ISANG pribadong paglilibing ang ginawa sa California para kay NBA superstar Kobe Bryant at sa 13-anyos nitong anak na si Gianna, na namatay kasama ang pito pang iba nang mag-crash ang sinakyang chopper noong nakaraang buwan.

Sa ulat na lumabas sa New York Post, kinumpirma na naganap ang libing noong Biyernes (Pebrero 7) sa Corona Del Mar.

May isasagawa ring public memorial sa Pebrero 24 sa Staples Center sa Los Angeles para sa mag-amang Bryant, pati na sa pito pang biktima.

“Vanessa and the family wanted a private service to mourn their loss,” lahad ng source sa Entertainment Tonight, pinagkunan ng detalye ng NYP. “The ceremony was extremely hard for everyone as it’s still hard for them to grasp they lost two beautiful souls.”

Ang iba pang biktima sa naganap na trahedya ang teammates ni Gianna na sina Alyssa Altobelli at Payton Chester, magulang ni Allysa na sina John at Keri, ang nanay ni Payton na si Sarah, girls’ basketball coach na si Christina Mauser at piloting si Ara Zobayan.

Ang nasabing helicopter ay patungo sana sa isang basketball game sa Mamba Sports Academy nang maganap ang insidente.  (VT ROMANO)