At Your Service Ni Ka Francis

BAWAT State of the Nation Address (SONA) ay itinuturing na pinakamahalagang talumpati ng Pangulo sa buong taon. Dito inilalahad ang kalagayan ng bansa, mga nagawa ng administrasyon, at direksiyong tatahakin sa mga susunod na buwan. Ngunit sa pagkakataong ito, malinaw ang mensahe ng maraming Pilipino—hindi na sapat ang listahan ng mga nagawa; ang hinahanap nila ay kongkretong solusyon sa araw-araw nilang pinagdaraanan.

Ayon sa survey ng EON, halos kalahati ng mga respondent ang mas gustong marinig ang mga konkretong hakbang ng pamahalaan upang resolbahin ang mga suliranin ng bansa. Samantala, maliit na bahagi lamang ang interesado sa mga accomplishment report ng administrasyon. Ipinakikita nito na ang tunay na sukatan ng pamahalaan ay hindi lamang kung ano ang naipatayo o nailunsad, kundi kung paano nito napagaan ang buhay ng ordinaryong mamamayan.

Hindi nakapagtataka ang ganitong resulta. Hanggang ngayon ay ramdam pa rin ng mga Pilipino ang mataas na presyo ng mga bilihin. Ang dating sapat na badyet ng isang pamilya ay mabilis nang nauubos sa pagkain, pamasahe, kuryente, tubig, at iba pang pangunahing pangangailangan. Kaya naman ang usapin ng inflation at cost of living ang isa sa pinakamalaking alalahanin ng publiko.

Kasunod nito ang panawagan laban sa korupsyon. Matagal nang sugat ng bansa ang katiwalian sa gobyerno. Kapag may mga balitang may nawawalang pondo, maanomalyang proyekto, o hindi malinaw na paggasta, nawawala rin ang tiwala ng taumbayan. Hindi sapat ang pangakong magiging malinis ang pamahalaan; kailangan itong patunayan sa pamamagitan ng mahigpit na pagpapatupad ng batas at pananagutan ng mga nagkakasala.

Malinaw rin ang mensahe ng publiko hinggil sa mga naunang pangako ng administrasyon. Marami ang naghihintay ng update kung nasaan na ang mga ipinangakong proyekto at reporma. Ang pananagutan ay hindi lamang tungkol sa paggawa ng bagong pangako kundi sa pagtupad sa mga nauna nang ipinahayag sa sambayanan.

Hindi rin dapat balewalain ang usapin ng trabaho at sahod. Marami mang Pilipino ang may hanapbuhay, hindi naman lahat ay kumikita ng sapat upang matugunan ang pangangailangan ng kanilang pamilya. Habang tumataas ang presyo ng mga bilihin, nananatiling hamon ang pagkakaroon ng disenteng kita. Kaya mahalaga ang mga programang lilikha ng mas maraming trabaho at magpapalakas sa ekonomiya.

Kasama rin sa inaasahang matalakay ang edukasyon, agrikultura, kalusugan, at seguridad sa pagkain. Ang mga ito ay pundasyon ng pangmatagalang pag-unlad ng bansa. Kung mahina ang suporta sa mga sektor na ito, mahihirapang makaahon ang Pilipinas sa mga hamong kinakaharap nito. Hindi sapat ang magagandang plano kung kulang naman sa maayos na implementasyon.

Kapansin-pansin din na mababa lamang ang porsyento ng mga naniniwalang matutupad ang mga pangakong ilalahad sa SONA. Isa itong malinaw na indikasyon ng kakulangan ng tiwala ng publiko. Ang tiwala ay hindi nakukuha sa magagandang talumpati kundi sa mga konkretong resulta na nararamdaman ng bawat Pilipino sa kanilang pang-araw-araw na pamumuhay.

Sa huli, ang SONA ay hindi dapat maging entablado lamang ng papuri at pagbabalik-tanaw. Mas mahalaga itong magsilbing pagkakataon upang ipakita ng pamahalaan na nauunawaan nito ang tunay na kalagayan ng mamamayan. Ang bawat pangako ay kailangang may malinaw na direksyon, tiyak na plano, at konkretong paraan ng pagpapatupad.

Ang tunay na tagumpay ng anomang administrasyon ay hindi nasusukat sa haba ng listahan ng mga proyekto o sa dami ng palakpak pagkatapos ng talumpati. Mas mahalaga kung ang bawat Pilipino ay may murang pagkain sa hapag, sapat na trabaho, maayos na edukasyon, ligtas na pamayanan, at gobyernong may pananagutan. Iyan ang SONA na tunay na hinihintay ng sambayanan—isang ulat na hindi lamang nagsasalita tungkol sa nakaraan, kundi nagbibigay ng pag-asa at malinaw na solusyon para sa kinabukasan.

oOo

Para sa inyong katanungan, maaari po kayong mag-text sa cell# 0917-861-0106.