BINATIKOS ni Senador Erwin Tulfo ang Department of Environment and Natural Resources (DENR) dahil sa lantaran nitong pagpapabaya sa pagpapatupad ng mga hakbang upang maiwasan ang pagkasira ng kalikasan.

“They’re not doing their job. Kanina pa po, hindi nila masabi at masagot ang mga questions na tinatanong po natin. Why will we fund an agency, 27 billion pesos, na hindi naman po nagagawa yung trabaho? Ginagawa nilang gatasan itong ahensya na ito ever since, Mr. President. Why?” pahayag ni Tulfo sa plenary deliberations ng Senado para sa panukalang badyet ng DENR sa 2026.

Si Senador Loren Legarda, na nagdedepensa sa badyet ng ahensya, ay nagbahagi rin ng kanyang pagkadismaya sa kawalan ng aksyon at pagkukusa ng DENR.

“Hindi ko kayang ipagtanggol at sagutin ‘yan, at sana ako na lang po ang nagtatanong dahil mahirap pong ipagtanggol ito. Wala akong sagot; hindi ako mag-iimbento ng sagot. Mas dismayado pa ako kaysa sa inyo,” sabi ni Legarda.

Sa pagtatanong sa ahensya, isinawalat ni Tulfo ng ilang isyu sa kalikasan sa buong bansa na nagpapakita ng pagpapabaya ng pamahalaan sa pagpigil ng mga nakakapinsalang aktibidad tulad ng logging, mining, at ang pagtatayo ng mga iligal na istruktura sa mga protektadong lugar.

Kinumpirma ng neophyte na senador ang kanyang mga pahayag sa pamamagitan ng mga videos at litrato ng aktuwal na mga lugar ng nasirang likas na yaman sa Cantilan, Surigao del Sur; Doña Remedios Trinidad, Bulacan; Gutalac, Zamboanga del Norte; ang kabundukan ng Sierra Madre; at iba pa.

Nang banggitin ang mga isyung ito, ang DENR ay nanatiling tahimik o hindi nagbigay sa Senador ng malinaw na kasagutan.

Matatandaang nang bumalik ang Sesyon ng Senado kasunod ng pananalasa ng mga nagdaang bagyo, nagbigay si Sen. Erwin Tulfo ng privilege speech na nananawagan sa ahensya para sa pananagutan at humihingi ng proteksyon para sa Kabundukan ng Sierra Madre.

“Paulit-ulit na iniligtas ng Sierra Madre ang Luzon — mula sa Bagyong Yolanda, Rolly, Paeng, at ngayon, Uwan. Ngunit sino ang magliligtas sa Sierra Madre? Hindi ito makapagsalita para sa sarili. Hindi ito maaaring magmartsa sa bulwagang ito. Hindi ito maaaring magmakaawa para sa awa laban sa mga bulldozer at chainsaw. Umaasa ito sa atin — ang mga kinatawan ng bayan — upang bigyan ito ng boses at legal na proteksyon,” pagdedeklara niya sa nasabing talumpati.

Bilang pagtatapos ng kanyang interpelasyon sa 2026 Budget ng DENR, nagpahayag si Tulfo: “Sana po, Ginoong Pangulo, mahal na mga kasamahan, hindi pa huli ang lahat. Malasakit ang kailangan natin upang iligtas ang bansang ito, upang iligtas ang ating kalikasan.”