NATAPOS na ang official leave ni DOJ Undersecretary Jojo Cadiz, na sinasabing tumayong “bagman” umano ni Pangulong Ferdinand Marcos Jr. sa isyu ng ghost projects at flood control kickbacks, ayon sa rebelasyon ni dating Congressman Zaldy Co.

Sa inilabas na video sa social media, ibinunyag ni Co na personal pa niyang iniabot ang P200 milyon kay Cadiz noong December 2, 2024 sa number 30 Tamarind Street, South Forbes Park, para raw dalhin sa bahay ni Pangulong Bongbong Marcos sa number 41 South Forbes Park.

Kasama si Cadiz sa mga idinawit ni Co sa umano’y kickback scheme sa flood control projects.

Ayon kay Acting Justice Secretary Frederick Vida, hindi DOJ ang pwedeng mag-imbestiga kay Cadiz dahil wala raw silang hurisdiksyon dito.

“Ombudsman po ang dapat tumingin sa kaso,” giit ni Vida.

Kinumpirma rin ni Vida na tapos na ang isang linggong official leave ni Cadiz na nagsimula noong November 21. Hindi naman tinukoy ng DOJ ang dahilan ng bakasyon pero tiniyak ng opisina na nasa Pilipinas lang ang opisyal at walang travel request para mag-abroad kaya hindi raw ito nagtatago.

(JULIET PACOT)