Marami nang OFWs at maging ang pamilya ng mga ito ang nag-aabang sa ipamamahagi na OWWA Rebate.
Ang pagbabahagi ng Overseas Workers Welfare Adminstration (OWWA) Rebate ay hindi isang programa ng OWWA kundi isang pagtalima alinsunod sa batas sa ilalim ng RA10801 o OWWA ACT.
Ayon sa binalangkas na patakaran na batay naman sa recomendasyon ng mga ekspertong aktuaryo, ang OWWA ay maaaring magbahagi ng rebate para sa OFWs na miyembro ng OWWA. Tatlo ang batayan para makatanggap ng rebate. Una, dapat ikaw ay miyembro sa loob ng 10 taon. Ikalawa, dapat ay may limang kontribusyon ng OWWA membership at ang ikatlo ay hindi pa nakakatangap ng kahit anumang benepisyo mula sa OWWA.
Ang rebate ay hindi ang pagsasauli ng lahat ng ibinayad ng miyembro, kundi porsiyento lamang ng kabuuang kontribusyon. Sa kasalukuyan ay $25.00 ang ibinabayad ng OFW para sa dalawang taon ng coverage ng OWWA membership, kaya kung susumahin, ay $125.00 o may katumbas na P6,250 lamang ang kabuuang halaga ng kontribusyon ng isang OFW sa kanyang 10 taong pagiging miyembro.
Sa inisyal na kwenta ay halos P875 lamang ang maaaring matanggap na rebate ng isang OFW. Samantala, sa seafarers ay may iilan na maaaring makatangap ng halagang higit sa P13,000 dahil sa patakaraan noon na sa tuwing sila ay sasakay ng barko tuwing anim na buwan ay dapat na magbayad ng kontribusyon sa OWWA.
Sa nakaraang OFW Dialogue na dinaluhan ng mga lider ng iba’t ibang organisasyon ng OFW, ay aking ipinaliwanag ang aking malaking panghihinayang sa malaking halagang ilalabas para lamang sa rebate. Abot sa mahigit na 1 bilyong piso ang perang ipapamahagi para lamang dito. Sa halagang ito, 95% ay ibabahagi sa seafarers at 5% ay para sa mga land-based sector.
Sa aking pananaw, mas malaki ang maitutulong ng pera mula sa rebate, kung ito ay pagsasama-samahin muli upang makapagpatayo ng OFW Dialysis Center na libre para sa lahat ng OFWs at pamilya nito. Ang pananaw na ito ay sinang-ayunan ng 89% ng OFW na batay sa online survey na ating ginawa sa pamamagitan ng AKOOFW Facebook page.
Ayon sa plano ng OWWA, ang rebate ay makukuha sa tatlong paraan: Una ay sa pamamagitan ng pag-transfer sa inyong bank account, ikalawa ay sa money transfer at ikatlo ay idonate sa “Tuloy –Aral Program na makikita sa OWWA Rebate link.
Kung kaya, ang naging mungkahi na mga dumalo sa OFW Dialogue, ay dagdagan ang option sa pagkuha nito at idagdag ang “Donate to OFWs Dialysis Center”. (Ako OFW / DR. CHIE LEAGUE UMANDAP)
224
