SWAK sa selda ang isang 18-anyos na binatilyo makaraang makumpiskahan ng 11.5 gramo ng shabu sa buy-bust operation sa Tondo, Manila noong Sabado ng gabi.

Ayon sa ulat, nagkasa ng buy-bust operation ang mga tauhan ng Station Drug Enforcement Unit (SDEU) ng Manila Police District-Moriones Police Station 2, sa Juan Luna Street, malapit sa Chacon St., Tondo, Manila na nagresulta sa pagkakadakip sa suspek na si alyas “Boss”, ng Barangay 102, Tondo, at nakumpiska ang umano’y shabu na tinatayang P78,200 ang halaga.

Nahaharap ang suspek sa kasong paglabag sa Republic Act 9165 o Comprehensive Dangerous Drugs Act of 2002. (RENE CRISOSTOMO)