MATATAPOS na ang Agosto at bukas ay simula na ng huling apat na buwan ng taon na nagtatapos sa bre, na ibig sabihin ay umpisa na rin ng mahabang pagdiriwang ng Pilipinas ng panahon ng Kapaskuhan.

Pinakamahaba po tayong magdiwang ng kapanganakan ng ating Panginoong Hesukristo sa mundong ibabaw na tumatagal hanggang sa pagunita ng Tatlong Hari sa Enero.

Hindi ko po balak talakayin sa kolum na ito kung paanong ang Kapaskuhan ay ipinagdiriwang sa mahirap na bansang ito. Ang tema natin sa araw na ito ay kung bakit  ang buwan ng Agosto ay napakahalaga sa buhay ng kolumnistang ito bilang isang mamamahayag.

Noong Sabado, ika-29 ng Agosto, tumuntong na ang kolumnistang ito sa kanyang ika-81 taong gulang. Opo, ako po ay ganoon na katanda. Super senior citizen na, wika nga ng marami, na ang kahulugan sa panahong ito ng pandemya ay bawal nang lumabas ng bahay. Huhulihin at ikukulong kapag lumabag at kung makulit at pasaway ay malamang mabaril ng mga sundalo at pulis sa checkpoint, ayon sa direktiba ng Pangulong Duterte.

Itong buwan ring ito ginugunita ko ang ika-62 taon ko bilang trabahador ng kumpanya ng dyaryo na nagmula noong 1958, nang ako ay unang kunin ng  TVT (Tribune-Vanguardia-Times)na pag-aari ng pamilya Roces, bilang isang newspaper carrier o nagrarasyon ng kopya ng pahayagang MANILA TIMES at TALIBA tuwing madaling araw, mula Lunes hanggang Linggo, at DAILY MIRROR sa hapon.

Nasa kolehiyo na ako noon kaya binigyan ako ni Mr. Chino Roces, na kung tawagin namin ay “Tatay” (ang kapatid niyang babae, si  Dna. Isabel, ay “Nanay” ang tawag ng lahat ng mga empleyado), ng isang maliit na kuwarto na mailing section para gawin kong paliguan bago pumasok sa eskuwela.

Ang walang kamatayan kong bisikletang pang-rasyon ng dyaryo ang gamit ko rin para makarating sa UE mula sa Florentino Torres St. Ganoon din pabalik sa tanghali para sa delivery ng Mirror at pabalik muli sa school para sa evening classes.

Mula sa pinakamababang posisyong iyon, nakuha kong  umasenso bilang janitor, clerk sa circulation  department, traffic-in-charge sa collection department, hanggang sa advertising deskman.
Makaraan ang 13 taong palipat-lipat sa iba’t ibang departamento, nairekomenda ng noon ay sports editor na si Tony Siddayao at natanggap bilang sportswriter. Ni hindi ko pinangarap na maging reporter. Ang pangarap ko lang noon ay magkaroon ng mataas-taas na posisyon sa alinmang departamento para magkaroon ng magandang buhay sa hinaharap.

Wala kasi akong kinuhang subject sa journalism sa aking pag-aaral. But as fate would have it, wika nga ng mga Kano, naging isang reporter ako. Pero bago dumating ang magandang suwerteng ito, dumaan ako sa mahigpit na pagsasanay mula kay Ginoong Siddayao, na naging kumpare at kaibigan kong matalik at tutor sa sportswriting.

Maigsi ang naging stint ko bilang Times reporter. Humigit-kumulang na isang taon lamang. Ngunit sapat iyon para tanghalin ako bilang isang beterano sa bagong yugto ng buhay ko.

Salamat sa pagtuturo ni Mirror sports editor Gus Villanueva noon, Bert Cuevas ng Chronicle, Manolo Inigo ng Evening News, Iking Gonzales ng Herald at maging si Teddy Benigno ng French News Agency (AFP). Kung kaya nga nang ideklara ni Pangulong Marcos ang Martial Law noong 1972, kinilala na ako bilang batikang sportswriter.

Ilang buwan lamang matapos ideklara ang Military Rule, kinuha na ako ng noon ay general manager ng bagong tatag na Philippines News Agency. Tatlong taon mula noon, nahirang akong tagapagsalita (Information Officer) ng kampo ni Joe Frazier noong laban niya kay Muhammad Ali para sa world heavyweight championship na tinawag na “Thrilla in Manila.”

Ang Thrilla ang pinakatampok na international ­coverage sa aking career bilang sportswriter. Ilan sa mga ito ang 1984 Los Angeles  Olympic Games 1988;  Seoul Olympic Games at  1996 Atlanta

Centennial, Olympic Games; 1974 World Women’s Softball ­Championship in  Bridgeport, Connecticut; 1974 World Cycling Championships in Montreal, Canada; 1978 World Men’s Basketball Championship in Manila; 1978 World Chess Championship between Anatoly Karpov and Viktor Korchnoi in Baguio City; 1979 World Golf Championship; 1981 World Road Cycling Championships in Prague, Czechoslovakia; 1981 World Track Cycling Championships, Bruno, ­Czechoslovakia; 1981 World chess Olympiad in  Malta; 1992 World Men’s Softball Championships in Manila; 1992 World Chess Olympiad in Manila; ,1993 World Speed Shooting Championships, Fresno, California; 1993 International Practical Shooting Confederation World Shoot, Bisley,

England; American Handgunners World Shoot Off, Montrose, Colorado; 1986 Seoul Asian Games; 2002 Busan Asian Games; Southeast Asian Games from 1977 till 2019; plus  sprinkling of World Little League Softball and Bronco Baseball Championships.