NAGKASUNDO at nagkaisa ang Presidential Anti-Corruption Commission (PACC) at ang Philippine National Police (PNP) sa patuloy na pagsugpo at paglaban sa korapsyon sa pamahalaan.

Ngunit mistulang malaking palaisipan ang surpresang pagkuha ng PACC sa PNP upang lutasin ang napakasahol at napakalawak pa ring katiwalian at korapsyon sa administrayong Duterte, gayong matatapos na ang termino ni Pangulong Rodrigo Duterte sa susunod na taon.

Ayon sa pahayag ni PACC Chairman Greco Belgica kahapon, makatutulong ang PNP mula liderato nito hanggang sa baba, sa trabaho ng PACC laban sa mga korap sa pambansang pulisya.

Tiniyak at itinaya naman ni General Guillermo Lorenzo Eleazar ang buong PNP sa paglaban at pagsugpo sa katiwalian at korapsyon sa armadong sangay ng pamahalaan.

Ang pagtutulungan ng PACC at PNP ay iminarka sa anti-corruption manifesto na sinumpaan ng lahat ng mga opisyal ng PNP, sa pangunguna nina Eleazar at Belgica.

Ang makakalap na mga reklamo laban sa mga opisyal at kasapi ng PNP ay iimbestigahan ng PACC at isasampa sa korte makaraang mapagtibay at mapalakas ang ebidensiya laban sa mga tiwali at korap sa ahensiya.

Hindi inilinaw ni Belgica kung bakit buong organisasyon pa ng PNP ang hahabulin sa korapsyon, samantalang ang mandato lamang ng PACC ay nakatuon sa mga opisyal ng pamahalaan na itinalaga ni Duterte.

Ibig sabihin, hindi sakop ng PACC ang PNP sa paghahabol sa mga korap na opisyal at miyembro ng pambansang pulisya.

Mayroong sariling Internal Affairs Service (IAS) ang PNP at mayroon pang National Police Commission (Napolcom) ang Department of the Interior and Local Government (DILG) na ang itinakda ng batas na kani-kanilang mga trabaho, tungkulin at obligasyon ay kasuhan at tanggalin sa PNP ang masasamang opisyal at miyembro nito.

Noong nakaraang taon, isinama ni Duterte ang PACC sa itinatag na Task Force Against Corruption (TFAC) na pinamumunuan ng Department of Justice (DOJ), upang makatulong ang una sa malawakang imbestigasyon laban sa mga korap na opisyal at kawani ng lahat ng mga ahensiya ng pamahalaan. (NELSON S. BADILLA)