NAKATAKDANG ipatapon pabalik sa kanilang bansa ng Bureau of Immigration (BI) ang isang South Korean national na wanted sa mga awtoridad sa Seoul dahil sa ‘swindling and defrauding’ sa apat niyang kababayan.
Kinilala ni Immigration Commissioner Jaime Morente ang nahuling alien fugitive na si Kim Byunggon, 41-anyos, nakakulong sa BI Detention Facility sa Camp Bagong Diwa, Taguig City.
Nadakip ang suspek noong Hunyo 2 ng mga operatiba mula sa BI’s Fugitive Search unit (FSU) sa loob ng mall sa Brgy. Apas, Cebu City sa bisa ng mission order na inisyu ni Morente matapos hilingin ng South Korean authorities.
Ang suspek ay may nakabinbing warrant of arrest mula sa Korean court dahil sa kasong large-scale fraud.
Si Kim ay isang overstaying alien at hindi dokumentado dahil sa revocation ng kanyang passport ng South Korean government.
“We will thus deport him for being an overstaying, undocumented and undesirable alien. He will be placed on our immigration blacklist to prevent him from re-entering the country,” ani Morente.
Sa nakuhang impormasyon mula sa BI, si Kim ay pakay ng Interpol Blue Notice na inisyu noong Marso matapos hilingin ng South Korean government. (JOEL O. AMONGO)
130 
