SINIMULAN na ng Las Piñas City government ang pagtuturok ng COVID-19 booster shots sa hanay ng mga healthcare workers na nakabase sa nasabing lungsod.

Sa datos na ibinahagi ni Las Piñas Mayor Imelda “Mel” Aguilar batay sa records ng City Health Office (CHO), nasa 3,700 fully-vaccinated healthcare workers ang kanilang nakatakdang bigyan ng booster shots sa hangaring tiyaking ligtas ang kanilang hanay sa pagpapatuloy ng pagganap sa kani-kanilang tungkulin.

Ayon pa sa alkalde, inaprubahan na rin ng Inter Agency Task Force (IATF) ang kanilang vaccination roll out gamit ang Moderna at Pfizer vaccines para sa mga healthcare workers. Tinukoy na rin ng Las Piñas LGU ang mga lugar kung saan babakunahan ang kanilang mga medical frontliners, bagay na una nang sinang-ayunan ng Department of Health (DOH).

Agad namang nakipagpulong si Vice Mayor April Aguilar kina CHO Officer in Charge Dr. Juliana Gonzales at Immunization Program Coordinator Dr. Ellen Gumpal para alamin ang updates sa vaccination roll out ng mga taga-lungsod.

Patuloy namang nakaantabay ang CHO para sa guidelines mula sa DOH kaugnay naman ng pagtuturok sa hanay ng mga senior citizens na residente ng Las Piñas. (DAVE MEDINA)