KINUMPIRMA ni Senate President Vicente “Tito” Sotto III na pinag-iisipan ni Pangulong Rodrigo Duterte ang posibleng abolition o pagsasapribado ng Philippine Health Insurance Corporation (PhilHealth) sa gitna ng isyu ng katiwalian at anomalya.

Gayunman, sinabi ni Sotto na mas makabubuting maghinatay pa ng ilang buwan upang makita ang performance ng bagong administrasyon Sinabi ni Sotto na kasama ito sa tinalakay sa pakikipagpulong sa Pangulo noong Miyerkules ng gabi.

Personal na ring ipinaalam ni Sotto sa Pangulo ang kanyang panukala na italaga bilang chairman ng PhilHealth Board of Directors ang Department of Finance (DOF) secretary, sa halip na Department of Health (DOH) secretary na kinatigan naman nito.

“I explained that PhilHealth is an insurance corporation and not a health entity. He agreed to my proposal,” pahayag ni Sotto.

Gayunman, hindi anya napag-usapan si Health Secretary Francisco Duque III sa pulong.

“Hindi. Only PhilHealth. I was ready to talk about it but he did not bring the name up,” paliwanag nito.

Kinumpirma naman ni Senador Bong Go na kasama rin sa pulong, na napag-usapan din ang mga hakbangin sa laban sa katiwalian.

“One of the topics discussed was the amendment of certain penal laws to increase the penalties, specifically length of imprisonment for certain crimes. Longer sentences will lead to or will be effective in, lowering crimes,” saad ni Go. (DANG SAMSON-GARCIA)