INANUNSYO ni Quezon City Police District (QCPD) director, P/Brigadier General Antonio C. Yarra ang pagkakaaresto ng mga operatiba ng QCPD sa dalawang district level most wanted persons, sa bisa ng warrant of arrest, sa magkahiwalay sa anti-criminality operations noong Abril 25 sa Quezon City.

Ayon kay P/BGen. Yarra, nagsilbi ng warrant of arrest ang mga operatiba ng Project 6, Police Station 15, sa pamumuno ni P/Lt. Col. Hendrix Mangaldan, laban sa suspek na si Gemer Garcia, 23, residente sa Palochina St., Agham Road, Brgy. Bagong Pag-asa, Quezon City, dakong alas-6:32 ng gabi noong Abril 25 sa nabanggit na lugar.

Si Garcia ay nakatala bilang most wanted person sa Directorate for Investigation and Detective Management (DIDMD) dahil sa kasong theft.

Sa parehong petsa, dakong alas-10:30 ng umaga, inaresto naman ng mga tauhan ng Anonas Police Station 9, sa pamumuno ni P/Lt. Col. Imelda Reyes, sa bisa ng warrant of arrest, ang suspek na si Rutherford Tajo, 45, sa Hobbies of Asia Compound sa #8 Macapagal St., Pasay City.

Si Tajo ay nakatala bilang no. 12 most wanted person sa QCPD habang no. 1 sa Anonas Police Station 9 dahil sa kasong rape. (JOEL O. AMONGO)