GEN Z TALKS ni LEA BAJASAN

MAY kumalat na video online na talagang napahinto ako. Isang babae na content creator ang nagluto ng kambing, tapos kinain niya sa camera ‘yung tinawag niyang itlog o bayag ng hayop. Sa caption niya pa mismo, sinabi niyang iyon daw ang pinakamasarap na parte. Hindi ko alam kung matatawa ako o maiilang.

Sa unang kagat pa lang, ramdam ko na ang kilabot. Marami ring nanonood ang natahimik bigla. May mga nandidiri. May mga natawa dahil hindi nila alam kung ano ang ire-react. May mga nagkomento na sumama ang tiyan nila habang pinanonood iyon. Hindi talaga pangkaraniwang eksena.

Totoo naman na may mga lugar na kumakain ng iba’t ibang bahagi ng hayop. May celebrities pa ngang nag-video habang kumakain ng kakaibang pagkain. Pero ibang-iba ang dating ng video na ito. Hindi ito parang tradisyunal na pagkain. Hindi rin mukhang totoo niyang paborito. Ang lakas ng amoy ng panggulat. Parang ginawa para manghingi ng atensyon at views.

Doon nagiging tanong ng lahat. Bakit pinapayagan ng Facebook ang ganitong klase ng content. May patakaran sila tungkol sa hindi dapat ipinakikita na masyadong marahas o nakadidiri lalo na kung ginagawang libangan ang hayop. Pero kahit ganoon, nakalulusot pa rin ang videos na ganito at diretso pang lumalabas sa feed ng maraming tao.

May mga pagkakataon naman na pinapayagan ang medyo sensitibong video, lalo na kung balita ito o may layuning magbigay ng impormasyon. Pero itong video na ito ay malayo sa ganitong dahilan. Hindi educational. Hindi cooking tutorial. Hindi cultural. Ang dating niya ay simpleng paghingi ng reaksyon ng tao.

Sa ibang online discussions, marami ring nagrereklamo na kahit i-report nila ang ganitong posts, bumabalik pa rin sila sa feed. May nagsabi pang nasusuka na sila sa rami ng videos na para bang ginagawa ang hayop bilang pampasikat. May mga nag-aanyaya sa iba na i-report ang video para mawala sana.

Nakaiintindi naman ako. Kapag pinanonood mo ang isang tao na kumakain ng parte ng hayop sa paraang hindi maayos o hindi natural, talaga namang makararamdam ng kaba, inis, o pagkadiri. Hindi mo na tinitingnan ang pagkain bilang pagkain. Nagmumukhang props. Gamit lang para mag-trending.

Walang masama sa pagkain ng karne at wala ring masama sa iba’t ibang putahe. Pero iba kapag halatang ginagawa lang eksena para sumikat. Ang problema hindi ‘yung pagkain. Ang problema ‘yung intensyon at ‘yung paraan ng pagpapakita. Sa video na iyon, halata na ang habol ay atensyon, hindi respeto.

Kung patuloy na gagawa ang content creators ng kahit ano basta lamang may maipakitang bago, baka kailangan nang maghigpit ng mga platform. Kasi kung tuloy-tuloy na lang ang shock content, nasasanay ang mga tao sa mga bagay na hindi naman dapat tinatanggap.

Kaya oo, naaawa ako sa kambing. Naaawa rin ako sa mga nanood na hindi handa sa nakita nila. At napaiisip ako kung ano pa kaya ang susunod na gagawin ng iba para lang makakuha ng views.