AND THE WINNER IS … Ms Iloilo!

Bagama’t ramdam pa rin sa paligid ang kakaibang lungkot dulot ng COVID-19, matagumpay na naidaos ang coronation night ng prestihiyosong beauty pageant sa Baguio City na inere sa telebisyon ngayong umaga.

Kinoronahan at bitbit ang tagumpay bilang Miss Universe-Philippines 2020 ang Ilongga beauty na si Rabiya Mateo.

Sa katatapos na patimpalak, nangibabaw ang ganda at talino ni Mateo sa 47 pang kandidata.

Hindi naman nagpatalbog ang iba pang kandidata sa pagrampa kasabay ng pagpapakita ng kanilang husay at galing sa question and answer portion, bukod pa sa magagandang katawan na rumampa sa entablado.

Simple lamang ang mga gown o kasuotan ng mga kandidata.

Iginawad ang first runner-up sa Miss Parañaque, at second runner-up ang isa sa early favorites na si Michelle Gumabao mula Quezon City.

Sumunod ang Miss Bohol, habang fourth runner-up ang Cavite.

Nagpakita rin ng kanyang galing sa pag-host ang matipuno at guwapong mestizo na si KC Montero.

Naging hurado ang mga dating Miss Universe runner-ups na sina Janine Tugonon at Ariella Arida, gayundin ang ilang government officials na sina Presidential spokesperson Harry Roque, ACT-

CIS Party-list Rep. Eric Yap, at Arlene Magalong na asawa ni Baguio City Mayor Benjamin Magalong.

Tatangkain ng Ilongga beauty na masungkit ang pang-limang Miss Universe crown sa Pilipinas.

Noong nakaraang taon, bigo ang Fil-Palestinian na si Gazini Ganados na maibigay ang back-to-back win kasunod ni Catriona Magnayon Gray matapos siyang mag-landing sa Top 20 sa Miss Universe. (JULIET Q. PACOT)