CAVITE – Patay ang isang negosyante makaraang pagbabarilin ng kanyang karibal sa negosyo sa bayan ng Tanza sa lalawigan noong Miyerkoles ng gabi.

Isinugod sa MV Santiago Medical Center ang biktimang si alyas “Vince”, residente ng Pasong Kawayan 2, Gen. Trias City, Cavite subalit namatay habang nilalapatan ng lunas dahil sa tama ng bala sa leeg.

Inginusong suspek sa krimen ang isang alyas “Kenneth”, isa ring negosyante, ng Brgy. Paradahan 1, Tanza, Cavite.

Ayon sa ulat, sakay ang biktima ng kanyang motorsiklo habang patungo sa Pasong Kawayan 2, Gen. Trias City, Cavite bandang alas-8:00 ng gabi nang harangin siya ng suspek sa Brgy. Paradahan 1, Tanza, Cavite at pinagbabaril.

Matapos ang pamamaril ay kaswal lang na naglakad ang suspek sa direksyon ng Gen. Trias City.

Nabatid sa imbestigasyon ng pulisya, may alitan sa negosyo ang dalawa bagamat hindi tinukoy kung ano ang kanilang negosyo. (SIGFRED ADSUARA)