AKTIBONG PAGSUSULONG NG KALIGTASAN

THINKING ALOUD ni CLAIRE FELICIANO

NANAWAGAN ang Bureau of Fire Protection (BFP) sa patuloy na pagsusulong ng pampublikong kaligtasan kasabay ng pagdiriwang ng Fire Prevention Month ngayong buwan ng Marso.

Bagama’t buong taon naman talagang trabaho ang pagsasagawa ng mga programa sa pag-iwas sa sunog, magandang mas nabibigyang pansin ang mga inisyatiba sa BFP sa pamamagitan ng mga aktibidad na naka-angkla sa temang “Sa Pag-iwas ng Sunog, hindi ka nag-iisa”. Ito mismo ang nagpapahayag ng kahalagahan ng pagkakaisa para isulong ang pagkakaroon ng mga komunidad na ligtas sa sunog at disaster-resilient.

May nabasa rin ako kamakailan na paalala kung saan sinabi ng BFP na tumawag agad sa himpilan kung may sunog bago mag-live sa social media. Napapanahon ang ganitong paalala dahil aminin man natin o hindi, tila ba naging likas na sa marami sa atin na una munang mag-post o mag-share sa social media bago gumawa ng mga nararapat na aksyon na talagang nakatutulong – kagaya ng pagre-report ng mga insidente para agad na makaresponde at maresolba.

Kaisa rin ang Meralco ng pamahalaan sa pagpapataas ng kamalayan tungkol sa pag-iingat sa sunog dahil maaaring maging sanhi rin ng sunog ang mga aksidenteng may kinalaman sa pasilidad ng kuryente.

Hindi lamang kaligtasan ng mga empleyado ang isinaalang-alang ng kumpanya. Kasama pa nga ang Meralco sa isinagawang kauna-unahang Fire and Disaster Resilience Expo ng BFP Makati City kamakailan kung saan nagsagawa ang kumpanya ng demonstrasyon sa tamang paggamit ng rescue equipment sa mga residente ng lungsod.

Bukod sa pakikiisa sa mga aktibidad ng BFP, nakikipagtulungan din ang Meralco sa ahensya para mas mapaigting ang kapasidad ng emergency response ng kumpanya sa pamamagitan ng pagpapatayo ng fire station sa loob ng headquarters nito sa Pasig. Nagsisilbi itong headquarters ng sariling Rescue Fire Brigade ng Meralco at mayroon pang sariling fire truck, water tanker, rescue tender, at mga rescue boat na ginagamit sa pagresponde sa mga emergency.

Sa pamamagitan ng pasilidad na ito, naging mas madali ang koordinasyon sa pagitan ng BFP at Meralco tuwing mayroong insidente ng sunog. Kasama na rito ang mabilis na pag-abiso ng BFP sa Meralco kung may mga lugar na kailangang patayin muna ang linya ng kuryente kapag mayroong sunog.

Patuloy rin ang Meralco sa pagpapaigting ng kahusayan at kaalaman sa pamamagitan ng patuloy na pagsailalim sa mga pagsasanay ng Meralco Rescue Fire Brigade. Nag-aanyaya rin ang mga miyembro ng brigada na sumali rin ang iba pang empleyado at maging bahagi ng grupo at tumulong sa pagsusulong ng pampublikong kaligtasan.

Aktibo ring hinihikayat ng Meralco ang publiko na ugaliin ang ligtas na paggamit ng kuryente upang maiwasan ang mga sunog at aksidente. Kaya nga paulit-ulit na rin ipinapaalala na tukuyin at solusyunan ang fire hazards. Halimbawa na ang pag-iwas sa paggamit ng mga “octopus connection” at pagtiyak na nasa maayos na kondisyon ang electrical facilities at regular na nasusuri ng lisensyadong electrician.

Bukod sa mandato ng Meralco na maghatid ng maaasahang serbisyo ng kuryente sa milyun-milyong mga customer nito, patuloy rin ang pakikiisa nito sa pamahalaan sa pagsusulong ng pampublikong kaligtasan at paghahatid ng serbisyo sa mga Pilipino sa iba’t ibang pamamaraan.

89

Related posts

Leave a Comment