MAGKAKAROON ng kapangyarihan si Pangulong Rodrigo Duterte na isapribado ang Philippine Health Insurance Corporation (PhilHealth) sa emergency power na nakatakdang ibigay sa kanya ng Kongreso.

Bukod dito, puwede rin umanong isailalim ni Duterte ang PhilHealth sa management ng private sector at gobyerno upang maisaayos ang health insurance ng mga Filipino at matapos na ang katiwalian dito.

Sa ilalim ng “[PhilHealth] Crisis Act of 2020” na inihain ng mga mambabatas sa pangunguna ni House committee on public accounts chairman Mike Defensor ng Anakalusugan party-list, bibigyan ng ’emergency power’ si Duterte.

“Ang isang tanong, can PhilHealth be privatized given this crisis act? Yes, if that is the direction of the President. Puwede bang semi-private na manage by private sector pero government pa rin?

Yes it can be done,” ani Defensor.

Bukod dito, magkakaroon din ng karagdagang kapangyarihan ang pangulo ng PhilHealth na kahalintulad ng poder ng pangulo ng bansa na tanggalin ang mga opisyal at empleyado na masasangkot sa katiwalian na hindi na kailangang dumaan pa sa Civil Service Commission (CSC) at kumuha ng tulong sa pribadong sektor tulad ng pag-audit sa pondo ng ahensya dahil kahit nandyan aniya ang Commission on Audit (COA) ay patuloy pa rin ang katiwalian dito.

“Kaya po natin ginawa ito dahil sa sitwasyon ni Atty. [Dante] Gerran [PhilHealth president] sa ngayon, wala, wala siyang katulong. Wala siyang suporta na makukuha,” ani Defensor.

Ginawa ng grupo ni Defensor ang nasabing panukala upang magkaroon ng reporma sa paghawak ng PhilHealth dahil kung hindi ay mauubos lang umano ang pera ng mamamayan sa katiwalian.

Noong Martes ay inaprubahan na ang committee report sa imbestigasyon na ginawa ni Defensor sa katiwalian sa PhilHealth kung saan pinakakasuhan ng mga ito sina Department of Health (DOH) Secretary at PhilHealth chairman Francisco Duque III at dating PhilHealth president Ricardo Morales.

Kasama sa mga pinakakasuhan ang mga miyembro ng PhilHealth board na sina Deparment of Labor and Employment Secretary Silvestre Bello III, Department of Social Welfare and Development (DSWD) Secretary Rolando Bautista, Department of Budget and Management (DBM) Secretary Wendel Avisado at Department of Finance (DOF) Secretary Carlos Dominguez. (BERNARD TAGUINOD)