HINAMON ng think-tank group na Infrawatch PH, si Presidential Anti-Crime Commission (PACC) Commissioner Greco Belgica na huwag magkubli bagkus ay pangalanan ang 12 kongresista na sinasabing korap at namorsiyento sa DPWH projects.
Ayon kay Infrawatch PH Convenor Terry Ridon, hindi dapat magtago si Belgica sa naging pahayag ni Pangulong Rodrigo Duterte na wala siyang hurisdiksyon kaya hindi nya isasapubliko ang nilalaman ng PACC report na nagdedetalye ng korupsyon sa DPWH na sangkot ang mga congressman.
“There’s no going around it. PACC should divulge the names of members of Congress allegedly involved in DPWH corruption, because failure to do so taints entirely the integrity of Congress as an institution. The agency should not hide behind the President’s pronouncement rejecting disclosure, because the information on the matter was sourced entirely from the PACC itself,” paliwanag ni Ridon.
Sa oras na matanggap ng Office of the Ombudsman ang PACC report mula sa Malacañang ay may obligasyon na itong isapubliko ang mga pangalan kaya naman walang dahilan para ipitin pa ito ni Belgica.
Ganito rin ang paliwanag ni Justice Undersecretary Adrian Sugay, aniya, kapag nai-forward na kay Ombudsman Samuel Martires ang PACC report ay bahagi na ito ng public record kaya matutukoy rin ang pangalan ng 12 congressmen na iisyuhan ng subpoena.
Aminado si Sugay na bilang taxpayer ay nais din nitong malaman kung sino-sino ang mga tiwaling congressman na tinukoy sa report.
Sa 12 congressman na tumanggap ng payola, may ilan na P10M umano ang kickback sa government funded na DPWH project, may isa na humihingi ng hanggang P100M habang ang iba ay 5% hanggang 15% ang cut sa infrastructure budget sa kanilang distrito.
Habang pinupukol ang Kamara sa korupsyon ay nanatiling tahimik naman ang House Leadership ukol dito at walang reaksyon ang tanggapan ni House Speakear Lord Allan Velasco.
Sa ilalim ng House Rules ay maaaring magsagawa ng imbestigasyon motu propio ang House Ethics Committee laban sa mga kongresista na sinasangkot sa katiwalian subalit aminado si Iloilo Rep. Janette Garin na “waste of time” lang ito. (ESTONG REYES)
186 
