PAGKAMATAY NG OPISYAL IGAGANTI NG PNP

pnp1

NANGAKO si Philippine National Police (PNP) chief, Gen. Archie Francisco Gamboa na maglulunsad ng mga pag-atake laban sa mga miyembro ng New People’s Army na nakapatay kay P/Capt. Efren Espanto Jr.

“We will seek revenge, and they (rebels) should hide already because revenge will be sought by the Philippine National Police and I will be true to that word,” pahayag ni Gamboa.
Ginawa ng PNP Chief ang pangako sa kanyang pagdalaw sa labi ni Espanto sa Camp Delgado sa Iloilo City nitong Sabado.

Si Espanto, 29, tubong La Carlota City ang team leader ng Western Visayas Regional Mobile Force Reconnaissance Company na nasawi sa 15 minutong engkwentro laban sa mga NPA nitong Feb. 12 sa Aglobong Village, sa bayan ng Janiuay makaraang mapuruhan sa kanang mata.

Gayunman, sinabi ni Gamboa na ipauubaya niya kay P/BGen. Rene Pamuspusan, Director ng Police Regional Office (PRO 6) ang deployment ng mga tauhan para maging specific sa kanilang target at hindi masayang ang kanilang logistics. NICK ECHEVARRIA

Read More

KAHIT MAAGANG MAGRETIRO NARCO COPS SWAK PA RIN SA KASO

HINDI kaligtasan para sa mga pulis na isinasangkot sa droga ang pagreretiro na iniaalok ng pamunuan ng PNP.

Ito ang paniniwala ni Presidential spokesperson Salvador Panelo sa gitna ng batikos sa Pambansang Pulisya dahil sa pagtanggi na isapubliko ang listahan ng umano’y narco cops.

Taliwas naman sa naunang pahayag ni PNP Chief Gen. Archie Gamboa na hindi niya ikukonsiderang pag-amin sa kasalanan kung kakagatin ng ilang pulis ang alok na maagang pagreretiro, sinabi ni Sec.

Panelo na kung tatanggapin ang optional retirement, pag-amin ito na sangkot talaga sa ilegal na aktibidad ang isinasabit na pulis.

Kahit naman aniya magretiro nang maaga ang mga pulis ay hindi ito mangangahulugan na libre na sila sa ihahaing reklamong kriminal.

Dagdag pa ng tagapagsalita ng Pangulo na kung sadyang may ebidensiya ay tuloy pa rin naman ang asunto laban sa mga dati o bagong pulis. CHRISTIAN DALE

 

Read More

Gamboa sa ‘ninja cops’ MAGRETIRO O MAPAHIYA?

BINIGYAN kahapon ng magandang option ni Philippine National Police chief Archie Gamboa ang may 357 pulis na sinasabing sangkot sa illegal drug trade na magbitiw na lamang sa kanilang tungkulin kaysa maharap sa matinding kahihiyan.

Hinimok ni Gamboa ang mga pulis na kabilang sa narcolist ni Pangulong Rodrigo Duterte na mag-early retirement na lamang bago pasimulan  ng PNP ang adjudication at validation sa 357 pulis na kasama sa naturang listahan para malaman kung sino talaga sa mga ito ang sangkot sa ilegal na droga.

Ayon kay Gamboa, “If you don’t want to embarrass yourself, if you are guilty at sa tingin niyo eh with the composition now of those who will evaluate nakikita niyo na di kayo makakalusot, if you want peace of mind then we offer you optional retirement.”

Kumambyo naman ang opisyal na hindi mangangahulugan ng pag-amin sa kasalanan kung magreretiro nang maagaang isang pulis.

“Wala naman kayong kaso. After the evaluation… Kapag not cleared we will pursue a case against you. We will apply the full force of the law to you.”

Sinabi pa ni  Gamboa na hindi lahat ng nasa narcolist ay maituturing na otomatikong guilty dahil base lang ito sa mga report at intelligence information.

Ito aniya ang dahilan bakit kailangang sumailalim sa adjudication at validation ang mga nasa listahan.
Nabatid na may 14 pulis ang naghain na ng kanilang early retirement. JESSE KABEL

Read More

PAGPATAY NG TANDEM, DROGA TULOY PA RIN; PNP BINIRA SA PROMOSYON NG NCRPO CHIEF

MAKARAANG mamatay ng isang 8-anyos na batang lalaki sa ambush sa Maynila nitong Lunes at nabaril ang dalawang bata sa isa ring ambush nitong Martes, itinaaas pa rin ng bagong talagang hepe ng Philippine National Police (PNP) na si General Archie Francisco Gamboa, ang ranggo ni Brigadier General Debold Sinas sa major general.

Si Sinas ay ipinuwesto ni Gamboa bilang “acting director” ng National Capital Region Police Office (NCRPO) noong Oktubre ng nakalipas na taon, makaraang iangat si Lt. Gen. Guillermo Lorenzo Eleazar sa pagiging hepe ng PNP-Directorial Staff (ikaapat sa pinakamataas na opisyal ng PNP).

Ilang araw ang nakalipas, itinalaga si Eleazar bilang hepe ng PNP for Operations makaraang ipuwesto ni Pangulong Rodrigo Duterte si Gamboa bilang chief PNP.

Nitong Martes sa Camp Rafael Crame sa Quezon City, pormal at opisyal na ikinabit ni Gamboa sa balikat ni Sinas ang ikalawang estrelya ng huli upang siya ay maging Major General Debold Sinas.

Itinuloy ni Gamboa pagtataas ng ranggo kay Sinas bilang “major general” isang araw matapos ang pagkamatay ng 8-anyos na si Rhonjay Furio nitong Lunes sa San Andres, Manila.

Batay sa ulat ng Manila Police District (MPD), agad namatay si Furio nang tamaan ng ligaw na bala mula sa dalawang suspek na bumaril kay Barangay Kagawad Roberto Cudal malapit sa kanto ng Onyx at Estrada Streets sa Sta. Ana, Manila.

Pinaulanan ng bala si Cudal ng mga suspek na nakasakay sa motorsiklo. Sugatan sa insidente si Cudal.

Ayon sa ulat, namatay si Cudal nitong Enero 29 habang nilalapatan ng lunas sa ospital.

Ang isa pang nabaril na si Romeo Nicolas habang katabi ni Cudal, ay idineklarang maayos na ang kalagayan.

Batay sa imbestigasyon ng MPD, si Cudal ang target ng mga suspek na pinaniniwalaang “hired killers”.

Iniimbestigahan pa ang nasabing kaso hanggang ngayon.

Noon namang Martes, araw ng opisyal na pagdedeklarang major general na si NCRPO Director Sinas, ay dalawang bata na naman ang nadamay sa ambush sa Gen. Santos Avenue, Brgy. Upper Bicutan sa Lungsod ng Taguig.

Sa imbestigasyon ng pulisya ng Taguig, ang 5-anyos na si Crystal Zhang at ang ate nitong 12-anyos na si Hazel Zhang ay tinamaan din ng ligaw na bala nang pagbabarilin ng apat na mga suspek hanggang mamatay ang mga Chinese na sina Ninjie Zhang, alyas “Kauyu” at ang Filipino na kinilala lamang sa pangalang “Noel.”

Kumaripas ang apat na mga suspek na nakasakay sa dalawang motorsiklo  matapos isagawa ang pagpatay sa kanilang target.

Isinugod naman sa Taguig Pateros District Hospital ang mga batang nabaril.

Iniimbestigahan pa ng mga pulis-Taguig ang nasabing krimen.

Marami ang nagpahayag ng todong pagkadismaya na naging major general si NCRPO Director Sinas sa kabila ng magkasunod na ambush na ikinadamay ng mga bata.

Ayon sa ilang mapagkakatiwalaan source, si Sinas ay batid sa PNP na ‘bataan’ ni Gamboa. (NELSON S. BADILLA)

GIYERA KONTRA DROGA, ANTI-CRIMINALITY: 5 PATAY SA QC, 2 SA MAYNILA

ILLEGAL DRUGS-2LIMA ang patay sa Quezon City habang dalawa sa lungsod ng Maynila sa ikinasang giyera kontra droga at anti-criminality operation ng mga awtoridad.

Sa Quezon City, tatlong lalaking inakusahang mga holdaper ang napatay ng mga awtoridad sa ikinasang operasyon.

Batay sa ulat, bago ang engkuwentro ay hinoldap ng hindi kilalang mga suspek ang dalawang call center agent sa Obrero St., Barangay Bagumbayan pasado alas-dos ng madaling araw nitong Biyernes.

Agad namang nakapagsumbong ang mga biktima sa pulisya na nagkasa ng anti-criminality operation sa lugar.

Nang matiyempuhan ang mga suspek ay nakipaghabulan ang mga pulis hanggang sa makarating sa isang eskinita sa nabanggit na lugar kung saan nangyari ang palitan ng putok.

Napatay ang tatlong holdaper at nakuha ng mga pulis ang .45 at .38 kalibreng baril.

Patay rin ang dalawang lalaki na sinasabing nasa drug watchlist ng Drug Enforcement Group ng Quezon City Police District (QCPD) matapos makipagbarilan sa drug bust operation dakong alas-3:00 ng madaling araw nitong Biyernes.

Ayon sa report ng Police Station 6, unang nagpaputok ng baril ang hindi pinangalanang mga suspek makaraang mapag-alamang pulis ang katransaksyon sa bahagi ng Barangay Bagong Silangan.

Gumanti ng putok ang mga pulis  naging dahilan ng agarang pagkamatay ng mga suspek.

Samantala, dalawang hinihinalang tulak ng ilegal na droga ang napatay sa ikinasang buy-bust operation ng mga awtoridad sa magkahiwalay na lugar sa Sta. Cruz, Manila.

Sa ikinasang buy-bust operation sa Manila North Cemetery ay napatay ng mga pulis ang hinihinalang drug pusher na kinilalang si Benedict Galang, tinatayang 25-anyos at naninirahan sa #1801 Antonio Rivera St., Tondo.

Sa isa pang operasyon sa Sta. Cruz, Manila nitong Biyernes ng madaling araw, isa pang umano’y drug pusher ang napatay nang manlaban sa mga awtoridad.

Kinilala ang napatay sa buy-bust operation na si Leoric Salao, alyas “Jolot”,  naninirahan sa #1100 Rizal Avenue St., Sta. Cruz. (JG TUMBADO/RENE CRISOSTOMO)

SUPPLIER NG DROGA NALAMBAT SA PASIG

ARESTADO ang isang 20-anyos na high value target (HVT) at hinihinalang supplier ng ilegal na baril at droga habang nakatakas ang kanyang kasabwat, sa ikinasang operasyon ng mga tauhan ng Eastern Police District (EPD) sa Pasig City, nitong Huwebes ng gabi.

Kinilala ang nadakip na suspek na si Jam-Jam Julian, 20, residente ng Lanzones St., Sitio Kangkungan, Napico, Brgy. Manggahan sa nasabing lungsod.

Nakumpiska mula sa suspek ang tinatayang P200,000 halaga ng hinihinalang shabu.

Nakatakas naman ang kasabwat nitong si Edison Bolista, nasa hustong gulang, ng No. 67 Acacia St. sa parehong barangay, sa isinagawang operasyon ng mga tauhan ng EPD-District Special Operations Unit.

Ang pagkakadakip kay Julian ay resulta ng ilang linggong surveillance operation ng DSOU base sa natanggap na impormasyon na sangkot ang dalawang suspek sa bentahan ng ilegal na baril at shabu.

Nang magpositibo sa surveillance operation, agad nagkasa ng buy-bust operation ang hepe ng DSOU na si P/Major Darwin Guerrero, pasado alas-10:00 ng gabi sa bahay nang nakatakas na si Bolista, matapos magkasundo sa bibilihing armas mula sa mga suspek.

Aarestuhin na sana ng pulis na nagpanggap na buyer, si Julian matapos nitong iabot ang nabiling .38 caliber ngunit nakatunog ang suspek kaya tumakbo sa kanilang bahay para kunin ang kanyang baril ngunit nadakip makaraan ang habulan.

Mabilis namang tumakas si Bolista nang mapansin ang kaguluhan, sa pamamagitan ng pagdaan sa bubungan ng kanyang bahay.

Sa paghahalughog, nakumpiska ang mga awtoridad ng isa pang .9mm caliber at bala, P200,000  halaga ng shabu at mga pinatuyong dahon ng marijuana na nagkakahalaga ng P12,000.

Nabatid na si Julian ay kalalabas lamang mula sa kulungan makaraang magpiyansa sa kasong robbery sa Pasig City at may nakapending pang kaso na physical injuries. (NICK ECHEVARRIA)

 LALAKING NABITIN SA PANONOOD NG PORNOR NANAPAK MATAPOS SITAHIN NG PARAK

NAHAHARAP sa patong-patong na kaso ang isang electrician dahil sa pananapak sa isang parak na nanita sa kanyang panonood ng porno habang nasa loob ng computer shop sa Caloocan City, kamakailan.

Kinilala ng mga awtoridad ang suspek na si  Aldrin Bangayan, 30, ng #1126 Lirio St., Bo. San Jose, Brgy. 187 Tala, habang ang biktima ay kinilalang si P/Cpl. Tayron Guilot ng Manila Police District (MPD), siyang may-ari at nagbabantay ng computer shop sa #1129 Lirio St., Tala sa nabangit na lungsod.

Ayon sa ulat,  isang customer ang nagsumbong umano kay Guilot hinggil sa panonood ng porno ng suspek sa computer shop.

Agad pinuntahan ng biktima ang suspek ngunit laking gulat niya nang makitang kagat-labi at nakapikit ang mga mata ni Bangayan habang pagpaparaos sa sarili dakong alas-11:50 ng gabi.

Dahil dito, nagpakilalang pulis ang biktima at sinaway ang suspek. Gayunman, nagalit ang suspek dahil sa pagkabitin kaya sinapak ang pulis hanggang sa sila ay magpambuno.

Pagkaraan ay inaresto ng pulis ang suspek at dinala sa himpilan ng pulisya.

Ang suspek ay nahaharap sa patong-patong na kasong direct assault, disobedience and resistance at paglabag sa PD 969 o kilala bilang Immoral doctrines, Obscene Publications and Exhibitions and Indecent Shows sa piskalya ng Caloocan City. (FRANCIS SORIANO)

Read More

PNP INALERTO SA DRUG DEN NG MGA CHINESE

HINDI isinasantabi ng isang mambabatas sa mababang kapulungan ng Kongreso ang posibilidad na drug den na ang susunod na patatakbuhin ng mga Chinese national dahil sa patuloy na paglabag ng mga ito sa ating batas tulad ng pagpapatakbo ng prostitution den.

Ginawa ni ACT-CIS party-list Rep. Eric Yap ang nasabing pahayag matapos muling makahuli ang Makati Police ng prostitution den na ang mga kliyente ay mga Chinese national at nagtatrabaho sa mga Philippines Offshore Gaming Operations (POGO).

“Nananawagan tayo sa ating kapulisan at sa mga lokal na pamahalaan na mas patindihin ang pagbabantay sa mga ganitong uri ng establishments sa bansa. Hindi natin alam baka sa susunod hindi na prostitution den ang mahuli natin at baka mga drug den na,” ani Yap.

Noong nakaraang taon ay sunud-sunod ang raid na isinagawa ng mga otoridad sa mga prostitution den sa Makati City na pinatatakbo ng mga Chinese national na ang mga kliyente ay POGO workers.

“Yung panibagong kaso ng prostitution den sa Makati na ang mga kliyente ay POGO workers ay isang malinaw na patunay na wala silang takot sa umiiral na mga batas natin,” ayon sa kongresista.

Dahil dito, kailangan aniyang paigtingin ng mga otoridad ang kanilang pagbabantay sa kilos ng mga Chinese dahil kung hindi ay posibleng mas malala pa ang kanilang gagawing krimen tulad ng pagpapatakbo ng drug den.

Iminungkahi rin ng mambabatas na kung hindi titigil ang mga dayuhang ito sa paglabag sa ating batas ay hindi lamang moratorium aniya ang dapat gawin sa mga POGO kundi tuluyang itigil ang pag-iisyu ng mga bagong lisensya sa POGO operators. (BERNARD TAGUINOD)

Read More

900 PULIS SA BANSA, OBESE – PNP

NASA 900 na pulis sa bansa ang ikinukonsiderang obese o “hebigat” ang kanilang pangangatawan.

Ito ang lumabas sa datos ng pambansang pulisya, pero ayon sa tagapagsalita na si Police Brigadier General Bernard Banac, maliit na porsyento lamang ito sa kabuuan ng kanilang hanay.

Sa katunayan ani Banac, limampu’t apat na porsyento umano ng kanilang personnel ang mayroong normal na timbang.

Habang nasa tatlumpu’t anim na porsyento naman aniya ang mga overweight o lumagpas sa tamang timbang na akma para sa kanilang height o taas.

Kaugnay nito ay patuloy umano ang physical fitness program ng pambansang pulisya at mas pinaigting ang kanilang information campaign patungkol sa mga masustansyang pagkain at tamang pag-e-ehersisyo.

“Mayroon tayong programa ngayon na ating health service, ‘yung information dissemination campaign, ano ang mga tamang kinakain at ‘yung mga healty foods para maiwasan nga po talaga yung biglaang pagbigat ng mga pulis natin ng kanilang timbang,” ani Banac.

Hindi naman nabanggit ng tagapagsalita kung kasama sa listahan ng 900 obese ang Regional Director ng National Capital Region Police Office (NCRPO) na si Police Brigadier General Debold Sinas at Southern Police District (SPD) Director Brigadier General Nolasco Bathan. (JG Tumbado)

Read More

PAG-ABUSO NG PULIS SISILIPIN NG PNP

OIC GAMBOA

IIMBESTIGAHAN ng Philippine National Police ang umano’y pag-abuso ng ilan nilang tauhan na kabilang sa mga nagbigay ng seguridad sa idinaos sa Traslacion nitong Huwebes.

“All of these thing will be assessed. If there is a need to investigate then we will investigate,” pagtiyak ni PNP officer-in-charge Lt. Gen. Archie Gamboa.

Subalit nilinaw ni Gamboa na ipauubaya niya ito sa PNP-NCRPO na may kapangyarihang magpataw ng kaukulang disciplinary measures at magsumite ng kaukulang ulat sa punong himpilan.

Matatandaang inireklamo ng ilang deboto na mistula umano silang mga raliyesta kung ituring ng mga pulis dahil sa higpit ng pagbabantay ng mga ito at pagbabawal sa kanilang makalapit sa andas.

May mga nasaktan umanong deboto, may naipit, ginamitan ng pepper spray, natapakan ng mga pulis at sundalo na naka-combat boots at may TV reporter na inagawan umano ni Southern Metro Manila police chief Brig. Gen. Nolasco Bathan ng cellphone habang dinodokumento nito ang girian ng mga deboto at security forces ng gobyerno.

Dinepensahan naman ni NCRPO chief Bgen. Debold Sinas ang mga pulis at sinang-ayunan si Manila Mayor Isko Moreno na tagumpay at matiwasay ang Traslacion 2020.

At kung siya pa rin umano ang mamamahala sa susunod na Traslacion ay dadagdagan pa niya ang mga pulis at sundalong itatalaga bilang security.

Bilang pasasalamat sa mga pulis, pinag-aaralan din ni Sinas ang paggawad ng tatawaging “Traslacion pin” sa libo-libong pulis na nagbantay sa seguridad ng mga deboto at lahat ng nakilahok sa prusisyon.

Reklamo ng reporter

Isinumbong kay acting PNP chief at Interior Secretary Eduardo Año ang pang-aagaw umano ng cellphone ni P/BGen Nolasco Bathan sa isang reporter.

Tinangka pa umano ni Bathan na burahin ang recorded video footage sa cellphone ni GMA 7 Reporter Jun Veneracion na tahasang itinanggi ng opisyal.

“Bakit nabura ang video ko Sir?” tanong ni Veneracion sa opisyal. Sinagot umano siya ni Bathan na “Wala akong binura dyan, saksi ko pa ang Itim na Nazareno.”

Matapos isoli ng heneral ang cellphone sa TV reporter ay humingi rin ito ng paumanhin.

“I would like to apologize for what happened at Ayala Bridge, Manila during the Procession of the Black Nazarene 2020 wherein I confiscated the cellular phone of the media personality who was later on identified as Mr. Jun Veneracion of GMA 7 thinking that he was someone who poses threat during the procession,” sabi sa official statement na ipinalabas ng SPD sa mga mamamahayag.

Sinabi ni Dir. Bathan na nagkaroon ng komosyon sa pagitan ng mga pulis at deboto ng Black Nazarene nang kunan ng video ni Veneracion at hindi nakontrol ang pangyayari nang ipaubaya ng kapulisan ang andas sa mga deboto.

Nangako naman si DILG Sec. Año na paiimbestigahan ang pangyayari.

Habang inihayag naman ng PNP na kukunan muna nila ng pahayag ang heneral hinggil sa akusasyon para maging patas.

Samantala, dumipensa rin si P/B. Gen. Bernabe Balba, District Director ng Manila Police District sa mahigpit na crowd management sa kapistahan ng Quiapo kamakalawa.

Depensa ni Balba, kinakailangan nilang maging mahigpit sa pagtupad ng kanilang tungkulin para na rin sa kaligtasan ng lahat at upang matiyak na maiiwasan ang kaguluhan at mga di kanais-nais na pangyayari, na maaari aniyang magresulta sa mass casualty.

Paumanhin ng Palasyo

Humingi rin ng pasensiya ang Malakanyang sa mga hindi inaasahang pagkilos at ginawa ng mga pulis sa mga deboto ng Mahal na Poong Itim na Nazareno.

Ayon kay Cabinet Secretary Karlo Nograles, kung nagkaroon man ng paghihigpit sa panig ng mga pulis ay dahil kailangan ito para protektahan ang mga deboto.

At sa pagbatikos ng netizens sa ginawa ng PNP at pagturing sa mga deboto na parang mga raliyesta ay sinabi nito na “Siguro this is the first time that they did it this way then maybe next year baka pwede mag-adjust di ba?”

Natawa naman si CabSec Nograles sa pahayag na mag-paa na rin ang mga pulis sa susunod na Traslacion para walang natatapakan ng suot nilang combat shoes. (JESSE KABEL, RENE CRISOSTOMO, DAVE MEDINA at CHRISTIAN DALE)

Read More

PNP KINALAMPAG SA PAMAMASLANG SA MAGSASAKA

Rep Argel Cabatbat

NAIS ipasiguro sa pulisya ng isang mambabatas ang kapakanan at kaligtasan ng maliliit na magsasaka kasunod ng pamamaslang sa 35-anyos na si Andy Rivera sa Guimba, Nueva Ecija nitong bagong taon.

Kilala umanong mabuting residente sa kanilang barangay si Rivera na isang small time farmer at walang criminal records kaya malaking palaisipan para kay Magsasaka Party-list Rep. Argel Cabatbat kung bakit ito pinatay.

Ayon kay Rep. Cabatbat, nakaaalarma ang mga nangyayaring pagpatay sa hanay ng mga magsasaka partikular iyong maliliit na halos sa kanilang sinasaka umaasa ng ikabubuhay.

Idinagdag ng mambabatas na napapanahon na para matuldukan ang mga pagpatay kaya nararapat lamang na kumilos ang mga ahensiya ng gobyerno partikular ang Philippine National Police (PNP) at iba pang nakapaloob sa usapin ng kaligtasan at katahimikan.

Binanggit pa ni Cabatbat na ayon sa talaan mula sa Pan Asia-Pacific, isang International Human Rights Group, na ang Pilipinas ang nangunguna sa talaan ng maraming pinapatay na magsasaka at ilang land activist at nasa ikatlong taon nang hawak ng bansa ang nasabing titulo.

“After the storm and drive to poverty that the Rice Tariffication Law brought to thousands of Filipino farmers last year, many families – Andy Rivera’s included – will face another blow: the loss of a provider and a loved one,” ani Cabatbat. (CESAR BARQUILLA)

Read More

RIGODON SA PNP IPATUTUPAD

pnp12

(NI AMIHAN SABILLO)

PANIBAGONG rigodon ang mararanasan ng mga matataas na opisyal ng PNP sa katapusan ng buwan.

Ito ang inihayag ni PNP OIC PLt. Gen. Archie Francisco Gamboa kung saan ang mga pangunahing maapektuhan sa rigodon ay mga regional directors at mga hepe ng national support units ng PNP.

Ayon kay Gamboa, magiging batayan ng pananatili sa puwesto ng mga kasalukuyang nakaupo sa mga nabanggit na posisyon ay ang kanilang performance rating.

Sinabi pa nito na sa January 20 gagawin ang susunod na performance review, at mayroong isang linggo ang mga opisyal na i-apela ang kanilang rating bago ito maging pinal.

Ang mga opisyal na hindi umano maganda ang performance ay papalitan ng mga bagong opisyal upang mabigyan ang mga bagong iuupo ng pagkakataon na mapatunayan ang kanilang husay.

Iginiit ni Gamboa na nasa kanyang kapangyarihan bilang OIC na magtalaga ng mga bagong opisyal, at ang lahat ng kanyang mga ipupuwesto ay dadaan sa approval ng Napolcom at ni DILG Sec. Eduardo Año.

 

Read More