INATASAN ng Department of Justice (DOJ) ang tatlong magkakapatid na babae na sangkot sa pamamahala ng isang matagal nang educational publishing house sa Pilipinas na sagutin ang kinahaharap nilang kasong kriminal na syndicated estafa at umano’y pandaraya sa Securities and Exchange Commission (SEC).
Sa subpoena na inilabas noong Marso 19, 2026, iniutos ni Senior Assistant City Prosecutor Joselito C. Bacolor ng Quezon City Office of the City Prosecutor kay Nila Vibal Mata at sa kanyang mga kapwa respondent na magsumite ng kanilang counter-affidavits sa Abril 16 at Abril 30, 2026.
Kaugnay ito ng reklamong syndicated estafa na inihain ng Vibal Group, Inc. chief executive officer na si Maria Kristine E. Mandigma.
Ayon sa DOJ, hindi tatanggapin ang anomang mosyon para ibasura ang kaso mula sa mga respondent, at ang hindi pagsusumite ng counter-affidavit ay ituturing na pagtalikod sa kanilang karapatang magsumite ng ebidensya.
Si Mata, kasama ang kanyang mga kapatid na sina Aida Vibal Gutierrez at Stella Vibal Lawson, ay mga direktor at shareholder ng Vibal Group, pati na ng mga kaakibat nitong kumpanya na LG&M Corporation at SD Publications, Inc.
Hawak ng tatlong magkakapatid ang mayoryang bahagi ng shares sa publishing group na nakabase sa Quezon City, na ang mga aklat ay ginagamit sa mga paaralan sa bansa sa loob ng mahigit pitong dekada.
Sa complaint-affidavit na inihain sa Quezon City Office of the City Prosecutor, kinasuhan ni Mandigma ang tatlong magkakapatid kasama ang 11 iba pang respondent—kabilang ang dating finance officers at accounting staff—ng kabuuang 458 bilang ng syndicated estafa at obstruction of justice.
Inihain ang reklamo noong Pebrero 26, 2026.
Naantala ang paglabas ng subpoena ng ilang linggo dahil sumailalim ang reklamo sa Case Build-Up (CBU) process ng DOJ.
Sa ilalim ng prosesong ito, nagsasagawa ang panel ng mga piskal ng paunang pagsusuri upang matukoy kung may sapat na ebidensya at batayan ang kaso bago isailalim sa pormal na preliminary investigation.
Karaniwang ginagamit ang CBU process sa mga komplikado o mabibigat na kaso, kabilang ang syndicated estafa—isang krimeng may parusang habambuhay na pagkakakulong at hindi maaaring piyansahan.
(JULIET PACOT)
102 
