TATLO katao ang sugatan, kabilang ang 15-anyos na dalagita, makaraang pagbabarilin ng isang lalaki habang umano’y tumotoma at bumabatak ng ilegal na droga ang mga biktima sa Malabon City kahapon ng madaling araw.

Kinilala ang isa sa mga biktimang isinugod sa Tondo Medical Center, na si Jonathan Bacud, nasa hustong gulang, residente ng Block 10, Lot 9, Magsaysay St., Brgy. San Agustin ng nasabing lungsod.

Habang nakatakas ang suspek na kinilalang si Jerry Fabia, 47, ng Magsaysay St., Brgy. San Andres.

Ayon sa pulisya, tumotoma at bumabatak ang mga biktima sa ikalawang palapag ng bahay ni Bacud dakong ala-1:45 ng madaling araw nang biglang pumasok ang suspek at sila ay pinaputukan.

Bagama’t pawang sugatan ay nakatakbo ang mga biktima. Gayunman, hinabol ni Fabia si Bacud na nagtago sa bahay ng kanyang kapatid.

Bunsod nito, nagpasyang tumakas na lamang ang nasabing suspek. (ALAIN AJERO)