Ni Ann Esternon
Nalalapit na ang Chinese New Year. Ano ang nalalaman ninyo rito?
Sa Pebrero 12 ang Chinese New Year, tapat sa Biyernes at isang Special Non-working na araw sa Pilipinas habang isang national holiday sa China.
Ang preparasyon ng okasyon na ito ay sinisimulan mula Pebrero 4 at magtatapos ng New Year’s Eve.
Ang Chinese New Year (o Spring Festival) ay ipinagdiriwang ng 16 araw ngunit tanging ang unang pitong araw lamang ang kinokonsiderang public holiday (Pebrero 11 hanggang Pebrero 17). Ang pagdiriwang ay magtatapos sa isang Lantern Festival na gaganapin naman sa Pebrero 26th na may preparasyong nagsisimula sa Pebrero 23.
Ang selebrasyon ng Chinese New Year ay walang fixed date ngunit tulad nating mga Pinoy at iba pang lahi ay laging naroon ang pagbibigayan, masayang salo-salo at pagpapasalamat sa mga biyayang natanggap sa nagsarang taon at kahandaan na may kasiyahan sa pagharap sa panibagong taon ng buhay.
Ang Chinese New Year ay Year of the Ox o baka.
Sa Chinese Zodiac, ang Ox ay ikalawa sa lahat ng zodiac animals. Ang 12 zodiac animals ayon sa pagkakasunod-sunod ay: Rat, Ox, Tiger, Rabbit, Dragon, Snake, Horse, Goat, Monkey, Rooster, Dog, at Pig.
MGA TAONG IPINANGANAK SA YEAR OF THE OX
Sa kultura ng mga Chinese, ang Ox ay kanilang pinahahalagahan dahil sa naitutulong nito sa agrikultura, may positibong karakter tulad ng pagiging masipag at totoo.
Ang mga taong ipinanganak sa simbolo ng Ox ay sinasabing tapat, malalim at mapagmahal. May mababang loob at hindi nakatuon sa mga papuri o hindi nais ang maging sentro ng atensyon. Sa ganitong gawi ay kadalasang hindi nakikita ang kanilang talento ngunit nakakukuha ng pagkilala dahil sa kanilang kasipagan.
PAGHAHANDA NG MGA PAGKAIN
Dahil ang Chinese New Year ay pinakamahalagang okasyon sa mga Intsik, mahalaga ring mapagsaluhan ito ng mga pamilya sa isang reunion dinner ng New Year’s Eve. Kahit anong layo ng miyembro ng pamilya ay kailangan makauwi sila sa kanilang pamilya. At kung sadyang hindi sila makakauwi ay gagawin ng pamilya na iiwan ang pwesto ng hindi nakadalo at maglalagay ng set ng utensils para sa kanila.
Ang tradisyon ng pagkain na pinagsasaluhan ay nian gao – nian-sticky; gao-cake (tikoy o rice cake o New Year’s cake). Sa paghahanda at pagkain nito na gawa sa malagkit na kanin, naroon ang hiling na maging matagumpay ang taon at mas mainam kaysa sa taong nagdaan.
Ang hugis ng nian gao ay iba-iba para karagdagang kasiyahan, at naiiba rin ang flavor nito kung gugustuhin.
Ang paghahanda din ng mga pagkain ay isang engrandeng pagsasama-sama ng mga pamilya sa bawat tahanan at tradisyon sa kanila na may mga pagkain din tulad ng steamed or braised fish bilang kahilingan para sa kasaganaan sa hinaharap na taon.
Sa hilagang parte ng China ang mga tao rito ay mas gustong ihanda ang dumplings habang ang mga taga timog ay mas gusto ang rice cakes.
RED POCKETS
Ang mga perang nasa pulang sobre ay tinatawag na lucky money o “New Year’s money.” Tradisyon na ibibinigay ang pulang sobre sa mga bata kung saan naroon ang paniwala ng mga matatanda na naipapasa sa bagong taong haharapin ang magandang kapalaran at pagpapala. Samantalang naroon ding nagbibigay din ang mga bata sa matatanda ng perang nasa pulang sobre bilang simbolo ng paghaba ng buhay at pagpapakita ng pasasalamat.
Mayroon din namang lugar sa China kung saan ang mga mag-asawa ang nagbibigay sa mga kaibigang hindi pa kasal upang maipasa ang swerte.
Ang kaugaliang ito ay nagmula pa noong Han Dynasty. Sa halip na tunay na pera, ito ay mga maliit na collectibles na barya (na may butas sa gitna) upang tanggalin ang masamang espiritu.
Sa paglipas ng panahon ay nauwi ito sa pamimigay ng pulang sobre o angpao at mayroon na ring digital red envelopes o digital pockets na tinatawag. Maaari nang magpadala ng pera kahit sa malalayong lugar kung saan naroon ang mahal sa buhay.
197
