PUNTO DE BISTA ni BAMBI PURISIMA

NITONG nakaraang linggo ay pinangunahan ni Manila Mayor Francisco “Isko” Moreno Domagoso ang groundbreaking ng Binondominium 2, nangakong tuloy-tuloy ang pabahay para sa maralitang taga-Maynila

Ang groundbreaking ceremony ay pinangunahan ni Yorme Isko last Feb. 24 para sa Binondominium 2 sa San Nicolas, na siyang ikaanim na vertical housing project ng lungsod sa ilalim ng kanyang pamumuno.

Itatayo ang bagong gusali sa 405-square-meter na lote na may kabuuang floor area na 6,277.5 metro kuwadrado. Magkakaroon ito ng 98 residential units na may sukat na tig-40 metro kuwadrado bawat isa. Bawat unit ay may dalawang silid-tulugan, palikuran at banyo, kusina, dining area, at sala.

Maglalaman din ang gusali ng dalawang elevator, isang opisina, daycare center, multi-purpose hall, roof deck, at iba pang pangunahing pasilidad na tutugon sa pang-araw-araw na pangangailangan ng mga benepisyaryong pamilya.

Sa kanyang talumpati, ibinahagi ni Domagoso ang kanyang kabataan sa Tondo at ang sunod-sunod na relokasyong pinagdaanan ng kanilang pamilya dahil sa kahirapan at demolisyon, at sinabing personal sa kanya ang proyektong ito.

Ikinuwento ng alkalde kung paano sila napalayas sa inuupahang bahay nang hindi na nila kayang bayaran ang renta.

“Ang mahirap sa pagiging iskwater, galing ka sa eskwelahan pag-uwi mo, hindi ka sigurado kung ‘yung bahay mo nakatusok pa,” aniya.

Ipinaalala rin ni Domagoso ang kanyang pangakong pabahay noong 2019 campaign, at sinabing bagama’t naantala ng pandemya ang ilang bahagi ng plano, hindi nito napigilan ang pagpapatayo ng unang gusali.

Binigyang-diin din ng alkalde ang kahalagahan ng paglalaan ng lungsod ng daan-daang milyong piso para sa pampublikong pabahay.

Binigyang-banggit niya ang pahayag ni dating Pangulong Ramon Magsaysay: “Those who have less in life must have more in law.”

Hinimok ng alkalde ang mga magiging benepisyaryo na pangalagaan ang gusali kapag ito ay natapos na, at iginiit na ang maayos na pabahay ay dapat samahan ng disiplina at pananagutan sa komunidad.

Tiniyak din ni Domagoso na magpapatuloy ang pakikipagtulungan ng pamahalaang lungsod sa pambansang pamahalaan sa malalaking proyekto, kabilang ang pagtatayo ng bagong gusali para sa Allied Health Sciences ng Pamantasan ng Lungsod ng Maynila at ang planong pagbili ng lupa para sa isang bagong ospital sa Tondo.

“Ang Maynila ay mananatiling mamumuhunan sa MBN: Minimum Basic Needs—housing, education, healthcare, and jobs,” aniya. “Ang gobyerno ay kayang pataasin ang antas ng pamumuhay ng kanyang mamamayan.”

***

Pinagtitibay ng Bureau of Customs (BOC) ang koordinasyon sa pagitan ng pamahalaan at pribadong sektor upang mapanatili ang episyenteng operasyon sa mga pangunahing pantalan ng bansa.

Sa pangunguna ni Customs Commissioner Ariel F. Nepomuceno, nagsagawa ng pulong ang BOC kasama ang mga pangunahing ahensya ng gobyerno at mga lider ng industriya upang pag-isahin ang mga estratehiya at tiyakin ang tuloy-tuloy at maayos na daloy ng kargamento sa Manila International Container Port (MICP) at Port of Manila (POM).

Dumalo sa pulong ang mga opisyal ng Assessment and Operations Coordinating Group (AOCG), kabilang si Deputy Commissioner Atty. Agaton Teodoro O. Uvero, pati ang mga District Collector ng MICP at POM. Nakiisa rin ang mga kinatawan ng malalaking port operator at maritime stakeholders gaya ng International Container Terminal Services, Inc. (ICTSI), Maritime Industry Authority (MARINA), Association of International Shipping Lines, Inc. (AISL), Asian Terminals Inc. (ATI), Philippine Ports Authority (PPA), at Alliance of Container Yard Operators of the Philippines (ACYOP).

Ayon kay Nepomuceno, layunin ng pagpupulong na masiguro ang maagang koordinasyon, sama-samang pagpaplano, at paggamit ng praktikal at batay sa datos na solusyon upang masuportahan ang parehong tungkulin ng gobyerno at operasyon ng industriya. Binigyang-diin niya ang kahalagahan ng tuloy-tuloy na dayalogo, lalo na sa panahon ng dagsa ng kargamento, upang agad matugunan ang anumang posibleng pagsisikip sa operasyon.

Tinalakay sa pulong ang pagpapalakas ng planning at forecasting mechanisms, paghahanda sa iba’t ibang operational scenarios, at pagpapabilis ng customs processes gaya ng pagpapatupad ng dwell time rule at cargo release procedures. Inilahad din ng mga District Collector ang kasalukuyang yard utilization sa POM at MICP upang mabigyan ang mga stakeholder ng malinaw na larawan ng sitwasyon sa pantalan.

Iminungkahi rin ng Komisyoner ang regular na coordination meetings upang maagap na matukoy ang mga umuusbong na isyu at agad na makapaglatag ng solusyon. Aniya, ang episyenteng operasyon ng pantalan ay hindi lamang responsibilidad ng BOC kundi ng lahat ng sektor na sangkot dito—kailangan ang mahigpit na ugnayan, transparency, at mabilis na aksyon.

Nagpahayag naman ng suporta ang mga lider ng industriya at tiniyak ang kanilang pakikipagtulungan sa BOC at iba pang ahensya. Binigyang-diin nila ang kahalagahan ng tuloy-tuloy na komunikasyon at palitan ng datos upang mapanatiling maayos ang galaw ng kargamento, lalo na tuwing peak season.

Ayon ang mga hakbang na ito sa bisyon ni Pangulong Ferdinand R. Marcos Jr., na gawing mas moderno ang serbisyo ng pamahalaan, palakasin ang koordinasyon ng mga ahensya, at isulong ang mas madaling pagnenegosyo. Sa huli, layunin ng BOC na mapanatili ang episyenteng kalakalan, mapalago ang ekonomiya, at makapaghatid ng mabilis at epektibong serbisyo publiko.

***

Para sa inyong mga suhestyon, reaksyon at opinyon, sumulat o magmensahe sa bampurisima@yahoo.com.