si Imee Marcos sa survey.

Ayon kay Ronald Holmes, presidente ng Pulse Asia, “ang pagsali ng mga Tulfo sa pulitika ay bago pa lamang. Marahil ay handang bigyan sila ng pagkakataon ng mga tao dahil sa kanilang nakaraang rekord ng pagtugon sa mga suliranin ng mamamayan.”

Sa kabilang banda, ayon kay political analyst Julio Teehankee, ang pag-angat ng Tulfo brand ay nagpapakita ng kakulangan ng ating sistema ng katarungan.

Binanggit niya rin si Mon Tulfo, ang panganay na kapatid ng mga ito, ay sumikat sa kanyang pagtulong sa mga naaapi at sa mga humihingi ng katarungan.

Isa raw itong patunay ng patuloy na kakulangan ng ating sistema ng katarungan dahil sa tingin ng karaniwang mamamayan, hindi sila makalalapit sa hukuman, sa pulisya, at sa mga institusyon ng hustisya.

Ang kanilang tanging maaaring lapitan ay ang mga nagbibigay ng pampublikong serbisyo, lalo na sa panahon ng paglago ng impluwensya ng social media.

Ang brand ng Tulfo na sinimulan ni Mon na ngayon ay ipinagpapatuloy ng kanyang mga kapatid, at dahil dito, naiupo sa posisyon ang kanyang mga kapatid tulad ni Senador Raffy.

Bukod kina Sen. Raffy at Cong. Erwin, pasok din sa survey ang kanilang matapang na kapatid na si Ben Tulfo.

Hindi lamang ito nagpapakita ng popularidad ng mga personalidad ngunit pati na rin ang mga pananaw at hinahangad ng mamamayan para sa hinaharap ng pulitika.

Kahit na ang mga pangalan tulad ng mga Tulfo na nangunguna sa survey, hindi dapat itong maging basehan ng kongkretong tagumpay sa eleksyon.

Sa halip, dapat itong maging isang hamon sa mga potensyal na kandidato na magbigay ng maayos at makabuluhang plataporma na tutugon sa mga tunay na pangangailangan ng bansa at ng taumbayan.

Ang tunay na kapangyarihan ay nasa kamay ng taumbayan, at sa kanilang mga kamay rin nakasalalay ang kinabukasan ng bansa.