Ni ANN ENCARNACION
ASAHAN ang mainitang sagupaan ngayon (Huwebes) sa pagitan ng NLEX Road Warriors at Converge FiberXers na kapwa naghahangad makakuha ng silya sa quarterfinals ng 2022 PBA Philippine Cup.
Pipilitin naman ng San Miguel Beermen na mapanatili ang liderato kontra rumaratsada ngayong TNT Tropang Giga.
Maghaharap ang Road Warriors at FiberXers sa unang game ng double-header sa Smart Araneta Coliseum, 5:15 ng hapon.
Kasalukuyang nasa ikalima sa team standing ang NLEX (4-3) na hindi maaaring magkampante kontra Converge (2-5) na inaasahang kakayod ng husto lalo’t nasa alanganing ikawalong puwesto.
Nabigo ang NLEX sa huling laban nito kontra Magnolia, 73-87, habang talo rin ang Converge kontra Barangay Ginebra, 89-105, kaya inaasahang kapwa pipiliting makabawi ng magkalabang koponan.
Sa main game 7:15 ng gabi, magbabakbakan ang nangungunang SMB (6-1) at nasa pang-apat na puwestong TNT (7-2).
Kapwa hangad ng Beermen at Tropang Giga na mapanatili ang magandang kartada at makakuha ng insentibo papasok sa quarterfinals ng 47th PBA first conference.
Sa pinakahuling laro ng San Miguel ay dinomina nito ang NorthPort, 122-106, habang dinaig din ng TNT ang nakalabang Terrafirma, 114-86.
66
