NAHIRAPAN muna si dating World Pool finalist Roberto Gomez bago nakuha ang huling silya sa Group C elimination ng ginaganap na 1st Quezon City 10-Ball Open Day sa Hard Times Sports Bar, nasabing lungsod.
Tuluyan namang napatalsik sa torneo ang multi-titled cue artist na si Van Corteza matapos mabigong makaahon sa loser’s bracket.
Kinailangan ng 2007 WPA World 9-Ball at 2007 World Cup of Pool finalist na si Gomez na makaalpas mula sa losers group upang makausad sa susunod na round, na tatampukan din nina Jeff De Luna at 2006 WPA World 9-Ball at 2007 WPA World 8-Ball champion Ronato Alcano.
Unang tinalo ni Gomez si Peter Hiraki, 8-0, subalit nabigo sa sumunod na laban kontra Bernie Regalario, 7-8. Ngunit nakabawi siya kontra Carlo Manhit sa do-or-die match, 8-2, upang angkinin ang ikawalo at pinakahuling silya sa Group C.
Hindi naman kasing swerte niya si two-time Southeast Asian Games 9-Ball at three-time 8-Ball gold medalist na si Corteza.
Unang nagwagi si Corteza kay Raymund Faraon, 8-6, subalit nabigo kay Baseth Mocaibat, 2-8. Sa loser’s bracket ay natalo naman siya kay Kyle Amoroto, 4-8, at tuluyang natapos ang kampanya niya sa torneo.
Nasungkit ni Bernie Regalario ang silya sa pool C1, Anton Raga Group – C2, Baseth Mocaibat – C3, Mark Ejay Cunanan – C4, Arvi Tanega – C5, Kyle Amoroto – C6, Marvin Pastor – C7 at Gomez – C8.
168 
