NAPILITANG sumuko ang isang kasapi ng Abu Sayyaf Group, sa mga tauhan ng Joint Task Force Sulu matapos na maaresto kamakailan ang kanyang asawa na pinaghihinalaang inihahahanda para maging isang suicide bomber.

Kinilala ang sumukong terrorist member ng ASG na si Jaber Binuri, mister ng naarestong si Nudsza Ismanu Aslun, na kinasuhan ng paglabag sa pag-iingat ng mga pampasabog.

Ayon kay Joint Task Force-Sulu (JTF-S) at 11th Infantry Division commander, MGen. William N. Gonzales, limang Abu Sayyaf Group (ASG) members, kabilang si Binuri, at dalawang supporters, ang sumuko sa government forces noong Miyerkoles ng umaga.

Ang pagsuko ay inilatag ng 15th Civil Military Operations Battalion (15CMO Bn), Metro Jolo Inter Agency Task Group, at intelligence units ng JTF-S.

Si Binuri ay isang hardcore member ng ASG, sa ilalim ng pamumuno ng napatay na si ASG leader Hatib Hajan Sawadjaan, simula noong taong 2013, at sumanib sa pangkat ni ASG sub-leader Ben Wagas.

“Mga 31 na encounter, o higit pa siguro, ang nasalihan ko. Dati umaabot sa tatlong beses kami nakakasagupa ng sundalo. Madalas K3 machine gun ang dala ko pero naghawak din ako ng M14 at armalite,” ani Binuri.

“Noong nalaman ko na naaresto ang asawa ko, nagpaalam ako kay Ben Wagas na magbakasyon para kunin ko ‘yung mga anak namin at dalhin sa Zamboanga. Ang totoo, nakatawag na ako sa kaibigan ko na sundalo na gusto ko na bumaba,” dagdag pa nito.

Magugunitang si Nudsza Aslun ay nadakip kasabay ng walong iba pang mga babae noong Pebrero 19 kasunod, ng isinagawang joint law enforcement operation ng militar at pulis laban sa mga suspected lady suicide bomber na binubuo ng mga asawa o anak ng mga namatay na ASG members.

Sinasabing sa pagkaka-alam ni Nudsza, napatay na si Binuri sa labanan.

“Jaber and Nudsza’s story is a stark example of how terrorism has put its claws on the integrity of a family. Fortunately, Jaber’s duties as a father won over his loyalty to the ASG. I commend his guts for coming forward. I personally assured him that his trust on us will not be put to waste,” ani MGen Gonzales.

Kabilang sa mga nagsalong ng sandata sa pamahalaan sina Jupihar Alih, 25, dating kasapi ng disbanded ASG urban group ‘Ajang-ajang’; Hassan Albain, 25; William D. Janatol, 38; Rajik L. Alih, 34; Kaisal H. Maddan, 22; at Ibin H. Hapas, 57, dating kasapi ng ASG, sa pamumuno ni Radulan Sahiron. (JESSE KABEL)