CAVITE – Nauwi sa engkuwentro ang ikinasang buy-bust operation sa mag-live in partner na nasa listahan ng street level individuals (SLIs) na nagresulta sa pagkakasugat ng lalaki nang magtangkang lumaban sa mga awtoridad sa Dasmariñas City noong Huwebes ng hapon.

Nilalapatan ng lunas sa Pagamutan ng Dasmariñas City at naka-hospital arrest ang suspek na si alyas “Mark” dahil sa tama ng bala sa kaliwang paa habang hawak din ng pulisya ang live-in partner nito na si alyas “Marissa”.

Ayon sa ulat, bandang alas- 4:36 ng hapon nang nagsagawa ang buy-bust operation ang Provincial Drug Enforcement Unit (PDEU)-Cavite Police Provincial Office (PPO) sa Brgy. Sabang Dasmariñas City laban sa mag-live-in -partner.

Subalit nahalata ni Mark na pulis ang kanilang ka-transaksyon kaya nagbunot ito ng .22 kalibreng baril at ipinaputok sa mga awtoridad.

Gumanti naman ng putok ang mga pulis at tinamaan ang suspek sa kanang binti nito.

Isinugod sa ospital si Mark habang ang live-in partner nito ay binitbit ng pulisya.

Nakuha mula sa mga suspek ang 10 gramo ng hinihinalang shabu na may market value na P68,000, .22 kalibreng baril, basyo ng bala at plastic pouch ng ilegal na droga.

(SIGFRED ADSUARA)