IPINAAARESTO na ng Senado si dating Budget Undersecretary Christopher Lao na una nang na-cite for contempt dahil sa pang-iisnab sa pagdinig ng Senate Blue Ribbon Committee sa procurement ng umano’y overpriced na medical supplies.
Ang warrant of arrest laban kay Lao ay nilagdaan nina Senate President Vicente Sotto III at Blue Ribbon Committee Chairman Richard Gordon.
Tiniyak naman ng Office of the Sgt. At Arms ng Senado na ipatutupad nila ang kautusan.
“We will just prepare the admin requirements, at kahit out of town eh we will will serve and implement the arrest order,” saad ni OSSA chief Rene Samonte.
Sa pagdinig nitong Huwebes, sinabi ni Gordon na hindi na government official si Lao at hindi na ito saklaw ng kautusan ni Pangulong Rodrigo Duterte na nagbabawal sa Executive department officials at mga empleyado na dumalo sa Senate hearing.
“Wala ka na po sa gobyerno, kailangan humarap ka rito,” dagdag ni Gordon.
Una namang inirekomenda ni Lacson ang paghahain ng kasong graft laban kay Lao dahil sa pagbibigay ng malalaking kontrata sa Pharmally Pharmaceutical Corporation sa kabila ng kawalan nito ng sapat na puhunan. (DANG SAMSON-GARCIA)
167 
