NAGPALIWANAG ang Malakanyang sa publiko hinggil sa kinukuwestiyong partisipasyon ng Chinese nationals sa ilang proyektong pang- imprastraktura sa bansa.

Napaulat kasi na may 31% ng mga manggagawa sa Estrella-Pantaleon Bridge ay Chinese habang 69% ay mga Pinoy ganundin sa Binondo-Intramuros Bridge kung saan, 55% ay mga Pilipino at 45% naman ay Chinese workers.

Paliwanag ni Presidential spokesperson Harry Roque, 100 percent donation ang dalawang ginagawang tulay mula sa pamahalaang China kaya’t hindi naman aniya marahil masama na bigyan sila ng flexibility sa mga manggagawang kanilang kinuha.

Aniya, kung ang proyekto ay galing sa buwis ng mga Pilipino ay tiyak aniyang igigiit ng gobyerno na Filipino workers lang ang kuning mga manggagawa.

Puwede rin aniyang kunin lamang ang serbisyo ng mga dayuhang obrero kung kukulangin ang mga Pinoy na gagawa sa isang proyekto. (CHRISTIAN DALE)