MAKABALIKWAS sa pagkatalo ang kapwa pakay ng Blackwater at Barangay Ginebra sa magkahiwalay na pakikibaka ngayon (Miyerkoles) sa 2022 PBA Philippine Cup sa Araneta Coliseum.
Unang magsasagupa ang Blackwater at Rain Or Shine sa ganap na alas-3:00 ng hapon, na susundan ng laban sa pagitan ng Meralco at Ginebra sa ganap na alas-6 ng gabi.
Gigil makabawi si head coach Ariel Vanguardia at ang Bossing mula sa 107-110 loss kontra San Miguel Beermen noong Linggo.
Sisikapin naman ng Elasto Painters na sakyan ang momentum mula sa 96-86 win laban sa NLEX noong Sabado.
“Parang pareho namin sila, mga bata na may mix ng veterans,” obserbasyon ni Vanguardia sa makakalaban na RoS.
“And they also like a fast-paced game na tulad din namin.”
Hangad ng Blackwater (5-2 panalo-talo) na tapusin ang 11-game eliminations na may twice-to-beat advantage papasok sa quarterfinals. Ngunit alam ni Vanguradia na ‘di ito magiging madali lalo’t ‘buwis-buhay’ na ang RoS (2-6) upang makaahon mula sa pangalawa sa huli sa team standings, sa unahan ng wala pang panalong Terrafirma Dyip (0-8).
“Yung record nila doesn’t really reflect the way they play. Meron din silang mga close games and last game super din inilaro nila,” pag-amin ng Bossing coach. “Gusto nila takbuhan, gusto rin namin ‘yon. Pero against them, kailangan na mas patient kami, methodical.”
Samantala, kapwa target ng Gin Kings (6-2) at Bolts (4-3) na mapaganda pa ang kanilang kartada at makakuha ng two-game advantage sa pagtatapos ng All-Filipino eliminations. (ANN ENCARNACION)
74
