SIMULA na ngayon ng Asian-Oceanian Olympic Qualifying meet sa Prince Hamzah Hall sa Amman, Jordan kung saan 221 male at female boxers mula sa 35 mga bansa ang maglalaban-laban.
Pito lamang ang pambato ng Pilipinas, apat na lalaki sa pangunguna ni World middleweight silver medalist Eumir Felix Marcial, at tatlong babae kabilang si World featherweight gold medalist Nesthy Petecio.
Kapwa seeded number 1 sina Petecio at Marcial sa kanilang mga kategorya.
Ang iba pang hopefuls ay sina flyweight Carlo Paalam (52kg.), featherweight Ian Clark Bautista (57 kg.), light welterweight James Palicte (63 kg.), at female boxers Irish Magno (51 kg, fly) at Riza Pasuit (60 kg., lightweight).
Si Bautista ang unang Filipino na nakatakdang lumaban sa opening day kontra kay Hayato Tsutsumi ng Japan.
May laban din si Pasuit sa opening day kontra sa isa pang Japanese na si Saya Hamamoto.
Kinabukasan ay sasabak naman si Petecio, na makakaharap ang magwawagi sa pagitan nina Sri Lankan Krismi Langkapurayalage at Silpa Lau Ratu ng Indonesia.
Makakatapat naman ni Marcial ang mananalo sa nina Leong Tai Kan ng Hong Kong at Kirra Rustom ng Australia.
“Petecio and Marcial are boxers to beat here and the opposition have them in their sights, but they’re in great shape. The other big guns here are Uzbekistan, Kazakhstan, India and Thailand, but we’re not discounting anyone. The coaches prepared our boxers well, ” sabi ni foreign consultant at dating Australian head coach Don Abnett.
Bukod kay Abnett, kasama rin sa Philippine coaching staff si men’s head coach Ronald Chavez, women’s coach Reynaldo Galido, national coaches Roel Velasco at Elmer Pamisa. Hindi nakasama (sa ‘di malamang dahilan) ang women’s head coach na si Nolito Velasco.
Ang hindi mananalo sa torneong ito ay magkakaroon pa ng huling pagkakataon sa Mayo, sa World Qualifiers sa Paris, France. (DENNIS INIGO)
245
