July 4, 2021 - SAKSI NGAYON

MALAKANYANG IKINALUNGKOT ANG C-130 MISHAP SA SULU

July 4, 2021 jake

LABIS na ikinalungkot ng Malakanyang ang insidente ng pagbagsak ng C-130 airplane ng Philippine Air Force nitong Linggo ng tanghali sa Patikul, Sulu.

Sinabi ni Presidential spokesperson Harry Roque na nagpapatuloy ang rescue operations at nakikiisa sa pagdarasal ang Malakanyang para sa ligtas na pag-recover sa mga pasahero.

“Let us wait for the Armed Forces of the Philippines to release an update on this very unfortunate incident,” ayon kay Sec. Roque.

Sa huling ulat, nasa 31 na ang kinumpirmang nasawi sa pagbagsak ng C-130 cargo plane.

Inanunsyo ito ni Defense Secretary Delfin Lorenzana ilang oras matapos mangyari ang insidente sa Sulu.

Ayon sa updated report, 92 personnel ang sakay ng naturang eroplano, kasama rito ang tatlong piloto at limang crew member.

Ang iba pang lulan ng eroplano ng Philippine Air Force ay mula sa puwersa ng Philippine Army.

Una nang naibalita ang pag-rescue sa 40 indibidwal na sumasailalim na sa gamutan sa 11th Infantry Division Hospital sa Busbus, Sulu.

Nanggaling ang eroplano sa Lumbia Airport sa Cagayan de Oro, at ayon kay AFP chief Gen. Cirilito Sobejana, bumagsak ito matapos na malampasan ang runway.

“Na-miss niya yung runway trying to regain power, at hindi nakayanan, bumagsak dun sa may Barangay Bangkal, Patikul, Sulu,” sambit ni Sobejana. (CHRISTIAN DALE)

BEBOT NA NO. 5 MOST WANTED SA MURDER, TIMBOG

July 4, 2021 jake

INARESTO sa bisa ng arrest warrant dahil sa kasong murder ang isang 39-anyos na ginang matapos matunton sa kanyang bahay sa Port Area, Manila noong Sabado ng hapon.

Walang inirekomendang piyansa ang korte para sa suspek na kinilalang si Melissa Asjali y Santos, may asawa, ng Brgy. 650, Port Area.

Base sa ulat ni P/Edwin Fuggan na isinumite kay P/Lt. Col. Robert Domingo, station commander ng Manila Police District-Baseco Police Station 13, bandang alas-3:30 ng hapon nang arestuhin ang ginang sa bisa ng warrant of arrest na inisyu ni Hon. Albert Tenorio Jr., presiding judge sa Manila Regional Trial Court, Branch 14 dahil sa umano’y pagkakasangkot sa kasong pagpatay. (RENE CRISOSTOMO)

BAGETS KUMIKILOS NA PARA MABAKUNAHAN ANG SENIORS – DEFENSOR

July 4, 2021 jake

MISMONG ang mga bagets na ang kumikilos para mabakunahan ang mga matatanda sa kanilang pamilya at makaligtas sa nakamamatay na coronavirus disease 2019 o COVID-19.

Ito ang nabatid kay Anakalusugan Party-list Rep. Mike Defensor na naniniwalang malaki ang naitutulong ng mga kabataang ito para maproteksyunan ang mga matatanda sa kanilang pamilya laban sa COVID-19.

“Based on the feedback we obtained around Quezon City, children are doing their share to keep their older loved ones out of harm’s way,” ayon sa mambabatas, dahil mismo ang mga kabataang ito ay nagrerehistro na mga matatanda sa kanilang pamilya gamit ang internet.

“The children are the ones trying to find ways to enlist their parents, grandparents and other adult household members for immunization. They are going online and using their laptops or mobile phones to get vaccination appointments for their elders,” dagdag pa ng vice chairman ng House Committee on Children’s Welfare.

Kasabay nito, umaasa ang mambabatas na sa pamamagitan ng “word-of-mouth communication” ay mahikayat ang mas maraming tao na magpabakuna lalo na’t dumarami na aniya ang mga nababakunahan sa bansa.

Mula Marso hanggang Hunyo 27, 2021, mahigit 10 milyong COVID-19 vaccines doses na ang naibakuna. Sa bilang na ito ay 2.5 milyon ang nakakumpleto na ang 2 doses at umaasa ang mambabatas na mas marami ang mahihikayat na magpabakuna dahil sa positibong epekto ng gamot sa mga nakakumpleto na ang bakuna.

“We are counting on word-of-mouth marketing to help address vaccination hesitancy. As more Filipinos get vaccinated and casually relate their positive experience to other people, this in turn will motivate even more individuals to seek inoculation,” ani Defensor.

“People will be more receptive to vaccination once they receive good feedback from neighbors, relatives and co-workers, and once vaccination services become more accessible,” dagdag pa nito. (BERNARD TAGUINOD)

PROTOCOLS SA MGA FULLY VACCINATED INILABAS NG IATF

July 4, 2021 jake

NAGLABAS na ang Inter-Agency Task Force (IATF) ng protocols para sa fully vaccinated individuals.

Ayon kay Presidential spokesperson Harry Roque, ang mga fully vaccinated individual ay nabakunahan na ng dalawang linggo o higit dalawang linggo matapos na makatanggap ito ng second dose sa 2-dose vaccine; sa mga single dose vaccine naman ay kinakailangan na dalawang linggo o higit na dalawang linggo nang nabakunahan ang fully vaccinated individual pagkatapos niyang matanggap ang single-dose vaccine.

Pangalawa, ang fully vaccinated individual ay kinakailangang naturukan ng bakuna na nasa Emergency Use Authorization (EUA) List o Compassionate Special Permit (CSP) na ipinalabas ng Philippine Food and Drug Administration o Emergency Use Listing of the World Health Organization.

Samantala, patuloy na pinapayagan ang intrazonal movement ng fully vaccinated na senior citizens sa mga lugar na nasa ilalim ng General Community Quarantine at Modified General Community Quarantine.

Ngunit, kailangan pa rin aniyang magpakita ng mga ito ng COVID-19 domestic vaccination card na inisyu ng lehitimong vaccinating establishment, o certificate of quarantine completion na nagpapakita ng kanilang vaccination status na inisyu naman ng Bureau of Quarantine.

Sa kabilang dako, pagdating naman sa interzonal travel na pinapayagan ayon sa pertinent resolution ng IATF at probisyon ng “Omnibus Guidelines on the Implementation of Community Quarantine in the Philippines, as amended,” ang pagpapakita ng COVID-19 domestic vaccination card na nilagdaan at inisyu ng isang lehitimong vaccinating establishment, o certificate of quarantine completion na nagpapakita ng holder’s vaccination status na inisyu ng Bureau of Quarantine ay ‘sufficient alternatives” sa kahit na anomang testing requirement (before travel or upon arrival) na hinihingi ng lokal na pamahalaan.

“Uulitin ko po ha? Tama na po iyong certificate of vaccination at hindi na kinakailangang magpakita ng PCR,” ayon kay Sec. Roque.

Kung nagpositibo sa RT-PCR test o naging symptomatic ang isang indibidwal ay kinakailangan na sumunod sa testing at isolation protocols.

“Ito na po ang protocol at inaatasan ang Department of Health (DoH) at iba pang ahensya ng pamahalaan na amyendahan ang kanilang issuances ayon sa protocol na ito,” ayon kay Sec. Roque. (CHRISTIAN DALE)

TAAL EVACUEES ISASALANG SA SWAB TEST

July 4, 2021 jake

PINANGANGAMBAHANG maging superspreader ng coronavirus ang evacuation activities sa lalawigan ng Batangas bunsod ng nakaambang pagputok ng Bulkang Taal.

Sa ulat na nakarating sa National Disaster Risk Reduction Management Council (NDRRMC), dahil dito ay naghahanda ang Batangas PDRRMC na isailalim sa swab testing ang mga evacuee kung kinakailangan para matiyak na ligtas ang mga ito sa banta ng COVID-19.

Sakali umanong may magpositibo ay dadalhin ito sa mga isolation facility, at kung punuan na ang mga ito ay maaari naman dalhin ang mga COVID-19 positive sa probinsiya ng Laguna.

Ayon kay Office of Civil Defense 4A Regional Director Maria Theresa Escolano, iniiwasan nilang magkaroon ng hawahan. Kung may magpopositibo umanong evacuee ay agad na isasailalim sa lockdown ang evacuation center upang mapigilan ang pagkalat ng virus.

Samantala, dahil sa patuloy na aktibidad ng Taal Volcano na una nang inihayag ng Phivolcs na maaaring magkaroon ng malakas na pagsabog ay pinag-aaralan ng OCD Region 4A ang paglilikas na rin sa mga residenteng naninirahan sa high-risk areas sa paligid ng bulkan.

Itinaas ng Phivolcs sa alert level 3 ang estado ng bulkan dahil sa naganap na phreatomagmatic eruption noong unang araw ng buwang kasalukuyan.

Sa pagpupulong ng Batangas Provincial Disaster Risk Reduction and Management Council (PDRRMO), nabatid na nasa 948 pamilya (3,416 individuals) na ang nasa mga evacuation center; Laurel-587; Nasugbu-29; Balete- 50 families at Agoncillo, 282 na may pamilya.

Binigyang-diin pa ni Escolano ang mahigpit na pagpapatupad ng checkpoints sa mga pangunahing daan patungo sa danger zones upang maiwasan ang pagbalik ng mga residente sa kanilang bahay o ang maaaring pagpunta ng mga turista sa paligid ng Taal Lake upang mamasyal. (JESSE KABEL)

Kung walang ‘knockout punch’ sa mga korap PAGPUTAK NI PACQUIAO PANG-PRESSCON LANG

July 4, 2021 jake

(BERNARD TAGUINOD)

MISTULANG hamon kay Senador Manny Pacquiao ang pinakawalan ng ilang mambabatas sa Kamara na pangunahan ang imbestigasyon laban sa mga inaakusahan niya ng korapsyon sa pamahalaan.

Umaasa ang militanteng mambabatas na si Rep. Ferdinand Gaite na makapagde-deliver ng ‘knockout punch’ si Pacquiao sa mga corrupt official sa administrasyon ni Pangulong Rodrigo Duterte.

Ayon kay Gaite ng Bayan Muna party-list, kailangang seryosohin ni Pacquiao ang kampanya nito laban sa katiwalian sa gobyerno dahil lahat aniya ng mga tao ay nag-aabang sa resulta ng kaniyang pinasukang bakbakan.

Magugunita na bago umalis Pacquiao patungong Amerika para paghandaan ang kanyang laban sa boksing sa Agosto, isiniwalat nito ang mga katiwalian sa Department of Social Welfare and Development (DSWD) na may kinalaman sa ayuda; Department of Health (DOH) at Department of Energy (DOE).

Tugon ito ng senador sa hamon ni Pangulong Duterte na maglabas ng ebidensya ng katiwalian sa gobyerno dahil kung hindi ay ikakampanya niya umano ito na huwag iboto sa 2022 election.

“Babantayan natin ang development sa issue na ito, especially itong sa usapin ng ayuda dahil talagang napakaraming kababayan natin ang hindi talaga nakatanggap nito. Hopefully Sen. Manny can deliver the knockout punch dito sa mga inaakusahan niyang korap,” ani Gaite.

Inaabangan din umano ng Makabayan bloc kung anong aksyon ang gagawin ni Duterte sa mga opisyal ng mga nabanggit na ahensya lalo na ang DSWD base sa isiniwalat ni Pacquiao.

“Itutulak rin ba niya ang imbestigasyon sa kanyang mga tao? Susuportahan ba niya itong pagsisiwalat sa katiwalian o tututok pa rin siya sa pagbira kay Sen. Pacquiao dahil nakikita niya ito bilang isa sa posibleng kalaban ng kanyang manok sa eleksyon?,” tanong ni Gaite.

Para naman kay House committee on good government and public accountability chairman Michael Edgar Aglipay, dapat maghain si Pacquiao ng resolusyon para imbestigahan ng Senate Blue Ribbon committee ang kanyang mga alegasyon ng katiwalian sa gobyerno.

“Senator Pacquiao’s allegations against DSWD over the missing P10.4 billion pesos meant for ayuda, as well as corruption in the DOH, DOE, and DENR are a very serious matters, and should be coursed through formal channels by way of a resolution, which he should file before their own Senate blue ribbon committee under Senator Gordon,” ani Aglipay.

Ginawa ng mambabatas ang pahayag dahil sa press conference lamang isiniwalat ni Pacquiao ang kanyang alegasyon laban sa mga nabanggit na ahensya.

“We at the house have utmost respect towards Sen. Pacquiao and our other colleagues at the Senate. We honor inter parliamentary courtesy, but at the same time believe that the good Senator should file a resolution to investigate the alleged corruption,” ani Aglipay.

MOA ng DENR at construction company pinababasura LUPAIN NG TRIBONG DUMAGAT ISALBA

July 4, 2021 jake

SA bulubunduking bahagi sa hangganan ng lungsod ng Antipolo at bayan ng Baras sa lalawigan ng Rizal ay may isang construction company na inirereklamo ng mga katutubong Dumagat dahil sa umano’y pangangamkam ng kanilang ancestral domain kung saan sila nananahan daang taon na ang nakalipas.

Sa isang panayam, direktang inakusahan ng katutubong tagapamuno na si Ka Bador ang Blue Star Construction and Development Corporation ng panggigipit sa kanilang hanay gamit ang mga armadong grupong nagpapakilalang mga miyembro ng Philippine National Police at ng Philippine Army.

Aniya, pilit silang pinalalayas sa lupang sakop ng kanilang ancestral domain ng nasabing construction company gamit ang isang Memorandum of Agreement na may lagda ng dating Environment Secretary Gina Lopez.

Sa ilalim ng nasabing MOA, binibigyan ang Blue Star Construction and Development Corporation ng 2,700-ektaryang lupain na kanilang pangangalagaan.

Ani Ka Bador, nagkukubli sa imahe ng pagiging environmentalist ang nasabing kumpanya.

Sa isang pagbisita kamakailan sa Barangay Pinugay sa Baras ay tumambad ang kaawa-awang mga Dumagat na hindi na makuha pang umuwi sa kani-kanilang mga tahanan makaraan umanong bakuran ng Blue Star ang kanilang lupang tinitirhan at sinasaka bilang kabuhayan.

Bukod sa kanilang mga sakahan at tahanan, sinarhan din umano ng nasabing kompanya ang kanilang daan patungo sa kanilang sagradong pook kung saan sila nananalangin.

Sa pagsasaliksik ng SAKSI Ngayon, lumalabas na ang kabuuang lawak ng lupang nais mapasakamay ng nasabing construction firm sa hilagang bahagi ng Sierra Madre Mountain Range na sakop ng Rizal ay halos kasing laki ng lungsod ng Makati sa Kalakhang Maynila.

Bunsod nito, nagsampa ng kaso ang mga katutubong Dumagat sa Antipolo City Regional Trial Court sa hangaring patigilin ang Blue Star sa malawakang pagbabakod sa kanilang ancestral domain. Kabilang sa kanilang mga sinampahan ng kaso ay kinilalang sina Ben Dumaliang, Lilia Dumaliang, Annie Adeline Dumaliang, Billie Crystal Dumaliang, Sonia Oliveros at ilang mga opisyal ng Department of Environment and Natural Resources.

Sa ilalim ng mga umiiral na batas, ang mga katutubong nasa kani-kanilang ancestral domain ay pinoprotektahan laban sa mga mapagsamantala, lalo pa’t karamihan sa mga katutubo ay salat sa aral at pag-unawa sa mga dokumentong kadalasang gamit ng mga nagsasamantala upang sila’y itaboy.

Sa dokumentong nakalap ng SAKSI Ngayon, hiling ng mga katutubo sa husgado na ipawalang bisa ang nasabing MOA lalo pa’t wala umanong detalyadong lugar o “technical description” na tutukoy sa lugar na napapaloob sa nasabing dokumento. Wala rin itinakdang haba ng panahon.

“Salat kami sa aral pero hindi kami tanga. Nakakita na din kami ng titulo at tax declaration ng mga lupain. May mga technical description na andun para mawari ang hangganan ng sakop na lawak. Mantakin mo, wala ding nakasaad na panahon kung hanggang kailan sila pwedeng maghari-harian bilang mga panginoong maylupa sa ancestral domain namin,” ani Ka Bador.

Wala ring probisyon sa nasabing MOA na makikinabang ang gobyerno mula sa Blue Star Construction and Development Corporation na batay sa pagtatala ng mga katutubo ay kumikita ng hindi bababa sa P30 milyon kada buwan mula sa paniningil nito ng P1,800 kada ulo sa mga nagnanais magisnan ang natural limestone formation sa Bundok ng Masungi. Hindi rin pwedeng isang tao lang ang papasok sa mala-hasyendang sakop ng Blue Star. Ang itinakdang minimum – lima katao kada grupo.

“Ganoon po kaganda ang lugar namin. Kaya siguro interesadong-interesado silang sakupin ang ancestral domain namin,” dagdag pa ng lider-katutubo.

Sa pagpapatuloy na pagsasaliksik, lumalabas ding walang anomang pakinabang dito ang Antipolo City government at maging ang munisipyo ng Baras. Sa kabila ng nakalululang laki ng kitang pumapasok sa Blue Star Construction and Development Corporation, walang nakatalang buwis na pumasok sa kaban ng bayan mula nang ito’y magsimulang mag-operate taong 2017. (FERNAN ANGELES)

Para matunton ang nawawala umanong P10.4-B SAP funds DSWD DEAL SA FSPs PINALALANTAD

July 4, 2021 jake

(BERNARD TAGUINOD)

KUNG walang anomalya sa Social Amelioration Program (SAP), nararapat lamang na isapubliko ng Department of Social Welfare and Development (DSWD) ang kanilang pinasok na kasunduan sa Starpay at iba pang financial service providers (FSP).

Ito ang hamon ni Gabriela party-list Rep. Arlene Brosas sa DSWD kasunod ng alegasyon ni Sen. Manny Pacquiao na may nawawalang P10.4 Billion sa SAP funds kaya umaabot sa 1.3 million pamilya ang hindi nakatanggap ng ayuda.

Bukod dito, kinuwestiyon din ni Pacquiao at pagkuha ng DSWD sa Starpay na P62,000 lang umano ang paid-up capital gayung bilyun-bilyong piso ang ayuda na dumaan sa mga ito para ipamahagi sa beneficiaries.

“The MOA between DSWD and fintech firms must be publicized not just because of alleged missing funds, but because of the charging of transaction fees for each ayuda beneficiary which was eventually reimbursed by the DSWD based on their response during the budget deliberations,” ani Brosas.

Bukod sa StarPay, kasama rin ang GCash, Rizal Commercial Banking Corp. (RCBC), Robinsons Bank, PayMaya, Unionbank sa mga FSP na kinuha ng DSWD para sa distribusyon ng ayuda.

Duda ang mambabatas na posibleng doble ang service fees na natanggap ng FSPs dahil naningil umano ang mga ito ng P50 kada pamilya subalit may mga report na nagkaroon ng reimbursement ang DSWD nang kuwestiyunin ng publiko ang kinakaltas sa kanilang ayuda ng mga FSP.

“Kung ni-reimburse ng DSWD ang financial service providers sa kinaltas nilang transaction fees worth P50 pero hindi na-reimburse ang mga tumanggap ng ayuda, malaking iregularidad ito. Ano ba ang nakasaad sa MOA nila?” ayon pa sa mambabatas.

Sinabi ng mambabatas na mahalagang malaman ang kasunduang pinasok ng ahensya sa mga FSP dahil pera ng taumbayan ang pinag-uusapan na hindi dapat ipagwalang-bahala.

“Kailangan alamin kung ilang Pilipino ang gumamit ng fintech services para sa ayuda, ilan ang kinaltasan ng P50 transaction fees, at kung magkano ang contract payments ng DSWD sa FSPs. Kasi lumalabas, posibleng double payments ito sa Starpay at iba pa,” dagdag pa ng mambabatas.

Sakay ang 92 AFP personnel 31 PATAY SA C-130 PLANE CRASH

July 4, 2021 jake

ISA na namang air asset ng Philippine Air Force (PAF) ang nabawas nitong Linggo nang bumagsak ang isang C-130H “Hercules” transport aircraft na binili mula sa ipinagkaloob na grant ng US government sa Patikul, Sulu, pagkumpirma ni Armed Forces of the Philippines (AFP) chief, Gen. Cirilito Sobejana.

Sa inilabas na pahayag ni National Defense Secretary Delfin Lorenzana, isang C-130 aircraft ng PAF bumagsak habang sinisikap na lumapag sa Jolo airport dakong tanghali nitong Linggo.

Sa inisyal na ulat, 92 personnel ang sakay nito kabilang ang tatlong piloto at limang crew. Habang ang iba ay Army personnel na magre-report sa duty.

Ayon sa pinakahuling ulat, 31 na ang nakumpirmang namatay sa nasabing insidente habang 50 ang nasagip na mga sugatan.

Umabot naman sa 29 bangkay ng mga sundalo ang narekober sa pinangyarihan ng insidente. Nabatid na 17 pa ang ‘unaccounted’ military personnel, ayon sa manifesto.

Habang apat na sibilyan sa binagsakan ng eroplano ang sugatan din at dalawang sibilyan ang namatay.

Samantala, sa panayam kay Gen. Sobejana ng Defense Reporters, sinabi nitong nangyari ang sakuna bandang alas-11: 30 ng umaga.

“Kaninang 11: 30 a.m., one of C-130s while transporting our troops from Cagayan De Oro, na-miss niya ‘yung runway, trying to regain power, at hindi nakayanan bumagsak dun sa may Barangay Bangkal, Patikul, Sulu,” ayon sa initial information na ibinahagi ng heneral sa media.

Tumanggi munang magbigay ng detalyadong impormasyon ang opisyal dahil ongoing pa ang isinasagawang rescue operation sa military aircraft.

“Firefighting efforts are now ongoing and there was no immediate reports or details regarding fatalities and casualties,” ani Sobejana.

Inihayag nito na may 40 passengers na ang na-rescue at agad na itinakbo sa 11th Infantry Division Hospital sa bayan ng Busbus, ng lalawigan ng Sulu.

Kinumpirma rin ng Philippine Air Force ang pagbagsak ng kanilang C-130 plane.

“A C-130 aircraft of the Philippine Air Force with tail #5125 figured in a mishap upon landing in Jolo. The said aircraft took off from CJVAB (Col. Jose Villamor Air Base) papuntang Lumbia Airport at nagsakay ng kanilang mga tauhan papuntang Jolo,” ani PAF spokesperson, Lt. Col. Maynardo Mariano.

Ang bumagsak na eroplano ay isa sa dalawang C-130H aircraft na nakuha sa pamamagitan ng grant na ipinagkaloob ng US government at ginagamit bilang troop, medical evacuation, at cargo transport aircraft. (JESSE KABEL)