HINDI inaatras ni Solicitor General Jose Calida ang petisyong quo warranto laban sa ABS – CBN – Corporation at ABS – CBN Convergence sa Korte Suprema.

Kahapon, walang inilabas na “opisyal” na pahayag ang tanggapan ni Calida sa media na nagsasabing iniaatras na ng Office of the General (OSG) ang petisyon makaraang  tanggapin ni Pangulong Rodrigo Duterte ang hinihinging paumanhin (apology)  mula sa ABS – CBN – Corporation, sa pamamagitan ng pangulo at chief excutive officer nito na si Carlo Lopez Katigbak.

Nitong Pebrero 24, sa kalagitnaan ng pagdinig ng Senate committee on public services hinggil sa mga kasalanan na inaakusa sa ABS – CBN, hayagang humingi ng tawad si Katigbak sa hindi paglabas ng ibang presidential campaign ads ni Pangulong Duterte noong 2016.

Sa halip, inilabas ng kumpanyang pag-aari ng pamilya Lopez ang “atake sa pagkakatao” ng president.

Si dating Senador Antonio Trillanes IV ang sinasabing nagbayad ng nasabing atake.

Ilang oras matapos ang isyung ito, may isang pahayag ng isang station manager ng telebisyon na kumalat sa social media na nagsasabing alam niya ang kuwento sa likod ng patalastas na binayaran ni Trillanes.

Inihabol daw ang nasabing atake laban kay Duterte, ngunit hindi niya tinanggap kahit may nakahandang bayad ito.

Kaya, hindi naibroadcast ang nasabing ‘patalastas’ sa nasabing telebisyon.

Iba ang idinahilan ni Katigbak.

Ang inirason ni Katigbak ay hindi na umabot sa iskedyul na nakalatag sa mga ibo-broadcast na mga presidential campaign ads noong 2016.

Ang petisyong quo warranto ni Calida, na naglalayong ipawalang-bisa ang prangkisa ng ABS – CBN Corporation at ABS – CBN Convergence dahil sa mga paglabag sa batas ng prangrakisa at batas na nagbabawal sa mga dayuhang negosyante na magkaroon ng “parte ng pag-aari” sa media company, ay sinimulang talakayin na ng Korte Suprema.

Ayon sa tagapagsalita ng mataas na korte na si Brian Keith Hosaka, sinimulan na ng Supreme Court en banc na talakayin ang quo warranto at ang kahilingang “gag order” ni Calida laban sa ABS – CBN upang makita at matukoy kung mayroong merito ang dalawang petisyon.

Ngunit, hindi tinapos ng mga mahistrado ang talakayan, sapagkat inilipat nila ang deliberasyon sa kaso sa Marso 10 upang higit nilang mapag-aralan ang mga napakaraming argumento ng OSG o mga kontra-argumento ng ABS – CBN.

Ang isa sa mga argumento ni Calida ay ang pagbebenta ng Philippine Depository Receipt (PDR) ng ABS – CBN, sa pamamagitan ng ABS – CBN Holdings Corporation.

Ang PDR ay pampinansiyang instrumento sa Pilipinas na ibinebenta sa mga dayuhang negosyante o namumuhunan upang makakalap ng pondo ang isang kumpanyang 100 porsiyentong pag-aari ng mga negosyanteng Filipino tulad ng pamilya Lopez.

Ang kapalit nito, kikita rin ang mga dayuhang negosyante.

Iginiit ni Calida na labag sa Atrkulo XVI, Seksiyon 11 ng Konstitusyon ang pagbebenta ng ABS – CBN Croporation ng PDR, sa pamamagitan ng ABS – CBN Holdings Corporation.

Ayon sa nasabing probisyon ng Konstitusyon: “The ownership and management of mass media shall be limited to citizens of the Philippines, or to corporations, cooperatives or associations, wholly owned and managed by such citizens.”

Noong Marso 30, 1998,  binuo at itinayo ng pamilya Lopez ng ABS – CBN Holdings Corporation, na ayon sa kuwento at paliwanag ng ABS – CBN sa kasaysayan ng kumpanya na makikita sa internet, “ABS-CBN Holdings Corporation was incorporated as Worldtech Holdings Corporation, for the primary purpose of issuance of the Philippine Depository Receipt (PDR) and the acquisition and holding of shares of ABS-CBN Corporation.” NELSON S. BADILLA