KUNG mayroong nagpapagaan sa dibdib ko sa gitna ng COVID-19 pandemic ay ang mga nababasa ko tungkol benepisyo ng ating kalikasan sa pagtigil sa pagbuga ng mga nakakalasong kemikal na unti-unting pumapatay kay Mother Earth.

Masakit sa dibdib ang mga nangyayari ngayon  lalo na ang mga ulat na halos araw-araw ay may mga namatay sa COVID-19 sa apat na sulok ng mundo at pagkagutom ng mga tao na hindi nahahatiran ng tulong ng kanila-kanilang gobyerno.

Gumagaan lang ang pakiramdam ko kung ang pinag-uusapan ay ang benepisyo ni Mother Earth o Inang Kalikasan sa nangyayaring ito na tila ba panggising na rin sa sanlibutan na nagsasabing “umabuso na kayo, hindi n’yo na ako pinahalagahan”.

Base sa datos na ­inilalabas ng international agencies, luminis ang hangin dahil nagpahinga ang mga industriya sa mundo matapos manalasa ang COVID-19 na ­nagsimula sa Wuhan China.

Dati-rati, kapag ­tumingala ka sa langit, malulungkot ka dahil usok ang makikita mo, pero ngayon asul na asul ang kalangitan at hindi mo na masyadong ramdam ang pag-init ng mundo hindi tulad sa mga nakaraang mga buwan at mga taon.

Malaki ang naibawas  sa mga tumatakbong sasakyan sa mga lansangan, hindi lamang sa Pilipinas kundi sa buong mundo kaya nabawasan nang husto ang usok na ibinubuga sa hangin at tumigil din sa operasyon ang mga industriya na pangunahing ‘contributor’ ng pagsama ng lagay ng kalikasan.

Kahit pababa nang pababa ang presyo ng ­krudo, wala na ring ­gumagamit dahil bawal ang gumala dahil sa ipinapatupad na home quarantine ng mga gobyerno sa mundo para hindi na lumaganap pa ng husto ang mikrobyong ito na mula sa China.

Luminis na rin ang mga karagatan at mga ilog dahil hindi na sila binulabog ng mga tao kaya palagay ko, nagkaroon ng pagkakataon ang mga isda sa karagatan at mga ilog sa buong mundo para sila ay magparami at may makain ang mga tao sa mga susunod na buwan at mga taon.

Ibig sabihin lang ay nakahinga kahit papaano ang mundo na matagal nang hindi binigyan ng importansya ng mga tao sa matagal na panahon kaya nagkakaroon tayo ng ‘Climate Change’.
Kaliwa’t kanan ang mga protesta ng mga ­environment advocates sa mundo upang ­kalampagin ang industrial nations na itigil ang kanilang operasyon na sumisira sa kalikasan at nagpapabago ng klima sa mundo dahil sa nakalalasong usok na ibinibuga ng kanilang industriya sa hangin.

Pero hindi pinapansin ng mga lider ng mga mayayamang bansa sa mundo ang panawagan  dahil ang mahalaga sa kanila ay ang yaman at kapangyarihan kaya binabalewala ang mga protesta at may ilan sa kanila ang tutulong daw para labanan ang climate change pero hanggang salita lang at ang programang inilalatag ay bibilang pa ng taon bago maipatupad.

Urgent o madalian ang paglaban sa climate change na dulot rin ng kagahaman ng mga tao sa mundo kaya marahil, nangyari ang pandemic na ito dahil hindi na ­makapaghintay si Mother Earth.
Dapat matututo na ang mga industrial ­countries sa leksyong dulot ng ­COVID-19 na walang ­halaga ang yaman nila kung kalikasan na ang gumawa ng paraan para turuan tayo ng leksyon na pahalagahan natin ang ­ating mundo. Lord Kayo na po ang bahala.