ITINALAGANG chairman ang Bureau of Customs (BOC) ng Pilipinas sa naganap na ika-30 ASEAN Customs noong Hunyo 8 hanggang 10.
Ang aktibidad na ito kung saan nagkita-kita at nagpulong ang mga pinuno ng Customs agency ng mga bansa sa ASEAN ay binigyan ng responsibilidad ang BOC ng Pilipinas na pamunuan ang Customs Coordinating Committee (CCC).
Ang layunin nito ay upang madagdagan ang kahusayan sa koordinasyon sa mga aktibidad at aksyon ng ASEAN Customs.
Kasama sa naging tungkulin nito ang pagiging regional coordinator ng ASEAN Technical Working Groups (TWGs) tulad ng ng Working Group on Customs Enforcement and Compliance, Working Group on Customs Capacity Building at Working Group on Customs Procedures and Trade Facilitation kung saan kasama ang sub-working groups na sakop ng Sub-Working Group on ASEAN Customs Transit System, Sub-Working Group on ASEAN AEO MRA, Technical Sub-Working Group on Classification at ng ASEAN Single Window Steering Committee at ASEAN Single Window Technical Working Group.
Ang CCC ay pamumunuan ni Atty. Marietta D. Zamoranos, hepe ng External Affairs Office, makaraang italaga siya ni Commissioner Rey Leonardo B. Guerrero sa bisa ng Customs Special Order No. 92-2021.
Mananatiling CCC chairperson si Atty. Zamoranos hanggang ilunsad ang ika-31 ASEAN Directors-General meeting na nakatakdang ganapin sa Hunyo 2022.
Pagkatapos nito, Singapore Customs naman ang mamumuno.
Pinasalamatan at pinuri ni Zamoranos ang Myanmar Customs dahil sa matagumpay na pamumuno nito sa ASEAN Customs mula 2020 hanggang 2021.
Aniya, ang ASEAN ay nagtatrabaho para maabot ang itinakdang mga tudla nito, sa pamamagitan ng iba’t ibang kontribusyon ng bawat kasapi ng ASEAN Customs.
(Joel O. Amongo)
547 
