MAKARAANG maghakot ng mga medalya sa 30th Southeast Asian Games sa Manila noong 2019, target ng Philippine Dance Sports Federation (PDSF) na maduplika kundi man mahigitan pa ito sa susunod na edisyon ng biennial meet sa Vietnam sa 2022.
Kaya nagdesisyon ang pederasyon na ipadalang muli ang matatagumpay na parehang nag-uwi ng kabuuang 12 medalya – 10 golds at 2 silvers – sa nabalam (dahil sa COVID-19) na 31st SEA Games sa Hanoi sa Mayo.
Naging malaking paktor din sa desisyon ng PDSF ang kawalan ng kompetisyon ng mga amateur at professional dancesports athletes dahil sa pandemya.
Kasama ang dancesports sa mga contact sport na maraming limitasyon pagdating sa health and safety protocol kaya lubha silang naapektuhan simula noong nakaraang taon, nang magkaroon ng mga lockdown dahil sa pandemic.
“As PDSF is unable to hold competitions (dancesports being considered a contact sport) due to COVID-19 pandemic, the Board of Directors of PDSF has unanimously decided that the same athletes, who represented the Philippines in the 30th Southeast Asian Games, shall likewise be the official participants in the Dancesport events,” ayon sa memo na pirmado ni federation secretary General Atty. Andresito Fornier.
Kabilang sa mga pambato ng PDSF ang mga pares nina Michael Angelo Marquez at Stephanie Sabalo, Wilbert Aunso at Pearl Marie Cañeda para sa Latin American Discipline; at Sean Mischa Aranar at Ana Leonila Nualla, Mark Jayson Gayon at Mary Joy Renigen sa Modern Standard Discipline.
Mayroong 12 dancesports – samba, cha-cha-cha, rumba, pasa doble, jive at five dance sa Latin category, at waltz, tango, slow foxtrot, viennese waltz, quickstep at five dance para sa standard division. (ANN ENCARNACION)
292
