HINIMOK ni dating Senate President Franklin Drilon ang Korte Suprema (SC) na maglabas ng desisyon “as early as possible” sa mga petisyong kumukuwestiyon sa ilang probisyon kaugnay ng unprogrammed funds at special accounts sa General Appropriations Act para sa 2024, 2025 at 2026.
Sa kanyang manifestation sa muling pagdinig ng pinagsama-samang petisyon nitong Martes, sinabi ni Drilon na hindi na dapat hintayin pa ng Korte na matapos ang taon dahil may mahahalagang desisyong gagawin pa ang Kongreso sa usapin ng pambansang budget.
Ayon sa kanya, mahalagang makapagpasya agad ang SC dahil isusumite ang panukalang budget sa Kongreso 30 araw matapos ang State of the Nation Address (SONA), na idinaraos tuwing ikaapat na Lunes ng Hulyo.
“We are making this manifestation to respectfully urge the Court to decide on this case as early as possible, preferably (inaudible), because the decision of this Court will provide guidance not only to the government but to the public in general as to this animal called unprogrammed appropriation,” ani Drilon.
Binigyang-diin din niya ang tinawag na “political turmoil” na dulot ng isyu kung saan may ilang senador na nahaharap sa mga kaso at posibleng managot sa umano’y paglabag sa batas.
“That is why this is very critical, Your Honor, that this Honorable Court provides Congress and the public in general the guidelines on what is constitutional and what can be done with the unprogrammed appropriation,” dagdag pa niya.
(JULIET PACOT)
63 
