May 3, 2021 - SAKSI NGAYON

DUTERTE NABAKUNAHAN NA

May 3, 2021 jake

NAGPABAKUNA na ngayon si Pangulong Rodrigo Roa Duterte laban sa COVID-19.

Si Health Secretary Francisco Duque III ang nagbakuna kay Pangulong Duterte ng Sinopharm COVID-19 vaccine, bakunang gawa ng China.

Saksi naman si Senador Bong Go sa pagbakuna sa pangulo na 76 taong gulang na.

Sa kaliwang bahagi ng braso nagpaturok ng bakuna ang Chief Executive.

Dahil dito, matitigil na ang pagtatanong ng publiko kung kailan magpapabakuna ang pangulo na isa na ring senior citizen. (CHRISTIAN DALE)

Pagkilala kay Cito Dayrit bilang lider ng sports

May 3, 2021 jake

BAWAL magkasakit sa panahon ng pandemya, ayon sa marami.

Ang sabi ko naman, ang pumanaw sa gitna ng pandemyang dala ng COVID-19 ay isang kakilakilabot na pangyayari. Gaya ng pagpanaw ng isang manlalaro sa gitna ng basketball court, o sa ibabaw ng parisukat na lona sa MGM Grand Arena.

Kung ang pagkamatay ay kalunos-lunos sa isang 23 anyos, mas nakalulungkot sa isang 70 taong gulang.

Si Celso “Cito” Dayrit, matagal nagsilbing atleta at lider ng sports bilang Pangulo ng Philippine Olympic Committee at commissioner ng Philippine Sports Commission, ay pumanaw sa COVID noong Miyerkoles sa edad na 70.

Isang kampeon sa kanyang napiling sport na fencing, ipinagpatuloy ni Cito ang kanyang misyon na mapaunlad ang sports sa pangkalahatan hindi lamang sa Pilipinas at Asya kundi sa pandaigdigang palaro. Kinilala siya bilang nag-iisa at kauna-unahang Pinoy na sertipikadong Course Director International Olympic Committee Solidarity Itenerant Administration School for Spots Leaders, na nagdala sa kanya sa iba’t ibang sulok ng daigdig para magturo ng sports management courses.

Ang kolumnistang ito at ang SAKSI NGAYON sports ay nagpapaabot ng pakikiramay sa kanyang naiwang kabiyak na si Cindy at kanilang mga anak—Carlos Angelo, Celina Veronica, Carmelo Jerico at Cian Christopher — sa pagyao ng isang maginoong lider ng sports, mentor at disentreng tao na may malalim na pananalig sa Panginoon.

Nakilala ng kolumnistang ito si Cito bilang isang tapat na kaibigan. Bukas ang palad na sagutin ang anumang katanungan hinggil sa Olimpiyada at Olimpismo, at handang tumanggap ng suhestiyon at unawain ang sagot sa kanya mismong katanungan.

Bilang miyembro ng International Olympic family, si Dayrit ay nahalal na bise presidente ng Olympic Council Of Asia (OCA), ang asosasyon ng lahat ng National Olympic Committees sa rehiyon. Naging chair din siya ng Southeast Asian Games Executive Committee, ang grupong namamahala sa SEA Games Federation, miyembro ng International Fencing Federation, treasurer at pinakamahabang nagsilbing executive member ng Asian Fencing Confederation at Honorary Lifetime President ng Southeast Asian Fencing Federation kung saan siya naging treasurer din at Second Vice President.

Pinangunahan din ni Cito ang pagkakatatag sa National Olympic Academy of the Philippines at Philippine Olympians Association. Siya rin ang nakaisip ng POC Olympism Awards at Chef De Mission ng pambansang delegasyon sa 1988 Seoul Olympics, kung saan ang bowler na si Arieane Cerdena ay nakapag-uwi ng kauna-unahang gintong medalya sa exhibition sport ng bowling.

Bilang commissioner ng PSC, si Dayrit ang kinilalang “Ama ng Philipine National Games” na naging dahilan para siya bigyan ng Sports Leadership Award ng Philippine Sportswriters Association noong 1995.

Ang ama ni Cito na si Don Francisco ay isa sa mga itinuturing na nagsimula ng fencing sa Pilipinas, samantalang ang kanyang inang si Gng. Patrocinia “Pat” Limjuco-Dayrit ay kilala sa pagiging founder at proprietress ng Le Cordon Blue Culinary School of Manila. Napangasawa ni Cito si Cynthia David Sason.

Nagsimula si Cito sa pagiging fencer sa gulang na anim sa ilalim ni Don Paco, ang kauna-unahang Filipino fencing master na nagtatag ng noon ay tinawag na Philippine Amateur Fencers. Hindi nagtagal ay tinanghal na pambansang kampeon si Cito, na idinambana sa De La Salle Sports Hall of Fame noong 2003 dahil sa kanyang kontribusyon sa pag-unlad ng naturang sports sa Pilipinas, bukod sa pagiging isang senior bank executive at espesyalista sa credit mananagement.

SO SINADYA?

May 3, 2021 jake

ISANG political observer ang nagdududa sa China na pinagmulan ng coronavirus disease 2019.

Itinuturing na sila ngayon bilang ground zero dahil halos wala na raw COVID-19 doon sa ngayon.

Sabi niya, ang populasyon ng China ay 1.4 Billion. Ang hirap isipin kung papaano na-contain agad ng kanilang gobyerno ang virus na ito na unang sumabog sa Wuhan City.

Alam natin na matindi ang censorship sa China. Bawal magsabi ng totoo dahil sinuman ang gagawa nyan, may paglalagyan sila kaya lahat ng mga isinusubo sa atin na impormasyon ay pawang kabutihan sa kanilang bansa.

Wala pa tayong impormasyon na nabakunahan na ang 1.4 bilyon na populasyon ng China pero sabi nila ok na sila, nakabangon at lumago pa ang kanilang ekonomiya noong isang taon pa.

Pero wala tayong impormasyon na nabakunahan na ang 100% sa kanilang populasyon gamit ang Sinovac na gawa sa kanila at kung nabakunahan man nilla lahat, papaanong ligtas na sila sa virus eh 50% lang ang efficacy ng kanilang ginawang bakuna?

Ang Chile na Sinovac din ang ginamit sa kanilang populasyon ay mataas pa rin ang positivity rate ng COVID-19 dahil 50% lang ang efficacy rate nila. Kaya, oo why in the world okay na ang China? Hindi naman incolculated ang 1.4B people nila.

And even if 50% lang efficacy, so dapat madami pa ring nagpa-positive though hindi na severe. So ang tanong, man made? Iba ang vaccine nila at mas effective sya kesa sa inexport nila sa ibang bansa na mahal ang cost?.

Kaya ang tanong ng political observer “So is this sinadya so other economies will struggle??”.

May punto sya, Bakit? Tingnan mo ang ekonomiya ng mga bansa sa mundo ngayon kasama ang Pilipinas, bumagsak lahat, maliban sa mga bansang maagap na umaksyon tulad ng Israel, Vietnam at Taiwan.

Unti-unti pa lamang bumabalik ang ekonomiya ng Amerika matapos ang isang taong pagdurusa habang ang China ipinagmamalaki sa buong mundo na lumago ang kanilang ekonomiya noong nakaraang taon pa.

Dahil ang China ang may puhunan ngayon, lahat ng bansa na bagsak ang ekonomiya ay aasahan na tatakbo sa kanila para magpatulong upang sila ay makabangon sa delubyong dulot ng COVID-19.

Parang sinasadya ang lahat. Galawang mafia. Sirain mo ang mga kalaban kung saan sila mahina para ikaw ang maghahari at luluhod sa iyo at kapag nangyari yan, wala ng puwedeng kumontra sa iyo.

Dahil sa COVID-19, nailuklok ng China ang sarili sa top of the world at agawin sa US ang paghahari sa buong mundo dahil sila lang ngayon ang may magandang ekonomiya.

Mas matindi rin ito sa giyera dahil bukod sa ekonomiya ng mga bansa na bumagsak, nakapatay na rin ito ng 3.2 milyon sa buong mundo at pinaghirap ang mahigit 152 million katao sa mundo.

Buti pa raw sa giyera kahit papaano makakaganti ka sa kalaban dahil nakikita mo sila pero itong virus na unang kumalat sa China, hindi mo nakikita.

Sana may maglakas loob na mapanagot ang China dahil kung naging responsable lang sila at hindi pinayagan ang kanilang mamamayan lalo na ang mga taga-Wuhan na umalis sa kanilang bansa sa gitna ng pandemya ay hindi sana kumalat ang virus na ito sa buong mundo.

ONLINE REGISTRATION SA NATIONAL ID ‘DI MA-ACCESS?

May 3, 2021 jake

MARAMING natanggap na reklamo ang PUNA sa online registration ng National Identification ng Philippine Statistics Authority (PSA).

Nitong nakaraang Abril 30, 2021, Biyernes ay inilunsad ng PSA ang online registration para sa Philippine Identification System (PhilSys).

Marami ang sumubok dahil gusto nilang magkaroon ng national ID dahil nabubuwisit na sila na tuwing may transaksyon sila sa iba’t ibang tanggapan lalo na sa gobyerno ay dalawang government issued ID ang hinihingi sa kanila.

Buti man lang sana kung pagkapirma nila ng form ay makukuha nila agad ang kanilang ID.

Siyam-siyam ang kanilang inaabot bago sila magkaroon ng gov’t issued ID.

Tulad na lamang ng SSS ID, bago ka ma-isyuhan ay kailangan ka muna magpresenta ng authenticated birth certificate.

Balik po tayo sa National ID System, hindi po maintindihan ng mga tao kung ano ang ginawa ng gobyerno bakit hindi sila maka-access.

Kung hindi ma-access ang system, bakit nila inilunsad ito? Papogi lang ba ito?

Bakit nangyari yan PSA? Hindi nyo po ba ito pinag-aralan muna bago nyo inilunsad?

Narito ang bahagi ng paalalala ng PSA Philippine Identification System:

Alam mo bang makukuha mo ang digital National ID mo in three easy steps?

ALAMIN kung paano makapagrehistro sa Philippine System (PhilSys).

Step 1: Pagkolekta ng demographic information at appointment-setting for Step 2 gamit ang online registration portal na magbubukas ngayong Abril 2021.

Dito kukunin ang sumusunod na impormasyon:

-Name
-Sex
-Date of Birth
-Place of Birth
-Blood Type
-Address

At iba pang optional information tulad ng marital status, cell phone number at email address.

Pagkatapos mag-input ng kailangang impormasyon, maaari na ring kayong mag-set ng appointment para sa Step 2 sa registration center malapit sa inyong lugar.

Step 2: Pagkuha ng biometric information, tulad ng fingerprint, iris scan, at front-facing photograph at validation ng supporting documents.

Ang hakbang na ito ay gaganapin sa registration center na inyong pinili mula sa Step 1 registration. Huwag kalimutang dalhin ang inyong transaction number para sa hakbang na ito!

At ang Step 3: Issuance ng PhilSys Number (PSN at PhilID)

Ang inyong PSN at PhilID ay ide-deliver ng PHLPost sa inyong tahanan! Paalala lang po na huwag i-post sa social media ang inyong PhilID dahil ito ay naglalaman ng inyong personal na impormasyon.

Kung mayroon concern o tanong, maaaring sumangguni sa mga sumusunod na feedback channels:

Email:info@philsys.gov.ph

Facebook:m.me/PSAPhilSysOfficial

Hotline: 1388 (fees may apply).

Naniniwala po ang PUNA na maganda ang layunin ng gobyerno sa pagsusulong ng National ID kaya nga lang sana magkaroon sila ng information campaign kung paano makaka-access sa kanilang system.

Kung hindi nila ito gagawin ay aabutin na naman ng maraming taon bago makakuha ng National ID ang mahigit sa isang daang milyong populasyon ng Pilipinas.

Isa pang problema ang mabagal na koneksyon ng internet sa bansa.

Konting pagkakamali lang ay muli na namang uulitin ng aplikante ang kanilang pag-apply ng National ID.

Suhestiyon ng PUNA sa PSA, pag-aralan muna nilang mabuti kung paano gagawin na mas madaling ma-access ang kanilang system ng mga aplikante.

oOo

Para sa suhestiyon at reaksyon mag-email joel2amongo@yahoo.com at operarioj45@gmail.com o kaya magtext sa 0956-951-00-57.

NAPAHIYA SI “DANNY SPUTNIK”

May 3, 2021 jake

SA buong Calabarzon, hindi malaking palaisipan kung bakit hindi nakasama sa tinawag na “National Capital Region (NCR) Plus” ang Batangas at Quezon, samantalang malaki rin ang suliranin ng dalawang lalawigan hinggil sa coronavirus disease 2019 (COVID-19).

Ang nakasama lang sa NCR Plus na isinailalim sa Enhanced Community Quarantine (ECQ) at Modified ECQ (MECQ) ay Cavite, Laguna, Rizal at Bulacan hindi bahagi ng Calabarzon.

Dahil diyan, hindi nakasama sa P22.9 bilyong ayuda ang Batangas at Quezon.

Sa pangyayaring ito, napansin ng media ang dobleng dagok na tumama sa Quezon kung saan mga residente ang higit na kawawa sa COVID-19, lalo pa’t hindi totoong dumating ang bakunang Sputnik V ng Rusya.

Dahil dito, isinilang ang kyut na pangalang “Danny Sputnik”.

Nakarating sa mga journalist sa NCR ang pangalang Danny Sputnik.

Alam ba ninyo kung sino ito?

Ito ay walang iba kundi si Gobernador Danilo “Danny Suarez” ng Quezon.

Ayon sa impormasyong ipinabatid sa mga journalist, mga residente ng Quezon ang nagbansag sa beteranong pulitiko ng Danny Sputnik.

Pokaragat na ‘yan!

Malaki na nga ang problema ng mahigit dalawang milyong residente ng Quezon sa buhay at pananalasa ng COVID-19 sa naturang lalawigan, nagawa pang magpakawala ng mga residente ng bagong bansag kay gobernador na Danny Sputnik.

Biruin n’yo, nakaisip agad sila ng ibabansag kay Gobernador Suarez na DS din kapag pinaiksi.

Tamang-tama, malapit na ang eleksyon.

Nagsimula umanong tawaging Danny Sputnik si gobernador makaraang ipangalandakan nito sa “Report to the Nation” ng National Press Club (NPC) noong Abril 23 na nakakuha raw ng bakunang Sputnik V ang kanyang administrasyon.

Samakatuwid, ang punto niya ay malulutas na ang napakasahol na suliranin ng Quezon sa COVID-19.

Maraming taga-Quezon ang nakapanood sa Facebook sa pagpapaliwanag ni Governor Suarez sa press forum ng NPC sa pangunguna ng mga beteranong Kolumnistang sina Paul Gutierrez at Joey Venancio.

Basahin po ninyo ang pahayag na ito: “April 14, dumating na yung Sputnik namin galing Russia. On that line, Sinovac 5,545, AstraZeneca 871. Sputnik wala yung numero pero nasa amin na. I reconfirmed it with our provincial head. Gamaleya Sputnik ang pangalan. Ang balita ko kasi rito sa Sputnik hindi isinama sa region nandun lahat accept Quezon. Kaya nga tinawagan ko si Secretary Francis Duque. Alam mo naman matagal ko ng kaibigan yun, I called him the other day sabi ko Francis ba’t wala akong Sputnik?”, pagmamalaking sinabi ni Suarez sa NPC press briefing.

Hindi binanggit ni Suarez kung ilang dosis ng Sputnik V vaccines ang nakuha ng Quezon at kung may pasilidad sila para sa storage requirement para sa nasabing bakuna.

Dito nagsimulang bansagang “Danny Sputnik” si Danny Suarez ng mga residente ng Quezon.

Pokaragat na ‘yan!

Ang kyut ninyong mag-isip!

Aba teka lang, di ba’t ito ‘yung kalaban ng OXO, Commando at Batang City Jail?
Hehehehe.

“Maliban na lamang kung magpapakita siya ng pruweba na nakakuha na nga ng Russian-made vaccine Sputnik V ang Quezon.

Kung hindi pa, ay naku, palpak ang diskarteng ito dahil binibigyan nya lang ng kawalang-pag-asa ang mga taga-Quezon sa gitna ng paglobo ng COVID-19.”

Ito ang nag-aalimpuyo sa galit na tanong ng Quezon Rise Movement (QRM), isang bagong tatag na civil society movement na sumisigaw ng pagbabago sa lalawigan.

Hindi kaya ulyanin na itong si Gobernador Suarez?

Base sa pahayag ni Pangulong Duterte: “I will direct the secretary of the Department of the Interior and Local Government (DILG) to hold the local government officials responsible for this kind of events happening in their places. It is a violation of the law and if you do not enforce the law, there is dereliction of duty which is punishable under the Revised Penal Code.”

Isa kasi ang Quezon sa mga LGUs na pinakamakupad at matamlay ang pagtugon sa COVID-19, na may 2.9 percent lamang ang vaccination rate.

Sa mahigit 2 milyong populasyon ng lalawigan, nasa 14,000 ng mga residente rito ang nabakunahan na, pinakamababa sa LGUs na nakatanggap ng bakuna sa buong bansa.

Obligadong mag-isip si Gobernador Suarez nang mabuti upang hindi mali-mali ang kanyang pahayag sa media.

Bwelta kina Carpio at Del Rosario PINOY NILALAGAY SA PANGANIB SA WPS

May 3, 2021 jake

DAPAT nang itigil nina Retired Supreme Court Associate Justice Antonio Carpio at dating Foreign Secretary Albert del Rosario ang ginagawa ng mga itong panlilihis at paglalagay sa panganib sa mga Filipino gamit ang kanilang “illegal” statements ukol sa West Philippine Sea (WPS).

Ang pahayag na ito ni Presidential Spokesperson Harry Roque ay tugon sa patuloy na pambabatikos nina Carpio at del Rosario sa maingat at kontroladong pagtugon ni Pangulong Rodrigo Roa Duterte sa usapin ng WPS.

Hindi naman kaila sa lahat na kinikilala ng pangulo ang ‘territorial and maritime claims’ at karapatan sa WPS subalit binigyang diin nito na ang pag-angkin at karapatan ng bansa ay pinagtatalunan din ng ibang mga estado.

Tinukoy ang international law, sinabi ni Sec. Roque na ang Pilipinas ay kinakailangan i-promote ang ‘claims and entitlements’ nito at maging pamahalaan at lutasin ang pagtatalo sa pamamagitan ng “peaceful and legal means”.

“All of these means start and end with negotiation. Even when countries implement decisions under UNCLOS [United Nations Convention for the Law of the Sea], they must negotiate,” ani Sec. Roque.

Giit ni Sec. Roque na ito ang dahilan kung bakit nagdesisyon ang pangulo na ipatupad ang “careful, calculated, calibrated” policies sa WPS sa pamamagitan ng consistent na paggigiit ng ‘claims and entitlements’ nito sa bilateral talks sa China t sa multilateral fora gaya ng United Nations. (CHRISTIAN DALE)

Hamon ng solon sa FDA-DOH KONEKSYON SA BIG PHARMAS ILANTAD

May 3, 2021 jake

HINAMON ni Deputy Speaker Rodante ang mga health official lalo na ang mga nasa Food and Drug Administration (FDA) at Department of Health (DOH) na ilantad kung sino sa mga ito ang may koneksyon sa malalaking pharmaceutical companies para magkaalaman na.

“Why shouldn’t FDA and DOH officials undertake disclosures for the public to see who among them have links with Big Pharma (Merk, Pfizer, Biocore, etc) i.e., funding of projects, trips/studies sponsored, research grants and the like,” ani Marcoleta.

“Going after the doctors is like killing the messengers,” ani Marcoleta.

Pahayag ito ng mambabatas sa gitna ng tila panggigipit umano ng nasabing mga ahensya sa mga doktor na nagreseta ng Ivermectin sa “community pan-three” project sa Matandang Balara, Quezon City noong nakaraang linggo.

Ang nasabing proyekto ay inisyatiba nina Anakalusugan party-list Rep. Mike Defensor at Marcoleta upang matulungan ang mga residente ng Quezon City ngayong ang nasabing lungsod ay may mataas na COVID-19 infection sa buong Metro Manila at marami ang namamatay.

Nauna nang sinabi ng FDA at DOH na kanilang paiimbestigahan sa Professional Regulation Commission (PRC) sina Drs. Allan Ladrito, Iggy Agbayani, Noel Castillo at Sham Quinto sa kanilang pagrereseta ng Ivermectin sa Community Pan-Three.

“It’s about helping people at the time when the very people tasked to do it are hesitating and dillydallying, when the time to act fast and decisively is wasted by complacency and indecision, when they refuse to improvise and be flexible and chose to stick to peacetime guidelines that do not apply in a war-like pandemic that we are all in,” ani Marcoleta sa pagtulong ng mga nabanggit na doctor sa kanilang proyekto.

Dahil dito, hindi makatarungan na imbetigahan at plano pang parusahan aniya ang mga nabanggit na doctor gayung nais lang ng mga ito na matulungan ang mamamayang Filipino na nahihirapan na sa pandemya at patuloy na nanganganib sa COVID-19 dahil wala silang proteksyon.

Hindi aniya ito gagawin ng mga nabanggit na doctor kung wala silang hawak na pruweba na mabisa ang Ivermectin laban sa COVID-19 at marami na umanong pag-aaral na ginawa sa ibang bansa subalit ayaw kilalanin ng FDA at DOH dahil mas pabor ang mga ito sa mas mahal na gamot tulad na Remdesivir bagaman hindi ito aprubado ng Wold Health Organization (WHO). (BERNARD TAGUINOD)

Bayanihan 3 umusad na sa Kamara P2K NA LANG AYUDA KADA PINOY

May 3, 2021 jake

(BERNARD TAGUINOD)

INAPRUBAHAN na sa committee level sa mababang kapulungan ng Kongreso ang Bayanihan 3 at inaasahang pagtitibayin ito sa plenaryo pagbalik ng mga mambabatas sa kanilang regular session sa Mayo 17.

Hindi nangailangan ng mahabang oras ang House committee on social services na pinamumunuan ni Rep. Alfred Vargas at committee on economic affairs ni Aklan Rep. Teodorico Haresco Jr., para aprubahan ang iba’t ibang panukalang batas na nagtutulak ng Bayanihan 3 o Bayanihan to Arise as One Act.

“With the Bayanihan 3 approved at committee level, and with the full backing of the House members, I am very optimistic, as chair of the House Social Services Committee, that we will be able to extend to our people the economic and social support that they urgently need during this period of uncertainty,” ani Vargas matapos aprubahan ang nasabing panukala.

Ayon kay Vargas, makatatanggap ng P2,000 ang bawat Filipino sa ilalim ng nasabing panukala kung saan ang P1,000 ay ibibigay sa unang buwan ng implementasyon ng ikatlong ayuda at panibagong P1,000 matapos ang dalawang buwan.

Taliwas ito sa Bayanihan 1 at 2 kung saan P8,000 ang ibinigay na ayuda sa bawat pamilya sa Metro Manila at naglalaro naman sa P5,000 hanggang P6,500 sa ibang lugar kung saan 18 million pamilya ang beneficiaries.

May kabuuang P405.6 billion ang pondo ng Bayanihan 3 kung saan P216 billion dito ay gagamitin sa ayuda o financial at social amelioration, P30 billion para sa wage subsidies, P25 billion sa Assistance to Displaced/Disadvantaged Workers ng DOLE, P30 billion sa Agri-fishery sector at P9 billion para sa Medical Assistance for Indigent Patients (MAIP).

“We also allocate P54.6 billion for the Pension and Gratuity Fund of Military Uniformed Personnel, and P5.6 billion for the information technology needs of the Department of Education,” ani Vargas.

Kukunin umano ang pera para rito sa sobrang pondo ng mga government-owned and controlled corporations (GOCCs), Philippine Offshore and Gaming Corporation (POGO), E-sabong at buwis na ipatutupad ng gobyerno.

ESPERON IGNORANTE SA WPS – MATULA

May 3, 2021 jake

BINATIKOS ng Federation of Free Workers (FFW) ang maling impormasyon ni Secretary Hermogenes Esperon Jr. hinggil sa West Philippine Sea (WPS) na pumabor sa China.

Ayon sa pangulo nitong si Atty. Jose Sonny Matula, malaking panlilinlang ang pahayag ng national security adviser na si Esperon na hindi kailanman pinahintulutan ng administrasyong Duterte na bakuran ng China ang ilang islang parte ng Pilipinas.

Ani Matula, malinaw ang impormasyon ng alkalde ng Pag-asa Island na nakuha na ng China ang Sandy Clay Island dahil nabakuran na ito.

Isinusog pa ni Matula, pinatunayan ni Esperon na ignorante ito sa totoong nagaganap sa WPS.

Binanatan ng FFW si Esperon dahil hindi matanggap ng isa sa mga malaking pederasyon ng unyon sa Pilipinas na kontra-mangingisda ang mga patakaran at pahayag ng sinomang opisyal ng pamahalaan, kabilang na si Esperon.

Ayon kay Matula na pangulo rin ng NAGKAISA Labor Coalition, maging ang NAGKAISA ay lampas-ulo ng tao ang pagkampi at pagsuporta sa mga mangingisdang Filipino.

“Hindi lang isinuko ang West Philippine Sea sa China, kundi ang karapatan ng mga mangingisda sa kanilang kabuhayan. Sa halip na pumosisyon para sa demilitarisasyon ng rehiyon, ang pivot to China policy ni [Pangulong Rodrigo] Duterte ay nag-imbita lamang lalo ng higit na militarisasyon ng WPS mula sa mga [bansang] superpower na wala sa anomang interes ng bansa, ng uring manggagawa at ng kapayapaan [ng Pilipinas],” banat ng NAGKAISA nitong Mayo 1, pandaigdigang araw ng mga manggagawa.

Tiniyak ni Matula na hindi pababayaan ng NAGKAISA at ng FFW ang mga mangingisdang Filipino sa laban ukol sa WPS. (NELSON S. BADILLA)