NAGKAKAISA ang mga senador na isantabi ang pinasok na concessionaire agreement ng pamahalaan sa Maynilad at Manila Water hanggang 2037.
Ayon kina Senador Aquilino Pimentel, Senador Bong Go at Senador Francis Tolentino kailangang pag-aralang mabuti ng pamahalaan ang kontrata sa nasabing dalawang water concessionaires dahil sa natuklasang kuwestiyunableng nilalaman ng kontrata.
“Ang original lifetime ng contract ay 2022, sa gitna nu’n nag-agree na i-extend from 2022 to 2037. Pero para sa akin ‘yung agreement to extend ay hindi pa effective kasi nga hindi pa naman nagi-expire. Sa akin pwedeng i-disregard ‘yun ng Duterte administration,” sabi ni Pimentel.
Kapwa naman sinabi nina Go at Tolentino na ginigisa sa sariling mantika ang taumbayan ng Maynilad at Manila Water Water sa ginagawang pagpapataw ng mga gastusin sa mga kumokonsumo ng tubig.
Dagdag pa ni Pimentel, dapat nang ikonsidera ng pamahalaan na maghanap ng bagong concessionaire dahil sa pagmamalabis ng dalawang water concessionaires.
Sinabi pa ni Tolentino na dahil sa corporate greed ng Maynilad at Manila Water ang dahilan kung kaya’t nakakaranas ng krisis sa tubig.
“Ang corporate greed ng mga water concessionaire ang rason kung bakit nagkakaroon tayo ng
krisis sa tubig ngayon. The water crisis has affected not only the national economy or the productivity of students, workers and everyone in society but it ultimately puts the health of the people, especially children, at serious risk and threatens the country’s attainment of sustainable
development,” sabi pa ni Tolentino.
Giit naman ni Go, kulang na nga ang ibinibigay na supply ng tubig ng naturang mga water concessionaires ay nakapagtatakang pagpapataw pa ito ng mataas na singil.
“I urge the Department of Justice, the Department of Finance and the Office of the Solicitor General to perform your mandate and ensure that the government protects the interest of the Filipino people. Hindi natin kailangan ng mga kumpanyang pinagkakakitaan lang ang ating mamamayan. Protektahan natin ang karapatan at kapakanan ng ating bayan at ng ating mga kababayan,” sabi pa ni Go.
NAGPATUPAD ng bawas-presyo sa mga produktong petrolyo ang mga kompanya ng langis sa bansa bukas ng umaga, (Disyembre 10).
Epektibo bukas ng alas-6:00 ng umaga na magpapatupad ang Phoenix Petroleum Philippines ng P0.10 sentimong kada litro ang kaltas sa presyo ng diesel at P0.30 naman kada litro ng gasolina.
Habang ang Petro Gazz, PTT Philippines at Seaoil ay magpapatupad naman ng P0.10 kada litro sa diesel at P0.40 sentimos sa gasoline.
Nagbawas din ang Pilipinas Shell at Petron Corporation ng P0.40 sentimos kada litro sa presyo ng gasoline at kerosene.
Samantala, epektibo mamayang alas-12:01 ng hatinggabi ipatutupad ng Chevron Philippines Inc. O (Caltex) ang tig P0.40 kada litro ng kanilang WPP of Platinum and silver at kerosene.
Inaasahan naman na susunod na magpalabas ng abiso ng rollback sa presyo ng mga produktong petrolyo ang ilan pang malalaki at maliliit na kompanya ng langis sa bansa sa kahalintulad na halaga.
Ang ipinatupad na bawas presyo ay bunsod sa patuloy na paggalaw ng presyuhan nito sa pandaigdigang pamilihan.
PUMASA na sa ikatlo at huling pagbasa ang panukalang palawigin ang validity ng lisensya sa pagkakaroon ng baril at bala mula sa dalawang taon ay magiging 5-taon.
Sa botong 20-0, ipinasa ng mga senador ang Senate Bill No. 1155, na nag-aamiyenda sa Republic Act No. 10591 o ang “Comprehensive Firearms and Ammunition Regulation Act” na nagpapalawig sa renewal ng firearm registration mula apat na taon hanggang limang taon.
Sa ilalim ng nasabing panukala, ang pagpaparehistro ng mga baril ay gagawin kada 5-taon.
“Failure to renew the registration of the firearm on or before the date of its expiration shall cause the revocation of the license. The said firearm shall be confiscated or forfeited in favor of the government after due process,” ayon pa dito.
Kasabay nito, pinalawig ang validity ng “permit to carry firearms outside of residence” mula 1-taon ay gagawing 2-taon.
Ang Senate Bill 1155 ay iniakda ni Senador Bato Dela Rosa kung saan maliban sa pagpapalawig sa lisensya at rehistrasyo ng baril ay pinababawasan din ang requirements sa pag-a-apply nito.
Ayon kay Dela Rosa, marami ang hindi nagpaparehistro sa PNP dahil sa kumplikadong proseso na nagreresulta ng pagdami ng mga loose firearm.
GAME si Philippine Southeast Asian Games Organizing Commission (Phisgoc) chairman House Speaker Alan Peter Cayetano sa ikinakasang imbestigasyon ng Office of the Ombudsman sa hosting ng Phisgoc sa SEA Games.
“Two weeks ago, when the SEA Games was under attack by groups out to discredit the government with fake news reports of unpreparedness and corruption, I already announced that we not only welcome, but are ourselves calling for an investigation by the proper agencies at the right time to clear the air about these unfounded allegations,” ani Cayetano.
Ginawa ng House leader ang nasabing pahayag matapos bumuo si Ombudman Samuel Martirez ng 7-man panel na mag-iimbestiga sa Phisgoc lalo na sa paggamit ng pondo, tatlong araw bago matapos ang SEA Games.
“We welcome this as an opportunity to put to rest all the questions so that we may move forward in celebrating the success of our athletes and honoring the sacrifices of our workforce and volunteers,” ayon pa kay Cayetano.
Tiniyak nito na ibibigay nito at ng Phisgoc ang buong suporta sa imbestigasyon ng Office of the Ombudsman at handa umano ang mga ito na ipabulatlat ang kanilang libro.
Ngayon pa lamang ay tiniyak ni Cayetano na walang anomalya sa paggamit ng pondo subalit handa umano ang mga na makipagtulungan sa Office of the Ombudsman upang magkalinawan umano.
Inamin ni Cayetano na binalaan na siya noong una nang hingin ang kanyang tulong para sa pag-organisa sa SEAG bagay na kanyang binalewala kahit hanggang ngayon, ang mga organizer ng 2005 SEA Games ay nakikipaglaban pa sa kasong isinampa laban sa kanila.
“But I did not hesitate simply because I knew this is not about me. This is about representing the country, and I have never shied away from that. I took on the challenge just as every single volunteer took on theirs, and for the same reason – because we believe that it is about time we show the world what a unified Filipino nation is capable of doing,” ani Cayetano.
“I accepted this challenge because He called me to take it up. Not for myself, but for our athletes and for our country. And now, it is in Him that I place my trust,” dagdag pa nito.
NALOLOKA ako. Miss Universe ang pinag-uusapan ng mga bakla.
Mukhang tanggap naman agad ang ‘di pagkapanalo ng kandidata nating si Gazini Ganados sa katatapos lang na Miss Universe 2019.
Ang ikinadismaya lang ng karamihan ay ang pagkakamali nang pagtawag ng winner sa Best in National Costume na napanalunan ni Miss Malaysia.
Napalinaw nang pagkatawag ng host na si Steve Harvey na si Miss Philippines ang wagi at ang litrato pa niyang naka-eagle inspired costume na likha ni Cary Santiago ang ipinakita.
Pero ang katabi niyang winner ay si Miss Malaysia na kaagad siyang kinorek na hindi si Philippines.
Kaagad namang idinipensa ni Steve na binasa lang niya ang nasa teleprompter, na totoo naman.
“Ya’ll gotta quit doing this to me, I can read…instead now they tryin’ to fix it.
“See, this what they did to me back in 2015, played me short like that,” sabi ni Steve Harvey.
Ang linaw ng pagkakamali, pero ang dating sa karamihan ay joke lang iyun.
Mockery daw iyun na kung saan ang kandidata ng Pilipinas ang pinaglaruan.
Kaya galit na galit ang mga netizens, at kung anu-anong komento ang ipinu-post sa social media.
Kaya hindi na gaanong napag-usapan ang pagkatalo ni Gazini, kundi kung paano tayo pinaglaruan sa Miss Universe.
Ang isa pang tsismis na pinag-uusapan, sa susunod na taon ay hawak na raw ng team ng dating Governor Chavit Singson ang pagpili ng kandidata nating isasali sa Miss Universe.
Wala na nga raw sa Binibining Pilipinas Charities, Inc. ang franchise nito.
Kaya magiging Miss Philippines-Universe na ito at baka meron pa raw ibang title na paglalaban para isasali sa iba pang international beauty competitions.
Ang isa pang tsika, balak daw nilang isali uli ang kasalukuyang Binibining Pilipinas-International Patricia Magtanong dahil mas bagay daw talaga siya sa Miss Universe.
Ewan ko kung magagawa nila ito ha?
IMPRESSED ANG MGA BADING SA MINDANAO NI JUDY ANN
Napanood ng mga kabadingan ang Mindanao at sa pakikipagtsikahan nila kay direk Brillante Mendoza, natawa na lang daw ito nang hiningan siya ng reaksyon na maglalaban sila ngayon ng protégé niyang si Coco Martin sa pelikulang ididirek nila sa Metro Manila Film Festival.
May Mindanao si direk Brillante at ang Tripol Trobol naman ay dinirek ni Coco gamit ang tunay niyang pangalang si Rodel Nacianceno.
“Wala namang isyu dun.
“Ang importante, masaya lahat. Iba ang mercado niya, iba ang mercado ko,” pakli ni direk Brillante nang nakatsikahan namin sa special screening ng Mindanao sa Podium. “Ang importante, alam natin sa trabahong ito, maliit na business lang tayo. Hindi tayo puwedeng alam mo yun….hindi tayo puwedeng hindi maganda ang samahan.
“At the end of the day, pag wala na ang lahat na ito ang titingnan lang dito, ang samahan natin di ba?” dagdag niyang pahayag.
Sobrang na-overwhelm lang daw siya sa layo nang narating ni Coco na bukod sa isa siya sa pinakasikat sa ngayon ay nakakapagdirek na siya.
“Ang naisip ko lang nun na mananatili ka sa industry kasi magaling ka naman. Pero hindi ko naisip na magiging ganito siya kalaki at magdidirek siya in the future, and of course sobrang passionate eversince kahit nung nagtatrabaho siya.
“In terms of mga advice sa kanya, alam niya ang mercado niya eh, lalo na sa Ang Probinsyano. Pero pagdating sa mga project sa pelikula, nagkukuwentuhan din kami. Pero mas kilala niya yung market niya, kasi pinag-aaralan din niya yun. Hindi lang siya basta gawa nang gawa.
“Alam niya yung gusto niya. Alam niya yung mercado niya at ang kiliti ng mercado niya,” dagdag na pahayag ni direk Brillante.
Natawa uli si direk Brillante na binanggit niyang talagang ini-expect daw niyang mananalong Best Actress si Judyann Santos sa Cairo International Film Festival.
Nakaikot sa ibang international filmfests ang Mindanao na puwede pang mapanalunan ni Juday.
Pero iba ang sa Metro Manila Film Festival na sana maganda rin daw ang patanggap ng mga kababayan natin.
Hindi raw gaanong maganda ang experience niya sa unang pagsali niya MMFF na kung saan isinali niya ang Thy Womb.
Iba raw ang expectations niya rito sa Mindanao.
“Siyempre, gusto namin magka-award. Siyempre kasama yung award para tangkilikin talaga yung film namin, at hindi naman kami talaga nakipag-compete na kami ang mag-number one dito.
“Ang importante dito kahit papano, kapag mapanood natin ang paborito nating pelikula na pinapanood natin taun-taon,” saad ni direk Brillante.
Kaya ang pakiusap niya sa mga kababayan natin:
“Kung meron po tayong natitirang konting pera, kaya nga kami alternative, na sana panoorin din natin ang Mindanao na after natin mag-enjoy, siyempre mag-enjoy tayo sa first two films natin no? Kasi talagang entertainment ang gusto natin, masaya. Okay din naman itong pelikula namin.
“Ang ipinapangako natin dito, mai-entertain tayo dito and at the same time, ma-educate na rin. May matutunan din tayo kahit papano pagkalabas ng sinehan.”
LUSOT na sa Senado ang panukala para sa pagbibigay ng night shift differential pay sa mga empleyado ng pamahalaan na obligadong magtrabaho nang lagpas sa regular working hours.
Sa botong 20-0, inaprubahan sa 3rd and final reading ang Senate Bill 643 o ang panukalang pagbibigay ng night shift differential sa mga empleyado ng pamahalaan na naseserbisyo sa bayan.
Batay sa Labor Code of the Philippines, ang night differential pay ay hindi hihigit sa 10% ng regular wage sa bawat oras ng mga empleyado na pumapasok sa pagitan ng alas-10 ng gabi hanggang ala-6 ng umaga.
Gayunman, iginiit ni Senador Bong Revilla, author ng panukala na ito ay para lamang sa mga pribadong empleyado.
Alinsunod sa batas ang mga government employees, kabilang na ang mga pumapasok sa government-owned or controlled corporations, maging sila man ay permanent, contractual, temporary, o casual, ay dapat na bigyan ng night shift differential rate na hindi lalagpas sa 20% ng hourly basic rate.
Nakasaad din sa panukala na ang pondo para rito ay magmumula sa national government na ilalagay sa taunang General Appropriations Act.
“Public sector employees also deserve the benefit we give to their private counterparts,” giit ni Revilla.
UMABOT SA 11.8 degree celsius ang temperatura sa Baguio City, nitong Lunes, ayon sa Philippine Atmospheric Geophysical and Astronomical Services Administration (Pagasa).
Ayon sa Pagasa alas 6:00 ng umaga naitala ang mababang temperature.
Asahan pa na sa mga susunod na araw hanggang papalapit ang araw ng kapaskuhan ay lalamig pa ang klima.
Ang peak ng cold weather sa Baguio ay inaasahan pagsapit ng buwan ng Enero hanggang Pebrero.
Matatandaan na noong Enero 28 naitala ang 9.8 degree habang Enero. 18, 1961 naitala ang pinakamababang temperatura sa Baguio City na naitala sa 6.3 degrees.
PINAAAMYENDAHAN ng isang kongresista ang Custom Modernization and Tariff Act (CMTA) upang magkaroon ng mandatory inspection sa mga cargo sa mga containers bago umalis sa kanilang port of origin.
Sa pagdinig ng House committee on ways and means na pinamumunuan ni Albay Rep. Joey Salceda, iginiit ni Buhay party-list Rep. Lito Atienza na kailangang amyendahan ang Section 440 ng CMTA dahil ito ang isa sa mga nakikita nitong dahilan kung bakit patuloy ang smuggling activities.
“Smuggling continues unabated and as a result, hundreds of billions of pesos in revenue are lost every year. Containers filled with tons of illegal drugs and other contrabands and luxury items continue to enter our ports and many of them even enjoying the privilege of using the ‘green lanes’ to facilitate their entry,” ani Atienza.
Ginawa ng mambabatas ang pahayag matapos aminin ng Bureau of Customs (BOC) na umaabot lamang sa 20 hanggang 25% sa 12,000 containers na pumapasok sa bansa araw-araw ang kanilang naiinspeksyon.
“This means 75-80% of containers are not even opened up. So what is the basis for computing the taxes they are supposed to pay?” ani Atienza kaya dapat aniyang amyendahan ang nasabing batas upang lahat ng mga cargo sa mga container vans ay kailangang mainspeksyon muna sa kanilang port of origin bago payagang ibiyahe papunta sa Pilipinas.
Naniniwala ang mambabatas na dahil hindi naiinspeksyon ang mga container vans bago umalis sa port of origin ay nagkakaroon ng smuggling at katiwalian sa mga Custom personnels.
Maliban dito, hindi umano nakokolekta ang tamang buwis dahil hindi alam ng mga Customs personnel ang laman ng mga container vans na pumapasok araw-araw sa bansa.
“That is where corruption enters the picture. This is the biggest problem that we must address squarely. Kapag ipinatupad ang mandatory pre-shipment inspection, masisiguro na makokolekta ang tamang buwis at matitigil ang pagpasok ng ilegal drugs at iba pang kontrabando. The government’s efforts against illegal drugs will be useless if tons of shabu continue to enter our ports thru uninspected container vans, even using the green lanes,” ayon pa kay Atienza sa nasabing pagdinig.
“ALL the best” sa hinaharap para kay Miss Philippines Gazini Ganados.
Ito ang mensahe ng Malakanyang sa naging pambato ng bansa sa katatapos na Miss Universe 2019 bagama’t nasilat na masungkit ang korona.
Sa kalatas na ipinadala ni Presidential spokesperson Salvador Panelo, sinabi nitong naipakita ni Ganados sa buong mundo ang ganda at talento ng isang Filipina.
Isang bagay aniya ito na dapat ipagmalaki ng ating mga kababayan.
Ang partisipasyon ni Ganados, ani Panelo, sa nabanggit na prestihiyosong patimpalak ay dagdag na karanasan ng ating pambato ngayong taon sa Miss Universe bilang isang beauty queen.
Pumasok si Ganados sa top 20 ngunit hindi na pinalad pang makapasok sa top 10.
Hindi kasama si Ganados sa sampung kandidata na inanunsyong makaka-abante sa swimsuit at evening gown competition ng Miss Universe Pageant.
Kabilang sa nakasama sa top 10 ang mga kinatawan ng USA, Colombia, Puerto Rico, South Africa, Peru, Iceland, France, Indonesia, Thailand at Mexico.
Sa kaniyang opening speech, binanggit ni Gazados ang advocacy niya para sa mga nakatatanda.
Ayon kay Ganados, siya ay kabilang sa mga grupong nagsusulong ng pangangalaga sa nakatatanda at lumalaban sa ageism.
