(NI BERNARD TAGUINOD)

TILA isinampal ni Albay Rep. Joey Salceda sa Metro Manila Development Authority (MMDA) ang kanyang dalawang panukalang batas na reresolba sa problema sa trapiko sa Metro Manila.

Ibinalandra ni Salceda kay MMDA traffic czar Bong Nebrija ang kanyang House Bill 3712 at HB 9205 matapos itong hamunin ng opisyal na gumawa ng batas na tatarget sa mga pribadong sasakyan, matapos maghain ng petisyon ang kongresista sa Korte Suprema para ipatigil ang plano na alisin ang mga provincial bus terminals sa kahabaan ng Edsa. “Even without MMDA challenge (parang math challenge, switch it up challenge or Budot Challenge), I take my duties as lawmaker seriously and conscientiously performed my task I have sworn to both as representatives of 2D Albay and as member of the chief policymaking body of our constitutional democracy—Congress,” sagot ni Salceda sa hamon ng MMDA.

Ipinagmalaki nito na siya ang may akda sa Carmaggedon Law o ang HB 3712 na magbibigay ng Emergency Power kay Pangulong Rodrigo Duterte para resolbahin ang problema sa trapiko sa Metro Manila.

Naaprubahan sa ikatlo at huling pagbasa ang nasabing panukala noong Disyembre 3, 2018 subalit hinihinatay pa ang bersyon dito ng Senado.

“Also, I have filed HB 9205, the House version of the Gatchalian-Villanueva bill on the no garage-no car policy,” pagmamalaki pa ni Salceda at hindi umano ito ang unang pagkakataon na kinuwestiyon niya sa SC ang planong pagpapaalis sa mga provincial bus terminal sa Edsa dahil ginawa na niya ito noong 2015.

“Remember, this is the 2nd time I have sought rescue from the SC–the fist on Sept. 1, 2-14 which was rendered moot by LTFRB’s suspension of its memorandum circular no.2014-015. Five years later, the devil has resurrected as MMDA Regulation No. 19-002 to demonize poor rural commuters,” ayon pa sa mambabatas.

Imbes na maghamon aniya ang MMDA, dapat na lang nito sagutin ang mga isyu tulad ng hindi pagsasagawa ng konsultasyon sa mga apektadong commuters sa kanilang plano; hindi pagsunod sa National Transport Policy na dapat people oriented ang public transport modes at ang 20,000 black taxi at 2,000 P2P buses na hahakot ng mga pasahero mula sa Sta. Rosa, Laguna at Valenzuela City kapalit ng 6,000 provincial bus na kanilang planong alisin sa Edsa.