AYAW talagang pakawalan ni Pangulong Rodrigo Roa Duterte si Health Secretary Francisco Duque III.
Sa katunayan ay sinabihan pa si Sec. Duque ng Pangulo na hindi ito ang tamang panahon para magbitiw sa puwesto.
“Secretary Duque, this is not the time for you to resign. I have heard stories about, you’re going to resign. I have full trust in you. Ang akin lang naman diyan ‘yung corruption.”
“There’s an investigation going on, let it be, if you’re not guilty of corruption…ang kalaban ko lang ho ‘yung corruption,” ayon sa pangulo.
Ang tinutukoy ng Pangulo ay ang imbestigasyon na pinangungunahan ng Department of Justice sa alegasyon ng korapsyon sa Philippine Health Insurance Corp. (PhilHealth), kung saan nagsilbi si Duque bilang ex-officio chairman.
Kaugnay nito, bilang tugon ay pinasalamatan ni Sec. Duque ang Pangulo sa patuloy na pagtitiwala sa kanya.
Sa ulat, umaasa si Senate President Vicente “Tito” Sotto na mababago ang isip ni Pangulong Duterte sa pagtitiwala kay Sec. Duque kapag nabasa nito ang Senate committee report kaugnay sa P15 bilyong anomalya sa PhilHealth.
Ayon kay Sotto, kinakailangan na marekober ng PhilHealth ang bilyon pisong pondo sa Interim Reimbursement Mechanism o IRM na ibinigay sa mga ospital at iba pang medical facilities. (CHRISTIAN DALE)
188 
