SA pagnanais na mabakunahan ang lahat ng mamamayan sa San Jose Del Monte City sa Bulacan, nagpahayag si SJDM Rep. Florida Robes na naglaan na ang pamahalaang lungsod ng inisyal na P100 milyon para sa pagbili ng COVID-19 vaccines.

Sa isang panayam, sinabi ni Robes na pinaplantsa na ng lokal na pamahalaan ang tripartite agreement sa ilang vaccine manufacturers upang makabili ng sapat para sa karapat-dapat na mamamayan ng lungsod na tinatayang lagpas sa isang milyong residente.

“The city government of SJDM has allotted an initial amount of P100 million for the purchase of vaccines and additional funding will be allotted depending on the final cost of the vaccines and actual number of those who will get the vaccines,” ipinunto pa ni Robes.

Idinugtong niya na layunin ng kanyang asawang si Mayor Arthur Robes na mabakunahan ang 75 porsiyento ng mga karapat-dapat na mamamayan sa pagtatapos ng taong 2021 upang makamit nila ang kawan ng maliligtas sa sakit, habang ang nalalabing 25 porsiyento ay mabakunahan sa unang bahagi ng taong 2022, depende sa mabibiling bakuna ng pambansang pamahalan.

“We are aiming for 75 percent coverage by end of 2021 but this will depend on the vaccine procurement of the national government. But we were assured by Inter-Agency Task Force for the Management of Emerging Infectious Diseases (IATF) Chairperson, Secretary Carlito Galvez, that sufficient vaccines will arrive in the country by middle of this year until end third quarter of this year,” ani Rep. Robes.

Sa kabila ng limitadong suplay ng bakuna, nakamit pa rin ng SJDM ang 90 porsiyentong target na mabakunahang mga health worker. Sa huling datos ng Public Information Office (PIO) ng lungsod noong Abril 6, 2021, nakapagbakuna ang city health department ng 3,459 mula sa kabuuang bilang na 3,895 na health workers o 88,81 porsiyentong target.

Tumanggap sila ng bakuna kung hindi man Sinovac ay AstraZeneca.

Ang lungsod ay nakapagbakuna rin ng 100 porsiyento mula sa target na 220 katao na nakapagrehistro na pawang may comorbidities o nasa kategoryang A3. Gayunman, sinabi ng PIO na kasalukuyan pang ina-update ng lungsod ang mga nasa kategoryang A3 batay sa karagdagang datos at bilang ng mga nagparehistro.

Ipinagpatuloy rin ng lungsod ang pagbabakuna sa target na 22,039 na mga senior citizen na nakapagrehistro para mabakunahan bagama’t itinigil pansamantala ng pambansang pamahalaan ang paggamit ng AstraZeneca sa mga may edad dahil sa usaping pangkaligtasan. (CESAR BARQUILLA)